19°C , Mostly cloudy | Kigali-Rwanda
Musoni Protais, Umuyobozi w’Ihuriro rigamije kwigenga kw’Afurika, ishami ry'u Rwanda, mu kiganiro n'Imvaho Nshya (Foto James R.)

Imyaka 100 y’ubukoroni bw’Afurika bwatumye isigara inyuma- Musoni

Yanditswe na MUGISHA BENIGNE

Ku ya 22-05-2018 saa 09:03:04

Umuyobozi w’Ihuriro ry’Umuryango w’Abanyafurika ku rwego rw’ u Rwanda, Musoni Protais, atangaza ko imyaka 100 y’ubukoroni bw’Afrika bwatumye isigara inyuma, ikaba  ikeneye gushyira hamwe kugira ngo itere imbere, bitaba ibyo igakomeza kuba inyuma.

Musoni Protais, Umuyobozi w’Ihuriro rigamije kwigenga kw’Afurika, ishami ry’u Rwanda, mu kiganiro n’Imvaho Nshya (Foto James R.)

Ibi yabigarutseho  mu gihe Afurika yitegura kwizihiza imyaka 55 yo kwibohora kwayo, umunsi watangiye kwizihizwa tariki ya 25 Gicurasi 1963,  ukazizihizwa ku nshuro ya 55  tariki ya 25 Gicurasi 2018.

Ati “Abanyafurika bagomba kwigobotora ubukoroni babayemo mu imyaka 100, bagashyira hamwe, bagakorera hamwe bakazahura uyu mugabane, bitaba ibyo bagakomeza gusigara inyuma”.

Musoni avuga ko mu Rwanda kwizihiza uyu munsi  bizabanzirizwa n’ibikorwa binyuranye kuva tariki ya 21 kugeza kuri 24 Gicurasi 2018, harimo kumurika ibikorerwa muri Afrika, hagaragazwe imyenda yakozwe n’abanyafurika, ibitabo byanditswe na bo ku mateka y’Afurika, ibyuma by’ubuhanzi by’umwimerere w’abanyafurika n’ibindi birimo inama mpuzamahanga  zivuga ku nzitizi  Afurika ihura na zo mu bucuruzi, mu  Itangazamakuru, mu buhanzi n’ubugeni,  mu ikoranabuhanga, no kumurika ibikorerwa muri Afurika.

Tariki ya 25  Gicurasi  hazaganirwa ku nzitizi mu bucuruzi bwa Afurika,  Itangazamakuru, ubuhanzi n’ubugeni, urwego rw’imiyoborere, gushyira hamwe kw’Afurika n’ibindi, bikazasozwa no gusangira amafunguro y’Abanyafurika,  byose biganisha ku gaciro k’Afurika.

Musoni avuga ko uyu munsi uzizihizwa mu bihugu byose by’Afurika, akaba ari mu rwego rwo gusubiza amaso inyuma no kureba uburyo Afurika yakwigobotora ubukoroni buyugarije mu isura nshya yabwo (Neocolonialisme).

Umuyobozi wa Panafrican Mouvment mu Rwanda, Musoni asanga Abantu   bakwiye kwemera gutakaza inyungu zabo bwite  bakarengera inyungu rusange z’Abanyafurika bose, ari nacyo kizatuma Afurika ishyira hamwe ikongera kwigira.

Igishimisha uyu muyobozi mu rugendo rwo kwibohora kw’Afurika, ngo ni uburyo ibihugu byashyize hamwe bigashaka ubwigenge bifatanyije.

Ikindi ngo n’imiryango ihuza Afurika igenda ikomera kandi igera ku ntego, akaba ari ikintu gikomeye mu kongerera ubumwe bw’abanyafurika hagati yabo.

Musoni asaba abahanzi b’Abanyarwanda guhanga mu muco w’Afurika, abakora amafilimi  bagaragaza  Abanyafurika nk’abantu bashoboye, dore ko ingero zifatika zihari, aho guhora bagaragazwa mu mafilimi y’abanyaburayi nk’abantu bahora  batsindwa kandi badashoboye.

Ati “ Akenshi iyo urebye amafilimi y’Abanyabarayi, bakunze kugaragaza umunyafurika nk’umuntu ukunze gutsindwa mu byo akoze byose, yaba ari iy’intambara, bakagaragaza ko umunyafurika ari we wapfuye n’ibindi bigaragaza ko nta bushobozi nabuke bifitemo”.

Asanga rero abahanzi b’Abanyafurika bakwiye guhindura iyo myimvire ifitwe n’abanyaburayi, bakajya bagaragaza Abanyafurika mu isura y’abantu bashoboye.

Musoni kandi atangaza ko muri Afrika hose uyu munsi  uzizihizwa ku nsanganyamatsiko y’ ikumirwa rya ruswa mu bihugu no kwihesha agaciro k’uyu mugabane.

Avuga kwizihiza uyu munsi mu bihugu byose by’Afurika  byaturutse muri wa muco mwiza abanyafurika basigaranye wo guhurira mu nama, bakaganira bakagira icyo bapfundika.

Asoza avuga ko Afurika nishyira hamwe izagera aho igatera imbere, agahamagarira Abanyafurika kumva neza ko ari bo bagomba guteza imbere  umugabane wabo.

 

TANGA IGITEKEREZO

Leave a Reply

Be the First to Comment!

avatar