21°C , Partly sunny | Kigali-Rwanda
Minisitiri w'Ubutabera akaba n'Intumwa Nkuru ya Leta Johnston Businge mu kiganiro n'abanyamakuru. (Ifoto Mugisha Benigne)

Imitungo yasizwe na beneyo icungwa na Leta isaga igihumbi

Yanditswe na MUGISHA BENIGNE

Ku ya 12-10-2018 saa 10:34:14

Minisitiri w’Ubutabera akaba n’Intumwa Nkuru ya Leta, Johnston Busingye, atangaza ko imitungo yasizwe na beneyo ari 1166, igizwe n’inzu, imirima, inzuri, amashyamba n’ibindi.

Ni mu nama yagiranye na komite zishinzwe gucunga imitungo yasizwe na beneyo zikuriwe n’abayobozi bungirije b’uturere bashinzwe imari n’iterambere ry’ubukungu.

Yagize ati “Iyi mitungo igomba gucungwa neza kandi ikabyazwa umusaruro mu nyungu rusange n’iz’iterambere ry’igihugu.”

Avuga ko imitungo yasizwe na beneyo igomba kuragizwa bamwe mu bayituriye cyangwa mu bafitanye isano na bo, ariko uturere tugakurikirana ko abayihawe batayiyandikishaho.

Ati “Ndizera ko nta mitungo mwaragije abantu yaba yarinjiye mu manza biturutse ko bayiyandikishijeho, niba hari imanza zavutse mwatubwira tugakurikirana ikibazo kigakemuka.”

Yishimira iyi politiki y’igihugu yo gucunga imitungo yasizwe na beneyo kuko bituma nta muturage uyigabiza ngo ayigire iye ngo nyirayo nagaruke azasange ibye byarajyanywe n’abandi.

Mu kiganiro izi komite zahawe hagaragajwe ko umusaruro ukomoka ku mitungo yasizwe na beneyo usaga amafaranga miliyari 2 z’amafaranga y’u Rwanda.

Abayobozi b’uturere bungirije bagaragaje impungenge n’ibibazo bahura na byo mu micungire y’iyi mitungo, nko kutagira amakuru ahagije ku buryo bwo kuyibyaza umusaruro.

Murenzi Janvier, Umuyobozi w’Akarere ka Rubavu wungirije ushinzwe imari n’iterambere ry’ubukungu yagize ati “Kubona abo tuyiha ngo bayibyaze umusaruro kubabona ntibyoroshye kuko bitemewe gutanga amatangazo nk’aya cyamunara.”

Ikibazo cyo kubika amafaranga aturuka mu mitungo yasizwe na banyirayo agahabwa abo mu miryango yabo ngo iyabike biteye impungenge kuko abenshi bayakoresha ibindi.

Aha Minisitiri Busingye yasabye ko uwo mutungo washyirwa kuri konti z’uturere na two tukawucunga neza, uko abayobozi batwo bagenda basimburana.

Akarere ka Kicukiro kagaragaje ko mu mitungo gacunze harimo amazu ashaje cyane n’ibibanza, aho ayo mazu agereranywa n’ibibanza.

Abitabiriye inama basabwe ko amafaranga abyazwa imitungo idafite beneyo acungwa neza, agasanishwa inzu aho bibaye ngombwa asigaye akabikwa kuri konti z’uturere, akazahabwa banyirayo mu gihe bazaba baje kimwe n’imitungo basize.

Mu gihe haba haje umwana we cyangwa undi umukomokaho, ashobora guhabwa imitungo ngo ayicungire umubyeyi we, ariko ntiyemererwa kuyigurisha cyangwa ngo ahabwe amafaranga yayibyajewemo, ahabwa nyir’ubwite yiyiziye.

TANGA IGITEKEREZO

Leave a Reply

Your email address will not be published. Required fields are marked *