22°C , Mostly cloudy | Kigali-Rwanda
Munyakazi Isaac, Umunyabanga wa Leta muri Mineduc ushinzwe amashuri abanza n'ayisumbuye (iburyo) na Gasana Janvier, umuyobozi mukuru wa REB amurikira ubuyobozi ibyavuye mu bizamini bya Leta (Foto Gisubizo G.)

Imiterere y’amanota y’ibizamini bya Leta, mu mashuri abanza n’ikiciro rusange

Yanditswe na MUGISHA BENIGNE

Ku ya 10-01-2018 saa 07:30:29

Minisiteri y’Uburezi yashyize ahagaragara umusaruro wabonetse mu bizamini bya Leta bisoza amashuri abanza n’ikiciro rusange cy’amashuri yisumbuye, aho abanyeshuri bo mu mashuri abanza batsinze ku kigereranyo cya 86,3% naho mu kiciro rusange  abanyeshuri batsinda ku kigereranyo cya 89,9%.

Ashyira ahagaragara amanota y’ibizamini byakozwe mu mwaka w’amashuri wa 2017, Umunyamabanga wa Leta muri Minisiteri y’Uburezi ushinzwe amashuri abanza n’ayisumbuye, Munyakazi Isaac, yatangaje ko umwana wa Mbere mu gihugu mu bakoze ibizamini bya Leta bisoza amashuri abanza ari Mugisha Nsengiyumva Frank wo mu Karere ka Muhanga wiga mu ishuri ryitiriwe Mutagatifu Andereya mu gihe uwa mbere mu kiciro rusange ari Karenzi Manzi Joslyn wo mu Karere ka Gasabo, mu ishuri rya Kigali Parents School.

Munyakazi Isaac, Umunyabanga wa Leta muri Mineduc ushinzwe amashuri abanza n’ayisumbuye (iburyo) na Gasana Janvier, umuyobozi mukuru wa REB amurikira ubuyobozi ibyavuye mu bizamini bya Leta (Foto Gisubizo G.)

Yongeyeho  ko mu mashuri abanza abakobwa batsinze ku ijanisha rya 55,1%  naho abahungu bagatsinda ku ijaniisha rya 44.9%, ni mu gihe mu kiciro rusange cy’amashuri yisumbuye abakobwa batsinze ku ijanisha rya 55,5% naho abakobwa batsinda ku ijanisha 44,5%.

Yagiza ati “Mu mashuri abanza abahungu batsinze ku kigero kiri hejuru ugereranyije n’umwaka ushize naho mu kiciro rusange abakobwa ni bo batsinze neza kandi amashuri yo mu cyaro yaje ku isonga mu mitsindire.”

Imibare itangazwa n’Ikigo k’igihugu cy’uburezi (REB) igaragaza  ko mu kiciro cya mbere cy’amashuri yisumbuye abanyeshuri biyandikishije gukora ibizamini bya Leta mu mwaka wa 2017 ari  98 249  akaba ari benshi kurusha abiyandikije mu mwaka ushize wa 2016 bari 90 759.

Muri abo abakoze ibizamini bya Leta mu mwaka wa 2017 ni 96 595 naho mu mwaka wa 2016 abakoze ibizamini ni 89 421.

Abiyandikishije gukora ibizamini bisoza amashuri abanza mu mwaka wa 2017 ni 237 152 mu gihe abari biyandikishije mu mwaka wa 2016 bari 194 052.

Muri bo abakoze ibizamini bya Leta muri icyo kiciro mu mwaka wa 2017 ni 228 048 naho mu mwaka ushize wa 2016 abakoze ibizamini bari 187 139.

Ku bijyanye n’iyi mibare, Munyakazi yasobanuye ko muri uyu mwaka wa 2017 abakoze ibizamini ari benshi kurusha umwaka ushize wa 2016 bitewe n’ubushake bwa Leta bwo gushishikariza abaturage kujyana abana mu ishuri, n’imbaraga nyinshi Leta ishyiramo ifatanyije n’ababyeyi mu kubaka ibyumba by’amashuri abana bigiramo.

Ikindi Umunyamabanga wa Leta agarukaho, ni imyumvire y’ababyeyi yateye imbere ku bijyanye no kujyana abana mu ishuri no kwirinda kuribavanamo ngo babafashe imirimo, byatumye abana biga ari benshi ndetse banakora ibizamini ari benshi, bikanagaragazwa n’umubare w’abana b’abakobwa bakoze ibizamini bya Leta uruta uw’abahungu.

Ati “Mu bizamini bisoza amashuri abanza, abakobwa babikoze mu mwaka wa 2017 ni 125 606 naho abahungu bakaba 102 442, bivuze ko  umubare w’abakobwa ari munini kurusha uw’abahungu.”

Nyuma yo gutangaza amanota, Umunyamabanga wa Leta yavuze ko amashuri abanyeshuri bazigamo azatangazwa mu minsi itatu iri imbere, akaba yibutsa ababyeyi ko itangira ry’amashuri ari tariki ya 22 Mutarama 2017, bakazihutira kohereza abana badakererewe.

 

 

TANGA IGITEKEREZO

Leave a Reply

Be the First to Comment!

avatar