22°C , Mostly cloudy with thunderstorms | Kigali-Rwanda

Imitangire ya serivisi izaba iri kuri 85% mu mpera za 2018

Yanditswe na MUTUNGIREHE SAMUEL

Ku ya 05-02-2018 saa 07:30:43

Urwego rw’Igihugu rw’Imiyoborere (RGB) rutangaza ko igipimo k’imitangire ya serivisi mu Rwanda kizaba kiri kuri 85% mu mpera za 2018 kivuye kuri 65% mu mpera z’umwaka wa 2016 mu rwego rwo kwihutisha iterambere ry’igihugu.

Uwa kabiri uturutse iburyo ni Kalisa Edouard, umunyamabanga Nshingwabikorwa muri RGB, iburyo bwe ni Judith Kazaire na Sekanyange Jean Leonard ubanza iburyo (Foto Gentil G)

Umunyamabanga Nshingwabikorwa wa RGB, Kalisa Edouard, ubwo yatangizaga ibiganiro ku bukangurambaga bwo gushishikariza Imiryango ya Sosiyete Sivile (CSOs) gutanga Serivisi Nk’uwikorera, yavuze ko icyo gipimo kukigeraho bishoboka ariko mu bufatanye bwa buri wese.

Ati “Nta bintu bihambaye birimo; ni uguhindura imyumvire n’imikorere gusa, ni byo bikenewe kandi twizera ko ubwo bukangurambaga bukozwe na buri munyarwanda wese icyo gipimo cyageraho.”

Umunyamabanga nshwingwabikorwa wa RGB Kalisa Edouard ubanza ibumoso na Sekanyange Jean Leonard Umuyobozi w’Ihuriro rya Sosiyete Sivile mu biganiro ku bukangurambaga bwa Nk’uwikorera (Foto Gentil G)

Umuyobozi ushinzwe imitangire ya Serivisi inoze, imiyoborere myiza n’ibikorwa by’imiryango ikorera mu turere (JAF) muri RGB, Kazaire Judith, yavuze ko Serivisi yifuzwa gutangwa, uyitanga akwiye kuyitanga nk’aho yikorera kuko iyo umuntu yikorera atakwikorera ikintu kibi, yikorera ikiza buri gihe.

Ati “Imibare igaragaza ko iterambere ry’igihugu cyacu, [ku musaruro mbumbe w’imbere mu gihugu (GDP)] imitangire ya serivisi ihagaze kuri 48%; bivuze ngo mu by’ukuri niba ari yo iri ku isonga murumva izindi nzego aho ziri ariko biratugaragariza ko muri politiki yacu y’ubukungu barimo barayibandaho cyane, ni ngombwa ko ibyo dukoze byose tubikorana ubushishozi, tukabikora mu buryo bunoze kugira ngo dukomeze mu iterambere ry’igihugu.”

Sekanyange Jean Leonard uyobora urugaga rw’imiryango ya Sosiyete Sivile, yavuze ko abantu bakwiye kugira umuco mwiza wo gutanga serivisi nziza, bakamenya uko bafata ubagana.

Ati “Niba ushinzwe kwakira umuntu akugana ugomba kuba usobanutse, umeze neza. Kuko nge niba nje nkugana nje kukwaka serivisi ngasanga ugaragara nk’udasobanutse utazi icyo ukora, nkugiraho ikibazo.

N’abashinzwe kwakira abantu mu biro byacu tugomba kubashyiraho, kuko ahenshi nta bo uhasanga, ariko ni byiza ko uje agana imiryango yacu yakirwa neza bakamwerekeza aho akeneye hose, niba ashaka umukozi runaka ku byumba hakaba hari ibimenyetso bihagaragaza ibyo ashinzwe ku buryo nza ntibingore gushaka unkemurira ikibazo.”

Businge Antony uyobora AJIPRODO yagize ati “Nabonye ari inama nziza kandi iduha ikerekezo kiza kugira ngo tujyane na Leta mu kerekezo ishyize imbere, bifasha umuturage, biteze imbere igihugu kandi twasabye ko twajya duhura kenshi bakanadusuzuma bakareba uko serivisi zitangwa.”

TANGA IGITEKEREZO

Leave a Reply

Be the First to Comment!

avatar