19°C , Partly sunny | Kigali-Rwanda

Imyuga, ukwibohora nyakuri k’urubyiruko rw’u Rwanda

Yanditswe na Imvaho Nshya

Ku ya 03-07-2020 saa 23:20:45

Mbere y’imyaka 26 u Rwanda rubohowe imiyoborere mibi yarugejeje kuri Jenoside yakorewe Abatutsi, imyuga yafatwaga nk’iy’abatarize kuri ubu ni imwe mu bigize isoko y’amizero y’ahazaza h’Igihugu.

Nyuma yo kubohora u Rwanda no guhagarika Jenoside yakorewe Abatutsi, uko Leta yarushagaho gufata ingamba z’iterambere ni na ko amashuri y’imyuga n’ubumenyi ngiro yagendaga ahabwa agaciro, kubera amasomo rwagiye rukura mu bihugu byateye imbere bibikesha kwimakaza imyuga n’ubumenyi ngiro ubu bikaba ari ibihangange.

Muri byo harimo nka Singapore, ari na yo Leta y’u Rwanda yakuyeho urugero rufatika rwafashije kugera ku ntambwe yagezweho kugeza ubu kandi rugikomeje.

Ubuyobozi bw’Ikigo k’Igihugu gishinzwe guteza imbere imyigishirize y’imyuga n’ubumenyingiro mu Rwanda (WDA), bushimangira ko uko Abanyarwanda bagenda basobanukirwa n’agaciro k’imyuga mu buzima bwabo bwa buri munsi bituma barushaho kuyikunda no kuyitabira; ibyo bikaba bihabanye n’ibyariho mbere y’imyaka 26 ishize aho bwari ubumenyi bwaharirwaga abatarize n’abacikishirije amashuri.

Ishuri rya Muhanga TVET ryubatswe ku busabe bwa Perezida wa Repubulika y’u Rwanda Paul Kagame

Umuyobozi w’Ikigo k’Igihugu gishinzwe guteza imbere imyuga n’ubumenyingiro (WDA) Eng. Gatabazi Pascal, yatangarije Imvaho Nshya ko kuba imyuga imaze gushinga imizi mu Rwanda bikomeje gutegurira urubyiruko rw’ubu n’urw’ahazaza kutabera Igihugu umutwaro.

Yakomeje agira ati: “Iyo umwana yize neza imyuga agira icyo yimarira, akakimarira umuryango n’Igihugu. Byatangiye kumvikana cyane, ku buryo abana bifuza kwiga mu mashuri asanzwe bagenda bajya hasi y’abifuza kwiga imyuga.”

Ibyo bishimangira gahunda u Rwanda rwihaye yo kongera ubukungu bushingiye ku bumenyi (Skills).

Muri Gahunda ya Guverinoma y’u Rwanda y’imyaka irindwi yo kwihutisha iterambere (NST1), biteganyijwe ko abanyeshuri biga imyuga n’ubumenyingiro bagomba kuba bageze kuri 60% bitarenze mu 2020.

Uruhare rwa WDA mu guteza imbere imyuga n’ubumenyi ngiro

Kuva ikigo k’Igihugu WDA kigiyeho kugeza kuri iyi nshuro u Rwanda rwizihiza isabukuru ya 26 rubohowe n’izahoze ari Ingabo za RPA-Inkotanyi, hagaragaye impinduka zidasanzwe mu burezi butangwa mu mashuri ya TVET.

Umuyoozi Mukuru wa WDA Eng. Gatabazi Pascal

Muri zo harimo kuba hamaze kubakwa amashuri atandukanye mu Gihugu no kuyaha ibikoresho. Imibare yerekana ko amashuri ya TVET yavuye kuri 69 yabarwaga mu mwaka wa 2010 none kuri ubu arakabakaba 500.

Muri byo harimo amashuri yatangijwe ashimangira ubwiyongere bw’amashuri yisumbuye yigisha imyuga n’ubumenyi ngiro, hakiyongeraho Amashuri Makuru Nkomatanyamyuga (IPRC) 8 ari na yo agize Ishuri Rikuru ry’Imyuga n’Ubumenyingiro (Rwanda Polytechnic/RP).

Hashinzwe amashuri yihariye atanga inyigisho zitatangwaga mu Rwanda ari yo “Africa Digital Multimedia Academy” ryigisha ibijyanye n’ikoranabuhanga mu isakazamakuru, “Nyundo Music School” ryigisha umuziki w’umwuga, “Rwanda Coding Academy” ryigisha abana bato ikoranabuhanga rihambaye (software engineering, embedded systems & cyber security) na “Sports Academies” zigisha siporo n’indi mikino ngororamubiri hirya no hino mu Gihugu.

Abanyeshuri barangije kwiga bakora ibizamini bya Leta bagahabwa impamyabumenyi ku buryo kuva mu mwaka wa 2010 kugera mu 2018, abarenga 80,000 bamaze kugera ku isoko ry’umurimo nyuma yo gutsinda ibizamini bya Leta bagashyikirizwa impamyabumenyi za bo.

Mu rwego rwo gukora integanyanyigisho zijyanye n’ibikenewe ku isoko ry’umurimo, hakozwe integanyanyigisho 147 kandi ziracyakomeza kwiyongera zikajyana n’imfashanyigisho z’abarimu n’abanyeshuri.

Kuri ubu hamaze guhugurwa ibihumbi by’Abanyarwanda mu bijyanye n’imyuga nb’ubumenyi ngiro, barimo abarenga 2000 barokotse Jenoside yakorewe Abatutsi batishoboye.

WDA igira uruhare mu Ishyirwaho rya gahunda zitandukanye z’amasomo yigishwa muri za TVET, gutegura integanyanyigisho ijyanye n’igihe no guharanira kugera ku rwego rukenewe.

Hakozwe igenzura ry’ibikenewe ku isoko ry’umurimo mu Rwanda no ku rwego mpuzamahanga, hagamijwe gushyiraho ibyafasha Igihugu kugera ku iterambere rirambye.

Abarimu bigisha mu nzego zitandukanye bahawe amahugurwa, ndetse hahugurwa n’abakozi bakora mu nzego zinyuranye mu rwego rwo kubongerera ubumenyi bujyanye n’igihe.

Hashyizweho uburyo buhuriweho bwo gukora ibizamini biteguwe neza ku rwego rw’Igihugu, bikarangira abanyeshuri babonye impamabumenyi.

Hakozwe ubukangurambaga bugamije kurehereza abashoramari kwiyongera mu rwego rwa TVET no gushyigikira gahunda yo guhanga imirimo binyuze mu guteza imbere urwego rw’abikorera ku bufatanye n’inzego z’ubuyobozi zitandukanye.

Hari kandi gushyira amashuri y’imyuga n’ubumenyingiro mu byiciro hagamijwe gukoresha ibikenewe byose kugira ngo bigerweho.

Ubwitabire mu mashuri ya TVET burushaho kwiyongera uko umwaka utashye

Buri Murenge uzubakwamo ishuri rya TVET

Eng. Gatabazi yavuze ko Leta y’u Rwanda yafashe gahunda yo kongera amashuri y’imyuga n’ubumenyi ngiro akaba menshi bishoboka, ku buryo muri buri murenge mu mirenge 416 ibarizwa mu Gihugu haboneka ishuri ry’imyuga n’ubumenyingiro.

Yagize ati: “Hari ingamba zihari zo kugira ngo mu mirenge yose hubakweyo amashuri y’imyuga kandi tugende tugira amashuri atadukanye ajyanye n’umwihariko wa buri murenge. Twifuza ko abana benshi biga imyuga kubera ko no ku Isi yose n’ibihugu tubona bikomeye byagiye bishyira ingufu muri urwo rwego. Burya n’iyo uvuze iterambere ry’inganda ntaho ritanira no kwigisha imyuga”

Yavuze ko mu rugendo rw’iterambere rukomeje, WDA izakomeza gushyira imbaraga mu gukorana n’abikorera kuko imyuga n’ubumenyi ngiro birushaho kugira imbaraga iyo bishyigikiwe cyane n’urwego rw’abikorera.

WDA irasaba Abaturarwanda bose kubyaza umusaruro amahirwe yo kuba Igihugu gifite imiyoborere myiza kuko ifungura amarembo menshi y’iterambere ku baturge ndetse no ku Gihugu muri rusange.

Ishuri rikuru ryigisha coding riherereye mu Karere ka Nyabihu

Umwuga wo guteka uri mu myuga ikomeje gufasha urubyiruko gukirigita ifaranga

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.