Indirimbo ya Mariah Carey izandikwa mu gitabo cya Guinness de  Records 2020

Yanditswe na Ndamyirokoye François

Ku ya 02-12-2019 saa 11:34:45
Mariah Carey ukomoka muri Amerika

Mariah Carey, Umuhanzikazi w’Umunyamerika  ari mu byishimo byinshi  nyuma y’uko indirimbo ye ‘All I Want for Christmas Is you’ imaze imyaka icumi ku rubuga rwa Youtube iciye uduhigo dutatu ikaba izandikwa mu gitabo cy’abanyaduhigo cya Guiness World Records mu mwaka wa 2020.

Uretse kuba ari umuhanzi ni n’umukinnyi wa filime. Mu bihe bitandukanye yakoze indirimbo zamuhesheje ibikombe n’amashimwe.

Abategura Guiness World Records,  batangaje ko umunyabigwi mu muziki Mariah Carey yaciye uduhigo dutatu abikesha indirimbo ye.

Bavuze ko iyi ndirimbo  “All I Want for Christmas s you”  ifite agahigo kuko ihora iyoboye urutonde rw’indirimbo 100 zicurangwa cyane kuri Billboard U.S mu mpera z’umwaka.

Iyi ndirimbo kandi yaciye agahigo kuko mu masaha 24 gusa abantu 10,819,009 bayiguze ku rubuga rucuruza imiziki rwa Spotify mu mpera z’umwaka ushize nta yindi ndirimbo irabikora. Inafite agahigo kuko ihora ari iya mbere mu ndirimbo 10 za Noheli mu gihugu cy’u Bwongereza.

Mariah Carey yamenyeshejwe ko indirimbo ye yaciye uduhigo dutatu muri Guiness World Records ari mu bitaramo byo mu bihe bya Noheli yakoreye mu nzu y’imyidagaduro ya Colosseum mu Mujyi wa Las Vegas. Ni ibitaramo bizakomeza kubera muri Atlantic, Boston, Washington na New York.

Mariah Carey yashyikirijwe ibyemezo  bigaragaza ko uduhigo indirimbo ye yaciye tuzagaragara  muri ‘Guiness World Records 2020’. Uyu muhanzi yanditse kuri konti ye ya Instagram agaragaza ibyishimo yatewe no kumenya ko indirimbo ye yakunzwe mu buryo bukomeye.

Kuri urwo rubuga yagize ati “Murakoze cyane Guiness World Record ku bw’ishimwe ry’uduhigo dutatu tuzajya muri Guinness World Records 2020. Micheal yangejejeho urupapuro rubishimangira, nahise musaba kuzakomeza kubana nange no mu bindi bitaramo byose bya  nise “AllIwantforChrismas is You”

Nta bwo ari  ubwa mbere Mariah Carey  aciye uduhigo kuko mu bihe bitandukanye yagize indirimbo zayoboye intonde z’imbuga zicuruza imiziki.

Indirimbo ze zaciye uduhigo harimo iyitwa   ‘ We belong together’, ‘Always be my baby’, ‘Hero’, ‘Vision of love’ na ‘Fantasy’. Banavuga ko inshuro 28 indirimbo ‘Sake it off’, ‘Obsessed’ na ‘lover boy’ zigaruriye urutonde rw’indirimbo zikundwa ku rubuga rwa Billboard.

Mariah Carey wakunzwe mu ndirimbo ‘I Want to know what Love is’ yabonye izuba ku ya  27 Werurwe 1970, yujuje imyaka 49 y’amavuko.

Yavukiye ahitwa Huntington mu Mujyi wa New York muri Leta Zunze Ubumwe za Amerika. Mu   2018 byatangajwe ko yari atunze miriyoni 520 z’Amadorari y’Amerika.

Mu zindi ndirimbo afite harimo iyitwa “Without You”, “O Holy night”, “My all” n’izindi.

Abahanzi yagiye akorana indirimbo nabo harimo Busta Rhymes, Boys II Men, Luther Vandross n’abandi.

Umwanditsi:

Ndamyirokoye François

Tanga Igitekerezo

Email yanyu ntigaragazwa ku rubuga. Amazina na Email ni ngombwa.