23°C , Partly cloudy | Kigali-Rwanda

Ingamba zo kurwanya ruswa mu bigo zatanze umusaruro

Yanditswe na Ntawitonda Jean Claude

Ku ya 17-12-2019 saa 10:20:38
Umuyobozi Mukuru wa TI-Rwanda Ingabire Marie Immaculée

Icyaha cya ruswa kiri mu bigoye kurandura burundu, ariko kuba yagabanyuka cyane birashoboka nk’uko bigaragara mu bihugu bimaze gutera intambwe ifatika mu kuyirwanya, ikaba yaragabanyutse mu buryo bugaragara.

U Rwanda ruza mu bihugu by’Afurika bikomeje guharanira ko ikigero cya ruswa cyagabanyuka bidasubirwaho mu nzego zose kuko igira uruhare rukomeye mu kudindiza iterambere ry’Igihugu.

Raporo ya MoIbrahim 2018 igaragaza u Rwanda ku mwanya wa mbere muri Afurika mu gukorera mu mucyo (Transparency and Accountability) n’amanota 66.9% muri 2018, mu gihe muri 2017 rwari kuri uwo mwaya n’amanota 72.1%.

Ikegeranyo cy’Umuryango Transparency International mu mwaka wa 2017 n’uwa 2018, cyashyize u Rwanda ku mwanya wa 48 ku Isi mu kurwanya ruswa rukaba urwa gatatu muri Afurika, urwa mbere mu Karere k’Ibiyaga Bigari n’Afurika y’Iburasirazuba.

Mu ntangiriro z’uku kwezi k’Ukuboza, Ishami ry’u Rwanda ry’uyu muryango (TI-Rwanda) ryashyize ahagaragara ubushakashatsi kuri ruswa ntoya (Rwanda Bribery Index 2019), bwerekanye ko ikegeranyo cya ruswa cyagabanyutse muri rusange ndetse ibigo bitandukanye bigaragaramo impinduka zitangaje.

Muri rusange, ikigereranyo cya ruswa ntoya cyavuye kuri 3.28% mu mwaka wa 2017, mu 2018 kigera kuri 2.08% na ho mu 2019 kuri 2%.

Ubwo bushakashatsi bwagaragaje ko ruswa yagabanyutse cyane mu Ishami rya Polisi y’u Rwanda rishinzwe Umutekano wo mu Muhanda (Traffic Police) no mu Kigo k’Igihugu REG Ltd, kuko byagaragayemo impinduka zikomeye nubwo bikigaragara mu bigo birangwamo ruswa nyinshi.

Ishami rya Polisi rishinzwe umutekano wo mu muhanda 

Ikigereranyo cya ruswa yakiriwe mu Ishami rya Polisi y’u Rwanda rishinzwe umutekano wo mu muhanda cyavuye kuri 14.29% mu mwaka wa 2018 kigera ku 9.7% muri uyu mwaka.

Umuyobozi Mukuru wa TI-Rwanda Ingabire Marie Immaculée, yashimiye uru rwego ku ngamba rwafashe mu gihe cy’umwaka umwe zigatanga umusaruro.

Yagize ati: “Ndashimira Polisi y’u Rwanda ku muhate yagize wo guhangana na ruswa. Abaturage bahura kenshi n’abapolisi kandi bigakorwa ku buryo bigoye kubigenzura, ariko Polisi y’u Rwanda igerageza gukora ibishoboka byose ikagabanyuka.”

Polisi y’u Rwanda itangaza ko mu ngamba yafashe zo kurwanya ruswa harimo gukoresha ikoranabuhanga mu gutanga serivisi ku bagana Ishami rya Polisi rishinzwe umutekano wo mu muhanda, serivisi zo kwakira ibirego n’izindi.

Abapolisi bashinzwe umutekano wo mu muhanda bakoresha ikoranabuhanga mu kwandikira abakoze amakosa bifashishije utumashini, ku buryo ntaho umupolisi wo mu muhanda ahurira n’amafaranga atangwa nk’igihano (contravention).

Hanashyizweho  umurongo wa terefoni utishyurwa 997 wifashishwa mu gutanga amakuru ku mupolisi waba yakiriye cyangwa asabye ruswa.

Ishami rya Polisi rishinzwe umutekano wo mu muhanda riri mu bigo byagaragaje impinduka mu kurwanya ruswa

Muri REG, guhashya ruswa burundu ni yo ntego

Impinduka zagaragaye mu Kigo k’Igihugu gishinzwe Ingufu (REG Ltd) zishimiwe na benshi nyuma yo gutangaza ibyavuye mu bushakashatsi.

Ubushakashatsi bwagaragaje ko ikigereranyo cya ruswa mu mitangire ya serivisi cyavuye kuri 7.53% mu mwaka wa 2018 kigera kuri 3.51% mu 2019, n’umubare w’abatanze n’abakiriye ruswa bava kuri 12.93% mu 2018 bagera kuri 5.30% mu 2019.

Umuyobozi Mukuru wa REG Ltd Ron Weiss, yagize ati: “Nubwo hakigaragara abakirya ruswa ntoya, tuzakomeza kubirwanya kugeza ubwo ruswa n’igisa na yo cyose bizaba amateka mu kigo cyacu.”

Ingamba zafashije kugera kuri iyo ntego zirimo gukorera hamwe, kutihanganira no guhana bihanukiriye uwagaragayeho ruswa bikanamuviramo kubura akazi, ndetse no kugabanya uguhura kw’abakozi n’abahabwa serivisi hifashishijwe ikoranabuhanga ndetse no kwishyurira serivisi kuri banki gusa.

Uko ruswa igabanyuka ni ko abakozi bongera ubunyamwuga mukazi kabo, n’ikizere cy’abahabwa serivisi kikiyongera

RIB yiyemeje gukuraho icyasha

Mu muhango wo gutangaza ibyavuye mu bushakashatsi ku wa 3 Ukuboza 2019, uwari uhagarariye Urwego rw’Ubugenzacyaha mu Rwanda (RIB) yatangaje ko bidakwiye ko urwego rurwanya ibyaha rugaragara ku rutonde rw’ibigo bibonekamo ibyaha nka ruswa.

Ubuyobozi bwa RIB bwijeje abitabiriye uwo muhango ko bugiye gukora ibishoboka byose ruswa ivugwa muri RIB ikagabanyuka. Uru rwego ruza ku mwanya wa kane ku ijanisha rya 8.50%, na ho ruswa yakiriwe ikaba ibarirwa ku kigero cya 7.8%.

TI-Rwanda irasaba uru rwego gufatira urugero rwiza ku nzego zabashije kugabanya ikigereranyo cya ruswa.

Igabanyuka ry’ikigero cya ruswa ryanagaragaye mu zindi nzego zirimo urw’ubutabera n’Urwego rw’Abikorera (PSF).

Urwego rw’Umuvunyi na rwo rurashimira ibigo byagaragaje impinduka rukizeza ubufatanye mu kurushaho guhangana na ruswa nke ikigaragara no gufasha inzego aho yiyongereye gushyiraho ingamba zihangana na yo.

Musangabatware Clément, Umuvunyi Wungirije Ushinzwe gukumira no kurwanya ruswa n’ibyaha bifitanye isano na yo, yakomeje agira ati: “Akenshi abatanga ruswa ni ababa bakeneye serivisi; aho u Rwanda rwarahatekereje rwimakaza ikoranabuhanga mu kugabanya ihererekanywa ry’amafaranga mu ntoki.”

Nyuma yo kugaragara ko ijanisha ry’abadatanga amakuru kuri ruswa ari 86.8%, TI-Rwanda n’Urwego rw’Umuvunyi birashishikariza Abanyarwanda kutabyihererana, kuko ayo makuru batanze agirwa ibanga ariko icyaha kigakurikiranwa mu maguru mashya.

Umwanditsi:

Ntawitonda Jean Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.