19°C , Mostly clear | Kigali-Rwanda
Emamnuel Hategeka

Indi kipe yo mu Burayi irashaka kwamamaza “Visit Rwanda”

Yanditswe na Mutungirehe Samuel

Ku ya 23-01-2019 saa 14:06:59

Umuyobozi Mukuru Wungirije w’Urwego rw’Igihugu rw’Iterambere (RDB), Emmanuel Hategeka yatanagaje ko nyuma y’aho u Rwanda rusinyanye amasezerano n’ikipe ikomeye yo ku mugabane w’u Burayi ya Arsenal yo kwamamaza ubukerarugendo bwo gusura u Rwanda hakoreshwa “Visit Rwanda”, byatinyuye ibindi bigo n’amakipe, ubu indi kipe na yo, yo ku mugabane w’u Burayi ishaka kwamamaza Visit Rwanda.

Yabitangaje tariki ya 23 Mutarama 2019 ubwo yasobanuriraga abasenateri bagize Komisiyo y’Iterambere ry’Ubukungu n’Imari, uko amasezerano u Rwanda rwasinye na Arsenal umwaka ushize wa 2018 ageze atanga umusaruro mu kumenyekanisha u Rwanda hagamijwe kongera abaza gusura ibyiza bitatse u Rwanda.

Yavuze ko bwa mbere abantu batangiye kumva ko u Rwanda rwasinye amasezerano n’ikipe ikomeye ku isi ya Arsenal, batangiye guharabika u Rwanda ariko kugeza ubu bimaze gutanga umusaruro uganisha ku kongera umubare w’aabsura u Rwanda.

Ati “Kuva rero aho dutangiye gusinyana amasezerano na Arsenal n’abandi batangiye kutwegera; byabaye nk’aho bitinyuye n’abandi bafatanyabikorwa, bakavuga ngo ariko natwe byashoboka! Murabizi ko mu mpera z’umwaka ushize twasinyanye amasezerano na Alibaba ya Jack Ma, kandi na we ku mbuga ze zose twatangiye gucuruzaho amakuru y’ubukerarugendo.

Ubu hari n’indi kipe y’I Burayi [ntiyavuze izina ryayo] na yo turimo tuganira na yo bitararangira, ariko ni yo yaje kutwishakira, ishaka na yo ko yakora (yakamamaza) Visit Rwanda.”

Hategeka yasobanuye ko mu igenzura rito bakoze nyuma yo gusinya ayo masezerano basanze abantu baritabiriye n’inyota nyinshi gushaka kumenya byinshi ku Rwanda.

Ati “Kuva dusinyanye amasezerano n’ikipe ya Arsenal, mu igenzura twakoze ryihuse twasanze mu byumweru bibiri tugitangiza ku mugaragaro ubwo bufatanye hasohotse inkuru zigera kuri 58 ku isi hose zivuga u Rwanda na Arsenal. Kuri Google (urubuga mpuzambuga) ubwaho abantu batangiye gushakisha Visit Rwanda, gushakisha u Rwanda ni iki, ruba hehe, iryo shakisha ryikubye inshuro 1.000 mu kwezi kumwe; bashakisha Visit Rwanda , bashakisha Rwanda Travel, Rwanda Tourism, bashaka Kigali Hotels.”

Yakomeje avuga ko iyo ikipe ya Arsenal ikina RDB ibona ko abantu baba bareba u Rwanda kubera kwamamaza gutandukanye guca muri sitade ya Emirates, nibura abantu bagera kuri miliyari 35, hakiyongeraho n’iby’abafana b’iyo kipe bashyira ku mbuga nkoranyambaga zo ku Isi zitandukanye, ugasanga ibyashyizwe ku mbuga n’abafana ubwabo bigera nibura kuri Posts miliyoni 15.

Yagize ati “Ariko ibyo tubirebera no mu zindi nyungu ku bijyanye n’ubukerarugendo bw’inama, uburyo tubona abashyitsi benshi baza mu nama, uburyo tubona abakerarugendo benshi bagenda baza.

Nubwo Arsenal yari intego y’Ubwami bw’Ubwongereza (UK) ariko noneho biragenda bikaba intego mpuzamahanga. Mu Bwongereza ubwaho honyine mu gihe gito tumaze dukorana na Arsenal ku bakerarugendo baza mu Rwanda hiyongereyoho 5%. Twibaza ko ari ibintu byiza, ni ubufatanye dufitanye bw’imyaka itatu kandi igenzura tumaze gukora tubona ari ibintu biduha umusaruro haba ku guteza imbere isura nziza y’igihugu cyakunze kumenyekana nabi, ariko noneho haba no kubona ba mukerarugendo binjiza amafaranga mu gihugu.”

Abasenateri bashimye uburyo RDB isi kuzamuka mu mikorere cyane mu kongera ishoraamri basaba ko yakomeza gushaka uko ishoramari ryakiyongera mu gihugu ariko harimo no gucunga neza uko umutungo wa Leta ukoreshwa muri icyo kigo.

Emamnuel Hategeka

TANGA IGITEKEREZO

One Comment on “Indi kipe yo mu Burayi irashaka kwamamaza “Visit Rwanda””

  1. IKi ni igitego cy’umutwe cya kabiri u Rwanda rugiye gutsinda. Biranejeje rwose, twizere ko bizongera umubare w’abasura u Rwanda bigateza imbere tourism sector yacu n’igihugu muri rusange. RDB tubari inyuma nk’abanyarwanda bakeneye iterambere ry’igihugu cyacu, mukomereze aho.

Leave a Reply

Your email address will not be published. Required fields are marked *