27°C , Partly sunny | Kigali-Rwanda

Ingamba zo kurwanya ruswa mu nzego yagaragayemo mu Rwanda

Yanditswe na Rutayisire Emile

Ku ya Dec 28, 2018 saa 7:43

Transparency International Rwanda, Twese hamwe turwanye ruswa, twiyubakire igihugu kizira ruswa.

Guverinoma y’u Rwanda ikomeje gushyira imbaraga mu guhashya ruswa binyuze mu gushishikariza buri muturage, inzego za Leta n’iz’abikorera na Sosiyete Sivile guhuza imbaraga mu guhashya iki icyorezo kigira ingaruka mbi ku mibereho myiza y’abaturage, imiyoborere no ku buzima bw’igihugu muri rusange.

Ikegeranyo giherutse gukorwa n’umuryango Transparency International mu mwaka ushize wa 2017, kerekana ko u Rwanda ruri ku mwanya wa 48 ku Isi n’amanota 55% rukaba urwa gatatu muri Afurika, mu Karere k’Ibiyaga Bigari n’Afurika y’Iburasirazuba rukaza ku mwanya wa mbere mu kurwanya ruswa.

Mu ntangiriro z’uku kwezi k’Ukuboza, Ishami ry’u Rwanda ry’uyu muryango (TI-Rwanda) ryashyize ahagaragara ubushakashatsi kuri ruswa ntoya (Rwanda Bribery Index 2018).

Ubu bushakashatsi bushimangira ko nubwo u Rwanda ruri ku rwego rwiza, hari ibigo na serivisi bikigaragaramo ruswa iri hejuru nko mu rwego rw’abikorera, Ishami rya Polisi y’u Rwanda rishinzwe Umutekano wo mu Muhanda (Traffic Police), REG, inzego z’ubutabera, na zimwe muri serivisi za Leta zirimo nko gutanga ibya ngombwa by’ubwubatsi, amasoko ya Leta, gahunda zo gufasha abakene n’ahandi.

Muri serivisi yo gutanga ibyangombwa byo kubaka hagaragaye ruswa iri ku rugero rwa 44.12%, gutanga amasoko ya Leta kuri 33,33%, kurekura ibinyabiziga byafashwe mu muhanda kuri 24,59%, muri gahunda ya Girinka kuri 22,76% na ho mu rwego rw’abikorera ikaba ku kigereranyo cya 20,14%.

Mu bijyanye no gusaba serivisi, urwego rw’abikorera rwagaragayemo ruswa nyinshi kuko iri ku kigero cya 19.28%; Ishami rya Polisi rishinzwe Umutekano wo mu muhanda riza ku mwanya wa kabiri ku rugero rwa15.14% mu gihe mu 2017 yari ifite 11.67%; Ikigo k’Igihugu gishinzwe Ingufu (REG) cyo cyaje ku mwanya wa gatatu na 12.93%.

Ubuyobozi bw’izi nzego buhamya ko bwafashe ingamba zitandukanye zo guhangana n’iki kibazo ku buryo bufite ikizere cyo kurandura ruswa y’ubwoko bwose.

Imwe mu ngamba izo nzego zihurizaho ni ugukoresha ikoranabuhanga mu mitangire ya serivisi, kutihanganira uwagaragaweho no gutanga cyangwa kwakira ruswa, gutanga amakuru ndetse n’ubukangurambaga.

MU RWEGO RW’ABIKORERA

Callixte Kanamugire ushinzwe ubuvugizi mu Rugaga rw’Abikorera mu Rwanda (PSF) yashimangiye ko biteye agahinda kuba ruswa ikivugwa mu rwego rw’abikorera kuko ari imungu ikwiye kurandurwa burundu muri PSF no mu nzego zose.

Yashimangiye ko PSF yashyizeho gahunda zo kuyirwanya zirimo guhamya ko abanyamuryango b’urugaga bagira amahame n’amabwiriza agenga imikorere yabo.

Yagize ati “Kuba abanyamuryango ba PSF bafite amabwiriza y’imikorere bizadufasha guhagarika iki cyorezo. Tuzakora ubukangurambaga mu banyamuryango bacu bubashishikariza kugira ‘Udusanduku tw’Ibitekerezo’ twafasha gutanga amakuru ku kintu cyose gishobora gushibukaho ruswa.”

MURI REG, NTA MUKOZI WEMEREWE KWAKA AMAFARANGA

Ubuyobozi bw’Ikigo k’Igihugu gishinzwe Ingufu (REG) buvuga ko ingufu zashyizwe mu kurwanya ruswa zatangiye gutanga umusaruro kuko ikigereranyo cya ruswa mu mitangire ya serivisi cyavuye ku 8.60% kigera kuri 7.57% mu gihe cy’umwaka umwe.

Prosper Mubera ushinzwe Itangazamakuru muri REG, yagize ati “Uburyo bwa mbere turwanyamo ruswa ni ukutihanganira imyitwarire irangwamo ruswa iyo ari yo yose.”

Imwe mu ngamba ni ukutihanganira umuntu wese ugaragaweho n’icyaha cya ruswa, kugabanya uguhura kw’abakozi n’abahabwa serivisi hifashishijwe ikoranabuhanga ndetse no kwishyurira serivisi kuri banki gusa.

Ubuyobozi bwa REG bushimangira ko butazigera butezuka mu guhangana na ruswa ku buryo izacika burundu. Abakozi bakangurirwa kwirinda ruswa n’igisa na yo ndetse n’abaturage bashyiriweho uburyo bwo gutanga amakuru k’uwabaka ruswa muri serivisi bemererwa n’amategeko, harimo kuba bakohereza ubutumwa bugufi cyangwa kohereza kuri Whatsapp kuri nomero 0788310606 cyangwa guhamagara umurongo utishyurwa 3535.

MURI POLISI Y’U RWANDA

Polisi y’u Rwanda itangaza ko mu ngamba yafashe zo kurwanya ruswa harimo gukoresha ikoranabuhanga mu gutanga serivisi cyane cyane ku bagana ishami rya Polisi rishinzwe umutekano wo mu muhanda, serivisi zo kwakira ibirego n’izindi.

Abapolisi bashinzwe umutekano wo mu muhanda bakoresha ikoranabuhanga mu kwandikira abakoze amakosa bifashishije utumashini, ku buryo nta ho umupolisi wo mu muhanda ahurira n’amafaranga atangwa nk’igihano (contravention).

Hanashyizweho umurongo wa telefoni utishyurwa 997 wifashishwa mu gutanga amakuru ku mupolisi waba yakiriye cyangwa asabye ruswa.

Umuyobozi w’ishami rishinzwe kurwanya ruswa muri Polisi y’Igihugu ACP Jean Nepo Mbonyumuvunyi, yatangaje ko nka Polisi y’Igihugu batishimiye kuba uru rwego rukivugwamo ruswa.

Agira ati “Ibituvugwaho muri raporo si byiza pe! Iyo urebye ruswa yavuzwe cyane iri mu ishami rya Polisi y’Igihugu rishinzwe Umutekano wo mu muhanda cyane cyane mu ishami ryo gutanga impushya zo gutwara ibinyabiziga… Ubu kwiyandikisha, kwishyura, ibintu byose bisigaye bikorwa hakoreshejwe uburyo bw’ikoranabuhanga.”

Ishami rya Polisi rishinzwe gukumira no kurwanya ruswa, rikora ubugenzuzi bw’imbere muri polisi ndetse rikaba rinafite ikigo cy’amahugurwa (Ethic Centre) kigamije guhugura abapolisi ku myitwarire yabo.

Mu ngamba Polisi yashyizeho harimo guhana abakekwaho ruswa bagakurikiranwa n’amategeko abandi bakirukanwa burundu muri Polisi y’Igihugu.

ACP Mbonyumuvunyi yakomeje agira ati “Polisi y’Igihugu isanzwe itihanganira abapolisi barya ruswa, kuko abafashwe bose bahita batangazwa kandi bakirukanwa. Ibi biri mu bigaragaza ko dushaka kurandura ruswa muri Polisi y’Igihugu nk’uko tuyirwanya mu nzego zose.”

“UGUHAYE SERIVISI UTANZE RUSWA ABA AGUHEMUKIYE”

Umuyobozi Mukuru wa TI-Rwanda Ingabire Marie Immaculée, yemeza ko uguhaye serivisi ariko ukayibona ubanje gutanga ruswa aba aguhemukiye kuko aba akwambuye ndetse akanagusiga mu kaga.

Ingabire atanga urugero rw’uko ushobora gutanga ruswa yo kubona uruhushya rwo gutwara imodoka, ariko rutaguha ubumenyi bwo kuyitwara ku buryo akaga wikururira ari ako gukora impanuka igira ingaruka kuri wowe, abo utwaye, abo wagonze ndetse n’ibindi wangije.

Yakomeje agira ati: “Ushobora guhabwa icyangombwa cyo kubaka utanze ruswa ariko iyo ubuyobozi buyisenye kubera ko yubatswe mu buryo butubahirije amategeko, uwo wahaye ruswa nta cyo akumarira. Igihombo ni icyawe.”

Umunyamabanga wa Leta muri Minisiteri y’Ubutegetsi bw’Igihugu ushinzwe imibereho myiza y’abaturage Dr. Alvera Mukabaramba, yavuze ko uzubaka mu buryo bunyuranyije n’amategeko kubera ko yatanze ruswa atazabura gusenyerwa, ndetse n’abafatiwe mu cyuho bazakomeza guhanwa by’intangarugero.

Yagize ati “Abantu barangwaho iyi ruswa turabirukana mu kazi ndetse amafaranga batanze tukayagaruza. Inzu zubakwa mu kajagari tuzajya tuzisenya, ntabwo abaturage bazajya bemera gutanga ruswa kandi bari busenyerwe.”

Avuga ko kuba hari itegeko rirengera umuntu utanze ubuhamya bikwiye guha buri wese imbaraga zo gutanga amakuru ku cyaha cya ruswa kugira ngo nibiba ngombwa ikumirwe itaratangwa.

Urwego rw’Umuvunyi rushimangira ko nta muntu n’umwe uri hejuru y’amategeko kuko ntawushobora kwihanganirwa yitwaje inshingano yahawe, yaba ari umuturage n’umunyamahanga ukorera ku butaka bw’u Rwanda.

Ibijyanye n’igipimo cya ruswa ntoya (RBI) gikorwa na Transparency International Rwanda:

RBI 2018 yashyizwe ahagaragara tariki ya 12/12/2018 ni ku nshuro ya 9 ikozwe na TI-RW. Ubu bushakashatsi bukorwa mu rwego rw’umushinga “PPIMA (Public Policy Information Monitoring and Advocacy), ku nkunga ya Norwegian People’s Aid, Sweden Development Agency na DFID.

Ruswa ntoya igaragazwa n’ubushakashatsi ibona ibyuho mu mitangire ya serivisi mbi, mu bigo bidafite uburyo bunoze bwo kugenzura imikorere y’abakozi na gahunda zihamye zo kuyikumira.

Ku wahuye na ruswa, yatanga amakuru kuri 2641 (nomero itishyurwa) cyangwa akabikora anyuze ku rubuga www.ifatetirwanda.org

Hafashwe ingamba zo gukoresha ikoranabuhanga mu muhanda ku buryo nta mupolisi uzongera gukora ku mafaranga

Umuyobozi wa TI-Rwanda Marie Immaculée Ingabire, ahamya ko utanga ruswa aba yikururiye akaga (Foto Sam Ngendahimana)

Itangwa ry’amasoko mu bikorera na ryo riravugwamo ruswa iri hejuru

Nta mukozi w’amashanyarazi wemerewe kwishyurwa amafaranga mu ntoki, hashyizweho uburyo bwo kwishyura kuri banki