22°C , Mostly sunny | Kigali-Rwanda
Inama nyunguranabitekerezo ku bijyanye n'ubuzima bw'imyororokere yitabiriwe n'inzego zitandukanye(Foto James)

Ingamba za Leta y’u Rwanda muri EDPRS na NST1 zatumye kwinjiza k’umuturage byiyongera

Yanditswe na SEZIBERA ANSELME

Ku ya 25-06-2019 saa 08:42:55

Umuyobozi ushinzwe Ishami ry’ubugenzuzi rya gahunda n’imishinga bya Leta muri Minisiteri y’Imari n’Igenamigambi (MINECOFIN) Ndayisenga J. Bosco, arahamya ko ingamba Leta y’u Rwanda yihaye ikanazishyira mu bikorwa binyuze muri Gahunda y’Igihugu y’Imbaturabukungu (EDPRS I, II) na Gahunda ya Guverinoma y’imyaka 7 (NST1), zarushijeho gutuma ubukungu bw’igihugu buzamuka ndetse kwinjiza k’umuturage kuriyongera mu myaka 25 ari na ko ubukene bugenda bugabanuka.

Byagaragarijwe mu Nteko Ishingamategeko mu kiganiro cyatanzwe ku ngingo igira iti: “Gahunda yo kuboneza urubyaro mu myaka 25 ishize, n’ingamba zigamije guhangana n’inzitizi zikigaragara”, haragaragazwa ko u Rwanda rwashyize mu bikorwa imyanzuro ya Addis Ababa irebana n’abaturage n’iterambere.

Ni mu rwego rwo gushimangira n’ishyirwa mu bikorwa ry’inama mpuzamahanga irebana n’abaturage n’iterambere (ASPD) yabereye i Cairo mu Misiri mu 1994, yerekanye n’ibigomba gukorwa ngo harebwe uko ibibazo abaturage bahura nabyo byakemurwa hakihutishwa n’iterambere, u Rwanda rukaba ari kimwe mu bihugu byasinye ayo masezerano ngo rubishyire mu bikorwa.

Ndayisenga nk’umwe mu batanze icyo kiganiro imbere y’inzego zitandukanye za Leta n’abafatanyabikorwa, asobanura ko ibyemeranyijweho byose biri mu ntego igihugu kigomba kugeraho byashyizwe mu bikorwa mu kerekezo 2020, bihuzwa na Gahunda y’Igihugu mbaturabukungu (IDPRS) ya 1 niya 2, yaje isimburwa na gahunda ya Guverinoma y’imyaka 7 yo kwihutisha iterambere (NST1).

Agira ati: “Izamuka ry’umusaruro ku muturage, mu 1990 ryari  ku madorari 374, mu 1994 ugera ku madorari 146, hanyuma mu 2018 aba amadorari 787 ku muturage kandi bikagaragaza ko ubuzima bw’umuturage bugenda buzamuka kubera ingamba za Leta y’ubumwe igenda ishyiramo imbaraga mu gushakira ibyiza abaturage no kugabanura ubukene.

Ku bijyanye n’ubukene, mu 2006 imibare yari kuri 57%, mu 2017 igera kuri 38.2%, intego ikaba ari ukuzagabanura ubukene kugera kuri 20% muri 2020. Ku byerekeranye n’ubukene bukabije, mu 2006 bwari kuri 38%, 2017 biba 16% ikerekezo ni uko 2020 bwagombaga kuba bwarandutse burundu. Ibyo byose bikubiye muri raporo yasohotse mu kwezi kwa Kanama 2018”.

Ndayisenga atangaza ko hashyizweho ikerekezo 2020 gishingiye ku byari byemeranyijwe mu nama mpuzamahanga ku bijyanye n’abaturage n’iterambere. Ikerekezo 2020 cyari kigizwe n’ibipimo 48 n’intego 52, harimo kugira u Rwanda igihugu gifite ubukungu bushingiye ku bumenyi.

Intego z’ibanze zari ukugera ku mutungo ungana n’amadorari 900 kuri buri  muturage kuri 2020, ariko kubera ko intego zimwe zasubiwemo kuko zitari zikijyanye n’igihe, icyo gipimo ku mutungo cyahinduwe agahindurwa amadorari 1240 kuri buri muturage mu 2020, avuye ku madorari 220 u Rwanda rwariho mu 2000. Harimo kandi kugabanya ubukene bwagombaga kuva kuri 60.2% bwariho mu 2000 bukagera kuri 20% muri 2020.

Ndayisenga avuga ko mu myaka 80 ubukungu bw’igihugu butari bwifashe neza kuko bwari ku kigero cya 50% mu 1994 ari nabyo byatumye impuzandengo y’umusaruro mbumbe ku muturage imanuka ikagera ku madorari 196 ingana n’uko byari bihagaze mu 1975. Ibyo ngo byatewe ahanini n’uko igihugu cyatakaje miriyoni isaga y’abantu yari imaze kwicwa muri Jenoside yakorewe Abatutsi, impunzi zigera kuri miriyoni 3 zari mu bihugu bikikije u Rwanda bitandukanye.

Ku byerekeranye n’ubukungu, avuga ko muri uwo mwaka izamuka ry’ibiciro ryageze kuri 64%, ubukene bugera kuri 78%, ibikorwaremezo byose birasenyuka, imfungwa zigera 120 000 mu bakekwagaho gukora Jenoside bari mu magereza, abakozi ba Leta bamwe nabo batari bafite ubumenyi buhagije kuko 79% batari barize ikiciro cya kaminuza kubera ko bamwe bari barishwe abandi barahunze.

Kugera kuri iyo ntego agaragaza ko byasabaga kugendana na gahunda yo kuboneza urubyaro, agaragaza uko imibare y’abanyarwanda yari ihagaze ku myaka imwe n’imwe.

Ndayisenga ati: “Mu 2012 Abanyarwanda bavuye kuri miliyoni 10.5, bagera kuri miliyoni 12.1 mu 2018, abagore ari 51.5% hanyuma abagabo ari 48.5%.

U Rwanda rufite abaturage biganjemo abato bangana na 40% bari munsi y’imyaka 15, mu gihe guhera munsi y’umwaka 1 kugera ku myaka 24 bose ari 60%, nk’uko imibare itangwa n’Ikigo k’Igihugu k’ibarurishamibare (NISR) ibyerekana.

Ubwiyongere bw’abaturage bwagiye bugabanuka kuko mu 2000 bari kuri 2.9%,  mu 2012 buba 2.3%, ikifuzo ari uko mu 2020 bwaba bugabanutse buri kuri 2.2%”.

Nk’uko abishimangira, umubare w’abana ku mugore u Rwanda rwari ku bana 6.2 mu 1992, mu mwaka wa 2014/2015 ubushakashatsi bugaragaza ko bageze kuri 4.2 bigaragaza igabanuka. Ingamba zafashwe zatumye abangavu batwara inda zitateganyijwe ari kimwe mu byagabanyije ubwiyongere bw’abaturage kuko mu 1992 banganaga na 11% mu 2014 baragabanuka kugera kuri 7% kandi ingamba zirakomeje.

Muri rusange ibikorwaremezo byakozwe ari nabyo biri kuzamura ubukungu bw’igihugu bikanarushaho gutuma imibereho myiza y’abaturage b’u Rwanda igenda neza izamuka nk’amashanyarazi n’amazi meza bigenda byiyongera kandi bikwirakwizwa. Ati: “Mu 2017 umuriro ku baturage bari 46.7%, amazi meza ku baturage akaba yarageze hejuru ya 50%”.

Ndayisenga atangaza ko ibyakozwe byose byagezweho kubera ingamba z’ubuyobozi bwiza butavangura abaturage nka Leta zabanje, gukorera hamwe no gufatanya n’abafatanyabikorwa, guhanga udushya, kwishakamo ibisubizo, guhanahana amakuru, ikoranabuhanga n’imikoranire y’inzego.

Ibyo kandi bikaba byari bigamije kubaka igihugu bundi bushya, kunga abanyarwanda, guca ivangura iryo ari ryo ryose, gucyura impunzi, hagakorwa ibikorwa by’isanamitima ku barokotse Jenoside yakorewe Abatutsi, gusana ibikorwaremezo byari byarashenywe, gushyiraho serivisi z’ubuzima n’iz’uburezi.

Mu biganiro byatanzwe hibandwa ku bukungu n’imibereho myiza y’abaturage, igaragaza ko imyaka y’ikizere cyo kubaho ku banyarwanda nayo igenda izamuka, aho mu  1978 ikizere cyo kubaho yari imyaka 46.4, mu 1991 iba imyaka 29.1, hanyuma mu 2000 iba 51.2, mu gihe 2018 iri kuri 67 nyamara mu kerekezo 2020 igihugu cyari kiyemeje ko ikizere cyo kubaho cyagera kuri 66. Hasobanurwa ko aho imyaka icyo kizere cyagiye kigabanuka ahanini biterwa n’ihohoterwa na Jenoside yakorewe Abatutsi.

Inama nyunguranabitekerezo ku bijyanye n’ubuzima bw’imyororokere yitabiriwe n’inzego zitandukanye(Foto James)

TANGA IGITEKEREZO

Leave a Reply

Your email address will not be published. Required fields are marked *