21°C , Partly sunny | Kigali-Rwanda

Ingendo zihuza Uturere ntizafunguwe haracyari impungenge- Dr. Ngamije

Yanditswe na NYIRANEZA JUDITH

Ku ya 21-02-2021 saa 15:09:28
Minisitiri w'Ubuzima Dr. Ngamije Daniel

Umwe mu myanzuro yafatiwe mu nama y’Inama y’Abaminisitiri yabaye ku itariki ya 4 Mutarama 2021 harimo ihagarikwa ry’ingendo hagati y’Umujyi wa Kigali n’Intara kimwe no kutarenga Akarere ubwako hagamijwe kwirinda Covid-19. Uwo mwanzuro wakomeje nanone mu nama y’Abaminisitiri yateranye ku itariki ya 19 Gashyantare 2021.

Ni icyemezo cyafashwe nyuma yo kubona ko imibare y’abandura COVID-19 yiyongera ndetse icyo gihe n’abapfa bari benshi. Gusa uwashoboraga kuva mu karere akajya mu kandi ni uwajya gushaka serivisi z’ingenzi.

Inama y’Abaminisitiri yateranye ku wa 19 Gashyantare 2021 yagumishijeho izi ngamba gusa umwihariko uba ku bashaka serivisi z’ingenzi zirimo iz’ubuvuzi n’iz’ubukerarugendo.

Minisitiri w’Ubuzima, Dr Daniel Ngamije, yatangarije RBA ko nubwo ubwandu bushya bwagabanutse ariko hakiri kare ko ingendo zihuza uturere zafungurwa.

Yagize ati “Impungenge ziracyahari, ntituragera aho dutanga imibare ko nta muntu wanduye COVID-19 nkuko tubitangaho amakuru buri mugoroba. Turacyafite muri Kigali no mu Ntara, mu Turere dutandukanye, usanga hakiri imibare y’abarwayi. […] Ntituragera igihe cyo gufungura, dukeneye igihe gikwiriye ngo turebe uko imibare imanuka.’’

Yongeyeho ati “Mu bijyanye n’ubuhanga mu kubara no gukurikira ibyorezo, iyo ukibona hejuru y’abantu banduye hagati ya batanu na 20 mu bantu ibihumbi 100, icyorezo kiba kigihari, kitaracika intege bihagije. Iyo ugiye munsi ya batanu ku bantu ibihumbi 100 wapimye, aho ni ho uvuga ko icyorezo cyagiye hasi. Aho ntiturahagera, nituhagera hari ibindi byemezo Guverinoma izafata.’’

Ku birebana n’ingendo hari impinduka zajemo bitewe nuko imibare y’abandura n’abapfa igenda igabanyuka, bityo hakaba ubwo ingendo zihuza Uturere zizakomorerwa nibigaragara ko ubwandu buri hasi, cyane ko hari intambwe yatewe mu kongera umubare w’abagenda mu modoka ku buryo bwa rusange, kuko Inama y’Abaminisitiri yateranye yanzuye ko imodoka zitwara abagenzi mu buryo bwa rusange zizajya zitwara abatarenze 75% by’umubare w’abo zagenewe gutwara.

Minisitiri w’Ubutegetsi bw’Igihugu Prof` Shyaka Anastase yavuze ko koroshywa kw’ingamba bidakwiye kuba icyuho cyo gukongeza Coronavirus.

Yagize ati “Biragaragara ko icyorezo cyagabanyutse, iyo dushyize kuri 75%, abagenzi bose bagenda bicaye, nta we uhagaze. Hari ibigomba gukurikiraho ngo tugire umutekano, usanga abagenzi batangira kuba benshi mu masaha yo gutaha.’’

Buri muturarwanda arakangurirwa gukomeza kubahiriza amabwiriza yo kwirinda ari yo gukaraba intoki hakoreshejwe amazi meza n’isabune cyangwa alukolo yabugenewe, gusiga intera no kwambara neza agapfukamunwa kuri ibi hakiyongeraho n’izindi ngamba ziba zashyizweho n’inzego zibishinzwe.

Ingendo zihuza Umujyi wa Kigali n’Intara zizongera gufungurwa mu gihe imibare ya Covid bizaba bigaragara ko yagabanyutse cyane

Umwanditsi:

NYIRANEZA JUDITH

Tanga Igitekerezo

Email yanyu ntigaragazwa ku rubuga. Amazina na Email ni ngombwa.