17°C , Partly cloudy | Kigali-Rwanda
Aba ni bamwe mu bayobozi n’abayoboke b’imiryango ishingiye ku myemerere (insengero) basobanuriwe itegeko rireba abishyura umusoro

Impungenge ku musoro w’amaturo mu madini n’amatorero zavuyeho

Yanditswe na RUTAYISIRE EMILE

Ku ya 04-05-2019 saa 16:45:00

Bamwe mu bayobozi n’abayoboke b’imiryango ishingiye ku myemerere (insengero) basobanuriwe itegeko rireba abishyura umusoro ku nyungu banyurwa n’ibisobanuro bahawe kuko impungenge zo guca imisoro ku maturo zavugwaga atari byo ahubwo hagamije kunoza gukorera mu mucyo.

Ibi ni ibyavugiwe mu nama ngishwanama yabaye ejo hashize tariki 3 Gicurasi 2019 yahuje bamwe mu bayobozi n’abakozi bakorera imiryango ishingiye ku myemerere nk’amatorero n’amadini, abakozi b’Ikigo k’Igihugu k’Imisoro n’Amahoro, RRA n’abakozi b’Urwego rw’Igihugu rw’Imiyoborere (RGB) barebera hamwe uburyo itegeko ryashyirwa mu bikorwa neza kandi abo rireba baryumva neza.

Mu kiganiro cyatanzwe n’Uwayezu Victor umukozi muri RRA yasobanuriye abari aho ko itegeko rireba abishyura umusoro ku nyungu rigomba kubahirizwa na bo rireba bose barimo n’imiryango ishingiye ku myemerere ko ari ukugira ngo iyo miryango ige ikoresha neza umutungo ifite, igaragaze n’abantu ikorana na bo kugira ngo niba harimo abagomba gusora basore.

Uwayezu yagize ati: “Nta bwo icyo RRA igamije ari ukubakuramo amafaranga yishyuza amaturo, ahubwo muge mugaragaza umusaruro mufite, mugaragaze uko muwukoresha n’abo mukorana na bo kuko habamo n’ababaha impano na zo zigomba kumenyekana. Icyo tugomba kumvikanaho ni uko amafaranga azagaragara ko atakoreshejwe mu gihe cy’umwaka kandi nta bisobanuro afitiwe y’icyo yagenewe gukora muzajya muyasorera. Icyo dushaka ni impapuro zigaragaza uko amafaranga cyangwa umusaruro mwabonye wakoreshejwe. Muyakoreshe neza rero agere ku bo agenewe nibihwaniramo nta bwo muzasora.”

Yakomeje avuga ko niba hari ibindi bikorwa itorero cyangwa idini rifite byinjiza amafaranga ku ruhande byo bizajya bisora kuko ubucuruzi bwose bugomba gutanga umusoro.

Abari aho kandi bibukijwe ko kuzuza neza ibitabo by’ibaruramari ari ngombwa kandi bikajya bigerera igihe muri RRA, abatabyubahirije bagahanwa kuko itegeko ribiteganya nk’uko byashimangiwe na Nzayikorera Jonathan umukozi muri Minisiteri y’Imari avuga ko kuba itegeko ryaramaze kwemezwa igisigaye ari ukurishyira mu bikorwa. Yagarutse kandi ku buryo ibiganiro bigomba gukomeza kugira ngo itegeko ryumvikane neza.

Norman Paul Desire, uyobora Umuryango w’Ivugabutumwa, Christ for the Nations Ministries yashimye ibyavugiwe mu nama kuko yari igamije gusaba abayobozi y’imiryango ishingiye ku myemerere gukorera mu mucyo kandi ibyo biyemeje gukorera abayoboke babo n’abandi Banyarwanda muri rusange bikabageraho uko bikwiye.

Yagarutse ku kifuzo bafite agira ati: “Turifuza ko ibyo dusobanuriwe byagera no ku bashinzwe umutungo kubera ko ari bo bazajya bagaragaza uko umutungo ukoreshwa. Ndabivuga kuko hari uburyo RRA yateganyije bwo kwandika ibyakozwe byose hakoreshejwe ikoranabuhanga.

Ku bijyanye n’abibwiraga ko RRA ishaka kwishyuza amaturo atangwa mu madini n’insengero, Norman yagize ati: “Abari bafite iyo myumvire nta bwo ari byo ahubwo ni ukumenya aho amafaranga yavuye no kumenya icyo yakoreshejwe. Nk’abantu natwe duharanira kugira umusanzu wo kubaka igihugu ayo mafaranga tubona tugomba kuyagaragaza kandi tukayakoresha neza.”

Umuyobozi mu Rwego rw’Igihugu rw’Imiyoborere (RGB) ushinzwe Imitwe ya Politiki n’Imiryango itari iya Leta, Kangwagye Justus yashimye uburyo ibiganiro byagenze ashimira ubuyobozi bw’Urugaga ruhuza amahuriro y’Imiryango ishingiye ku myemerere, RIC, uburyo bukorana neza na RGB ndetse n’imyumvire myiza iranga abagize RIC.

Aba ni bamwe mu bayobozi n’abayoboke b’imiryango ishingiye ku myemerere (insengero) basobanuriwe itegeko rireba abishyura umusoro

TANGA IGITEKEREZO

Leave a Reply

Your email address will not be published. Required fields are marked *