17°C , Mostly cloudy | Kigali-Rwanda
Bamwe mu bazagira uruhare mu ishyirwa mu bikorwa ry'umushinga (Foto Twizeyimana F)

Ingo ibihumbi 20 zigiye gufashwa kwagura ubuhinzi  bw’ibijumba n’ibishyimbo

Yanditswe na TWIZEYIMANA FABRICE

Ku ya 17-08-2018 saa 10:28:32

Ikigo k’igihugu gishinzwe ubuhinzi n’ubworozi (RAB) n’abafatanyabikorwa bacyo, batangije umushinga ugamije kongera umusaruro w’ubuhinzi bw’ibijumba bya Oranje bikungahaye kuri Vitamini A n’ibishyimbo bikungahaye ku butare (Fer).

Bamwe mu bazagira uruhare mu ishyirwa mu bikorwa ry’umushinga (Foto Twizeyimana F)

Ni umushinga uzamara imyaka 3 ishobora kongerwa, ukaba waratewe inkunga na Banki Nyafurika itsura amajyambere (AfDB), ukazashyirwa mu bikorwa n’ibigo bisanzwe biteza imbere ubuhinzi bw’ibi bihingwa, birangajwe imbere na CIP (Ikigo mpuzamahanga giteza imbere ibinyabijumba).

Ubuyobozi bwa RAB buvuga ko uyu mushinga uzagira akamaro gakomeye mu guteza imbere ubuhinzi bw’ibi bijumba bya Oranje bikungahaye kuri Vitamini A ndetse n’ibishyimbo bikungahaye ku butare, ku buryo abanyarwanda bazabasha kwihaza mu biribwa ndetse bakanasagurira amasoko bakabona amafaranga abafasha kwiteza imbere mu bundi buryo.

Musoni Augustin, umuyobozi w’ishami ry’ubushakashatsi ku binyamisogwe muri RAB avuga ko uyu mushinga kandi ngo uzagira uruhare rukomeye mu kurandura imirire mibi, kuko ngo mu bushakashatsi bakoze basanze Vitamini A ari ingenzi cyane mu mikurire y’abana, naho ibishyimbo bikungahaye ku butare nabyo bikaba bigirira akamaro gakomeye by’umwihariko abana n’abagore.

Musoni yakomeje agira ati “Uyu mushinga uzateza imbere abahinzi, kuko uzongera umusaruro, twihaze mu biribwa turwaye imirire mibi, kandi tunasagurire amasoko haboneke amafaranga abanyarwanda biteze imbere.

Intego twihaye ni uko uyu mushinga uzagera ku ngo ibihumbi 20, bivuze ko nibura abantu ibihumbi 100 uzabageraho muri iyi myaka 3, kandi twizeye ko hagati aho hazaboneka indi nkunga umushinga ukazaguka kuko iyi ni intangiriro.”

Daniel Mbogo, umushakashatsi akaba anashinzwe guteza imbere ikoranabuhanga mu buhinzi mu kigo CIP, yabwiye Imvaho Nshya ko uyu mushinga biteguye gukorana na banki Nyafurika itsura amajyambere  mu gushyira mu bikorwa uyu mushinga, ku buryo bizeye ko abahinzi bazabona imbuto nziza, ndetse bagafashwa guhinga kijyambere, ku buryo intego yo kongera umusaruro w’ibijumba bya Oranje izagerwaho.

Ku ruhande rw’abahinzi ndetse n’abongerera agaciro umusaruro w’ibi bijumba, bavuga ko uyu mushinga bawitezeho byinshi mu kwagura ubuhinzi, no kongera imbaraga mu bikorwa byo kongerera agaciro umusaruro.

Ganza Serge, umwe muri ba rwiyemezamirimo mu gutubura imbuto y’ibijumba, kuyhinga no kongerera agaciro umusaruro wabyo, yavuze ko biteguye kubyaza umusaruro aya mahirwe babonye, bakava ku rwego bari bariho bakajya ku rwisumbuyeho.

Yagize ati “Uyu mushinga ugiye kudufasha kwagura ubuhinzi bw’ibijumba kuko uyu munsi umusaruro uri ku isoko ntuhagije, umusaruro mwiza nuboneka rero ababirya mu ngo zabo bazabibona natwe tugiye kubyongerera agaciro tubibone, iterambere rirusheho kwihuta.

Uruhare rwacu ni ukwagura natwe imbibi, tugahinga ibijumba atari mu gihe gisanzwe k’imvura gusa, ahubwo no mu gihe k’izuba tukabivomerera, umusaruro ugahoraho kandi uhagije.”

Uretse mu Rwanda, uyu mushinga wo guteza imbere ubuhinzi bw’ibijumba bya Oranje n’ibishyimbo bikungahaye ku butare ku nkunga ya Banki Nyafurika itsura amajyambere urakorerwa no mu bindi bihugu 12 by’Afurika.

 

TANGA IGITEKEREZO

Leave a Reply

Your email address will not be published. Required fields are marked *