19°C , Mostly clear | Kigali-Rwanda
Diamond na Rayvanny mu ndirimbo yabo Mwanza yahagaritswe gucurangwa muri Tanzania

Indirimbo nshya ya Rayvanny na Diamond yitwa Mwanza yashyizwe mu kato

Yanditswe na Nshimyumukiza Janvier Popote

Ku ya 13-11-2018 saa 15:15:59

Inama y’Igihugu y’Ubuhanzi muri Tanzania (BASATA) yahagaritse indirimbo nshya ya Rayvanny na Diamond Platnumz kubera ikibazo cyo kutubahiriza umuco.

Muri iyi ndirimbo yiswe Mwanza, aba bahanzi baririmbamo agace ko mu Ntara ya Mwanza kitwa Nyegezi, aho bagenda bakuraho umugemo wa nyuma w’iryo zina bigahindura ubusobanuro, nk’Ibyatsi bya Oda Paccy.

Inyikirizo itavugwaho rumwe iragira iti, “eeh Nyege Nyege, kwetu Mwanza Nyegezi, uuh Nyege Nyege nishushe Mwanza Nyegezi”, ugenekereje mu Kinyarwanda birasobanuye ngo “eeh Nyege Nyege, iwacu Mwanza Nyegezi, uuh Nyege Nyege unsige Mwanza Nyegezi.”

Mu gihe Nyegezi ari izina ry’ahantu, aba basore bo muri label ya WCB bavuga Nyegezi nk’ijambo ryuzuye ubundi bakavuga Nyege, kandi ‘nyege’ mu Giswahili bisobanuye ubushake bwo gukora imibonano mpuzabitsina.

Godfrey Mngereza, Umuyobozi Mukuru wa BASATA, yasabye ibitangazamakuru guhagarika gukina iyo ndirimbo yasohotse mu buryo bw’amajwi n’amashusho kuko ngo itoba umuco.

Yavuze ko bibabaje kuba aba bahanzi bafata izina ry’ahantu nka Nyegezi bakaribyazamo irindi jambo nyandagazi, akavuga ko babikoze babigambiriye bagamije gusebya abaturage ba Mwanza.

Ati, “Ni byo Mwanza hari ahantu hitwa Nyegezi, ariko iyo ijambo Nyegezi urikasemo kabiri bibyara igitutsi, nta kuntu abantu ba Mwanza bataba bababajwe n’iyi ndirimbo y’aba bahanzi.”

“BASATA twahagaritse iyi ndirimbo, nta hantu na hamwe yemerewe gucurangwa, turasaba mwebwe mukora mu bitangazamakuru kutayicuranga n’abakora mu tubyiniro turabasabye.”

Diamond na Rayvanny mu ndirimbo yabo Mwanza yahagaritswe gucurangwa muri Tanzania

Iyi ndirimbo yashyizwe ku rukuta rwa Youtube rwa Rayvanny kuwa 10 Ugushyingo 2018, imaze kurebwa n’abantu miliyoni n’ibihumbi bisaga 700 mu gihe cy’iminsi itageze no kuri itatu.

Ifunzwe mu gihe abahanzi bo muri WCB barimo gutegura igitaramo cyiswe Wasafi Festival kizaba kuwa 24 Ugushyingo, uko biri kose iyi ndirimbo nshya iri mu zo bagombaga kuzakoresha.

Twabibutsa ko muri Gashyantare 2018 nanone indirimbo ebyiri za Diamond Platnumz zafunzwe n’Urwego rw’Igihugu rushinzwe iby’itumanaho (TCRA) rubisabwe na BASATA.

Icyo gihe hafunzwe indirimbo 15 icyarimwe, zirimo Waka Waka ya Diamond na Rick Ross, ndetse na Helelujah ya Diamond na Morgan Heritage, zikaba zarafunzwe ngo kuko zitubahirije umuco.

Nyuma yahoo gato ni bwo Diamond yamurikiye Alubumu ye yise ‘A boy from Tanzale’ ajya kuyimurikira muri Kenya kubera impamvu zirimo kuba yari iriho indirimbo ebyiri zahagaritswe na Leta.

Icyo gihe yanenze ko Leta ifunga ibihangano by’abantu kandi ari byo ibatunze, ndetse akavuga ko icyo Leta yita umuco gitandukanye n’icyo isoko ry’umuziki rikeneye, ariko Leta imusaba kwiyubaha.

Kuri iyi nshuro Rayvanny yavuze ko mu guhimba Mwanza batari bagamije gutukana, ahubwo ngo Mwanza iherutse kugura n’ibyago by’impanuka y’ubwato yahitanye benshi, bityo bumva bakwiye gukora indirimbo itera akanyamuneza abantu ba Mwanza.

Yasabye BASATA na Leta muri rusange kureka abahanzi bagakoresha inganzo zabo kuko umuziki ari wo ubatunze, ikintu bigoye ko Leta igiha agaciro kuko yo ivuga ko abahanzi bakwiye kuririmba ibintu bitoreka sosiyete.

Rayvanny yasabye gukura kuri Youtube iyi ndirimbo mu maguru mashya, ariko ubwo twatangazaga iyi nkuru (17h00′, kuwa 13 Ugushyingo 2018) indirimbo yari ikiriho.

TANGA IGITEKEREZO

Leave a Reply

Your email address will not be published. Required fields are marked *