23°C , Mostly cloudy | Kigali-Rwanda

Imishinga 10 yatoranyijwe izakurwamo 3 izahembwa na ‘Imbuto Foundation’

Yanditswe na Mugisha Benigne

Ku ya 07-11-2019 saa 16:31:39
Nizibyose Jean Confident waje ku mwanya wa mbere mu icumi batoranyijwe

Imishinga 10 ni yo yatoranyijwe muri 40 yari yatsinze amarushanwa muri gahunda umuryango ‘Imbuto Foundation’ ifatanyamo n’izindi nzego mu gushaka igisubizo k’inda zitateganyijwe ziterwa abangavu.

Gutoranya imishinga byabaye ku bufatanye bwa ‘Imbuto Foundation’, Minisiteri y’Urubyiruko n’Umuco, Ikigo cy’Abanyakoreya gitsura amajyambere mpuzamahanga ndetse n’Ishami ry’Umuryango w’Abibumbye ryita ku bwiyongere bw’abaturage.

Nk’uko bisobanurwa n’Umuyobozi w’ishami rishinzwe urubyiruko mu Imbuto Foundation, Murenzi Joel, gutoranya imishinga 10 muri 40 yari ihari bitari byoroshye, hakaba haragendewe ku bintu bitatu birimo umwimerere w’umushinga umwana azanye niba uzabasha gukemura ikibazo gihari, agashya kawo ndetse n’uburyo uzakoreshwa, kureba niba igisubuzo yerekanye  kizakoreshwa mu buryo bworoshye no kureba niba uwakoze umushinga yarawubakiye ku bushakashatsi.

Murenzi avuga ko nyuma yo gutoranya imishinga 10, abayikoze bagiye guhabwa amahugurwa n’umwiherero kugira ngo babashe kunoza imishinga yabo hashingiwe ku makuru nyayo bazaba bahawe kuko wasangaga hari ibyo bavuga bigaragaza ko badafite amakuru ahagije.

Ati “Ikigiye gukurikiraho ni ukubaha amahugurwa mu rwego rwo kunoza neza imishinga yabo ahanini hashingiwe ku makuru nyayo kandi yizewe kugira ngo babashe kuzahatanira imyanya itatu izatoranywa muri iyi mishinga 10.”

Murenzi avuga ko amahugurwa azakurikirwa n’andi marushanwa yo gutoranya imishinga 3 ihiga indi, ari nayo izahabwa inkunga y’amadorari 10 000 y’Amerika kuri buri wese.

Uyu muyobozi avuga ko muri 2017 hari amarushanwa yandi yateguwe na ‘Imbuto Foundation’, imishinga yayegukanye yahawe ibihembo ndetse ngo imaze gutanga umusaruro mwiza, ariko nanone ngo bakomeje gushyigikirwa.

Atanga urugero rw’umushinga Tantine wahembwe mu mwaka wa 2017, avuga ko washyizeho urubuga rutanga amakuru ku bijyanye n’ubuzima bw’imyororokere, rushobora gusurwa n’abantu 1000 ku munsi bashakaho ayo makuru, hari n’abandi bahawe ibihembo icyo gihe ariko bagize imbogamizi zo mu buryo bw’amategeko ariko ngo baragenda bafashwa kuzirenga kugira ngo babashe gushyira mu bikorwa imishinga yabo.

Nizibyose Jean Confident Irénée ni we wafashe umwanya wa mbere mu bahize abandi, avuga ko afite igihangano cyo mu buryo bw’ikoranabuhanga kitwa “Sobanukirwa App”, ikazafasha abantu bose bafite terefoni bazajya babona ubutumwa bujyanye n’ubuzima bw’imyororokere binyuze muri video n’amajwi.

Avuga ko uyu mushinga watsinze ku ikubitiro agiye gukora ibishoboka kugira ngo uzatoranywe no mu kindi kiciro bityo uzahabwe inkunga yateganyirijwe iyi mishinga ngo azabone uko awushyira mu bikorwa.

Avuga ko umushinga nutangira gushyirwa mu bikorwa hazaba harimo abashinzwe kugurisha impapuro abantu bazajya bafatiraho ayo mafirime ku buryo ngo buri karere bazaba bafitemo ucuruza izi mpapuro.

Ati “Nabonye ibiganiro bishobora kuba binyura kuri radiyo ariko abantu bari mu mirimo batayumva, nsanga gukoresha terefoni ngendanwa ari byo byatuma abantu benshi babona ayo makuru, yaba uri i Kigali kimwe n’uri mu karere ka Rutsiro cyangwa Rusizi.”

Dushime Kagina Azza, afatanya n’abandi mu itsinda ryitwa ‘Good Life Team’, bakazajya bakora ibifuniko by’amakayi y’abanyeshuri, bikazaba biriho ubutumwa buvuga ku buzima bw’imyororokere, bityo bikazagera ku rubyiruko rwiga kuko ruzaba rukoresha ayo makayi, kandi ngo n’urutiga ruzabigezwaho n’urwiga ndetse n’ababyeyi babo ubu butumwa bubagereho.

Avuga ko uyu mushinga bawutekereje nyuma yo kubona ko abana bato biga amashuri abanza n’ayisumbuye ari na bo bakoresha amakayi ko bakunze guhura n’ibibazo byo gutwara inda zitateganyijwe, aho byagaragaye ko kubona ibyo bifuniko by’amakaye bizabafasha no kubona ubutumwa n’amakuru ajyanye n’ubuzima bw’imyororokere.

Ati “Umushinga wacu dusanga uzadufasha kugabanya ikibazo k’inda zitateganyijwe mu rubyiruko kuko dusanga kutagira amakuru ku bangavu n’ingimbi ari byo bituma batwara inda zitateganyijwe.”

Imishinga yakozwe yari 700, hatoranywamo 40 igaragaza ireme ari nayo yitabiriye amarushanwa, muri 40 hatoranywamo 10 ihiga indi, nyuma yaho hakazatoranywamo 3 ihiga indi ari nayo igomba guhembwa.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.