17°C , Partly sunny | Kigali-Rwanda

Impuguke zihamya ko Afurika yatera imbere nk’andi mahanga

Yanditswe na SEZIBERA ANSELME

Ku ya 21-05-2018 saa 07:22:05

Impuguke zitandukanye mu by’ubukungu, Dr Kaberuka Teddy na Dr Bihira Canisius, zisanga bishoboka ko Umugabane w’Afurika watera imbere, bikaba bisaba uruhare rwa buri gihugu kugira ngo uwo mugabane ubashe kwihaza.

Ibi biratangazwa mu gihe habura iminsi mike ngo hizihizwe umunsi wo kwibohora kw’Afurika, uzaba ku wa 25 Gisurasi 2018.

Impuguke mu by’ubukungu Dr Kaberuka Teddy asanga buri gihugu cy’Afurika kigomba guhitamo politiki y’ubukungu bwacyo kugira ngo uyu mugabane ubashe kwihaza ureke guhora urambirije ku nkunga z’amahanga.

Yagize ati: “Birashoboka ko Afurika yatera imbere kuko n’amahanga tubona ubu yateye imbere yanyuze nk’aho Afurika iri kunyura. Harasabwa politiki z’ubukungu bwa buri gihugu, hari politiki y’igihe kigufi, ishingira ku bihari, hari ibikenewe ariko ibyo dufite tukabicunga neza.

Hari Politiki y’igihe kirekire yo yubakira ku byo ibihugu bifite. Urugero ntanga, hari ibihugu byiyemeje guteza imbere ubukerarugendo, amabuye y’agaciro na Peteroli, aho ni ho hagomba kubakirwa, gusa icya mbere gisabwa ni imiyoborere myiza no kurwanya ruswa”.

Dr Kaberuka atangaza ko mu bukungu mpuzamahanga haba ubucuruzi hagati y’ibihugu, akagaragaza ko iyo ubucuruzi budakorwa hagati y’ibihugu biri mu nzira y’amajyambere nta kwihaza gushoboka.

Atanga urugero ku bihugu by’Aziya agaragaza ko byateye imbere kuko byashyize imbere ubucuruzi butajya hanze y’uwo mugabane. Aha avuga ko u Bushinwa mu myaka 30 ishize bwateje imbere ubumenyi bw’abaturage bwabo ndetse n’inganda ari nayo nzira u Rwanda rurimo.

Dr Bihira Canisius, impuguke mu by’ubukungu n’imibereho myiza, ikagira impamyabushobozi y’ikirenga mu buganga bw’ubuzima bw’abantu (Sante Public) n’imbonezamirire (Nitrution), na PhD mu birebana no gucunga imishinga, kuri we asanga icyakorwa ari nacyo u Rwanda rwari rwagerageje gukora ari ugushyiraho icyangombwa rusange aho umuntu agiye ntiyake Viza.

Agira ati: “Amerika igira ibihugu birenze 40 ariko umuntu arazenguruka akinjiramo nta kintu na kimwe, nta viza bamusabye yinjira akora igikorwa ke cy’ubucuruzi, asura abantu nta kibazo afite. Icyo kintu cya Viza, k’impapuro kivanweho no muri Afurika ibihugu byaho bikumvikana ku kintu kirebana n’umutekano, igihugu kimwe cyaterwa ibindi bikagitabara, intambara z’urudaca zigakumirwa hari icyo byatanga”.

Yongeraho ko ibihugu by’Afurika bisohora amafaranga menshi mu kugura ibikoresho hanze kurusha amafaranga byinjiza kandi byari bikwiye ko habaho kuringaniza impande zombi, hakaba kudakoresha ubutaka neza Afurika ifite kandi bunera cyane, guhunika n’ibindi.

Afurika ni wo mugabane wa 3 mu migabane igize Isi ariko ukunze gutungwa n’inkunga zivuye ku yindi migabane kubera gusigara inyuma mu iterambere ndetse no kubura ubushobozi n’ubumenyi buhagije mu kubyaza amahirwe ubukungu ifite.

 

TANGA IGITEKEREZO

Leave a Reply

Your email address will not be published. Required fields are marked *