29°C , Partly sunny | Kigali-Rwanda

Impamvu Umuhanzi Humble Jizzo yinjiye mu bucuruzi bw’amazu n’ibibanza

Yanditswe na Gisubizo Gentil M.

Ku ya 11-08-2020 saa 09:54:38
Humble Jizzo asanzwe aririmba mu Itsinda rya Urban Boys ahuriyemo na Nizzo Kaboss (iburyo)

Manzi James uzwi mu muziki nka Humble Jizzo mu itsinda rya Urban Boys, muri iyi minsi uhugiye mu bijyanye n’ubucuruzi, ubu yatangije ubucuruzi bw’inzu n’ibibanza.

Uyu muhanzi yafunguye sosiyete yise “Tunga Real Estate” ikora ibijyanye no gufasha abantu kugura no kugurisha ibibanza n’inzu.

Mu kiganiro yagiranye n’Imvaho Nshya, Humble Jizzo yavuze ko iyi sosiyete yafunguye izagira akamaro kanini mu muryango nyarwanda kuko akenshi hari amakuru ajyanye n’ibyo agiye gukora abantu batamenyaga ariko we asanga agiye kubafasha kuyamenya kandi ku gihe.

Ati: “Wasangaga hari ahantu runaka hagurishwa ikibanza umukiriya akajyayo yavayo mu gihe yitegura kwishyura akamenya ko atari aho guturwa ahubwo hateganyirijwe izindi gahunda. Uretse kuba yataye igihe ajya kuhareba ariko aba anahomba amafaranga. Twe rero tuzajya dufasha abakiriya bacu ku buryo bagira amakuru ahagije ku hantu bagiye kugura.”

 

Tunga Real Estates  izajya ifasha abafite inzu cyangwa ibibanza kubashakira abakiriya ndetse babe banabahagararira mu gihe bumvikanye.

Humble Jizzo yavuze ko kugeza ubu bafasha abagura cyangwa abagurisha inzu n’ibibanza, biherereye ku Kimihurura ho mu Mujyi wa Kigali.

Humble Jizzo yinjiye mu bucuruzi bw’inzu n’ibibanza

Humble Jizzo na Nizzo baririmbana muri Urban Boys baheruka kumurika Urban Image, ikora ibijyanye no gufata amafoto n’amashusho mu birori bitandukanye cyangwa imihango inyuranye.

Mu bijyanye n’umuziki aba bagabo basanganywe studio ya Urban Record nubwo muri iyi minsi basa n’abashyize ku ruhande iby’umuziki bagashyira imbaraga cyane mu bucuruzi.

Humble Jizzo kugeza ubu ni umugabo wubatse, akaba yarashakanye n’Umunyamerikakazi Amy Blauman ndetse banafitanye umwana umwe w’umukobwa.

Humble yavuze ko Tunga Real Estate Ltd izaca akajagari mu bari basanzwe batanga serivisi zijyanye no guhuza ba nyiri amazu n’abakiriya

Umwanditsi:

Gisubizo Gentil M.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.