22°C , Partly cloudy | Kigali-Rwanda

Ingaruka ziba nyinshi ku muntu udafata imiti y’igituntu neza

Yanditswe na MUKAGAHIZI ROSE

Ku ya 13-02-2018 saa 06:55:07

Dr Habimana Mucyo Yves, umukozi mu kigo k’igihugu gishinzwe ubuzima, RBC, ashinzwe agashami gashinzwe kurwanya indwara y’igituntu k’igikatu, asobanura igituntu k’igikatu nk’indwara y’igituntu ifata ibihaha ariko icyo  gituntu kikaba cyaragize ubudahangarwa ku miti isanzwe ivura indwara y’igituntu gisanzwe kuko iba itacyumva ya miti  isanzwe ivura indwara y’igituntu muri rusange.

Indwara y’Igituntu yandurira mu mwuka

Ubusanzwe ngo igituntu ni indwara yandura iterwa n’agakoko gato  cyane, mu rurimi rw’Igifaransa kitwa «Bacille de Koch». Dr. Habimana avuga ko hari ingaruka ku muntu utarafashe imiti neza z’uko utwo dukoko tw’igituntu tumenyera imiti bigatuma itabasha kumuvura bityo akaba yarwara igituntu k’igikatu. Igituntu gisanzwe kivurwa hagati y’amezi 6 kugeza 12 bitewe n’ubwoko bw’igituntu.

Iyo ndwara yandurira cyane cyane mu mwuka iyo umurwayi w’igituntu akorora, yitsamuye cyangwa avuga yohereza utwo dukoko mu mwuka duhumeka, bityo abawuhumetse bagashobora kwandura igituntu.

Utwo dukoko tw’igituntu twibasira ahanini ibihaha ariko dushobora gufata n’indi myanya y’umubiri.

Dr. Habimana yagize ati «Mu buryo rero umuntu ayanduramo ni uko ashobora kuba abana  cyangwa se akorana n’umuntu urwaye indwara y’igituntu kuko ari indwara yandurira mu myanya y’ubuhumekero, yandurira mu mwuka iyo umuntu ayirwaye agahumeka, iyo akorora, yitsamura se, aririmba,  icyo gihe uko ahumeka, uko asohora umwuka mwinshi  ni ko asohoramo na twa dukoko, abandi rero bahumeka uwo mwuka wamaze kwanduzwa n’utwo dukoko bakaba nabo  bashobora guhita bagira ibimenyetso by’indwara y’igituntu.”

Umuntu urwaye indwara y’igituntu agaragaza ibimenyetso birimo inkorora igejeje cyangwa irengeje ibyumweru bibiri, kugira umuriro, kubira ibyuya cyane cyane n’ijoro, kugira ikizibakanwa, kunanuka, umunaniro, kubabara mu gatuza no gucira rimwe na rimwe igikororwa kivanze n’amaraso.

Indwara y’igituntu birashoboka kuyirinda; uburyo bwa mbere bwo kwirinda ni ukwivuza kare umuntu akanatangira imiti hakiri kare, kuko bituma atanduza abantu benshi, dore ko  igituntu  ari indwara ivurwa igakira iyo umurwayi afata imiti neza akurikije amabwiriza ya muganga.

Inama  Dr Habimana agira abantu, ni uko igihe cyose  abantu baba cyane cyane ahantu  hari abantu ari benshi hakagombye kuba ahantu umwuka ugera ku buryo buhagije, ibyo bibafasha icya mbere guhumeka neza bagahumeka umwuka mwiza, icya kabiri bibafasha kuba bakwirinda n’izindi ndwara izo ari zo zose zishobora kuba zakwandurira mu myanya y’ubuhumekero.

TANGA IGITEKEREZO

Leave a Reply

Be the First to Comment!

avatar