16°C , Partly cloudy | Kigali-Rwanda

Imisanzu ya RSSB n’imisoro ku mushahara byatangiye kumenyekanishirizwa hamwe

Yanditswe na Amani Claude

Ku ya Jul 23, 2018 saa 10:08

Abakoresha n’abasora bamenyekanisha imisoro ku mushahara baruhuriwe gusiragira bajya kwishyura imisanzu itandukanye y’Ikigo cy’Ubwiteganyirize mu Rwanda (RSSB), binyuze mu ikoranabuhanga ryayihuje na serivisi yo kwishyura imisoro ku bihembo by’abakozi mu Ikigo cy’Imisoro n’amahoro (RRA).

Gatera Jonathan, Umuyobozi Mukuru wa RSSB ari kumwe na Komiseri Mukuru wungirije wa RRA Ruganitwali Bizimana Pascal mu kiganiro n’abanyamakuru

Ubu buryo bukomatanya serivisi z’ibigo byombi buboneka ku rubuga rwa RRA www.rra.gov.rw bukaba buhuza serivisi yo kumenyekanisha imisoro ku bihembo by’abakozi (PAYE/TPR), imisanzu y’ubwiteganyirize bw’izabukuru n’ibyago bikomoka ku kazi (Pansion and Occupational Hazards), ubwishingizi bw’indwara (Medical/RAMA) n’imisanzu y’ubwishingizi bw’ikiruhuko cy’umubyeyi (Maternity Leave).

Iri koranabuhanga ryiswe Imenyekanisha Rikomatanyije (Unified Declaration) rikozwe ku buryo ritemerera usora kumenyekanisha imisoro ku bihembo by’abakozi atabanje kugaragaza ko yatangiye abakozi imisanzu ikenewe kandi ntashobora no kumenyekanisha iyo misanzu gusa atamenyekanishije n’imisoro asabwa.

Ntacyo buhindura ku buryo bwo kwishyura kuko buri menyekanisha rigaragaza inyandiko iriho nimero wakwishyuriraho haba kuri banki cyangwa ukoresheje internet.

Mu kiganiro n’abanyamakuru, Umuyobozi Mukuru wa RSSB Gatera Jonathan yavuze ko ubu buryo bwatangiye korohereza abakoresha kuko ari bo bakiriya bakunze gukenera izi serivisi z’ibigo byombi bishyurira abakozi imisoro n’imisanzu ya RSSB.

Bamwe mu bakozi b’ibigo byombi bakurikiranye igeragezwa ry’Imenyekanisha rikomatanyije bishimira ko ryakoze neza mu gihe k’igeragezwa

Yagize ati “Ni uburyo bwo koroshya gukora ubucuruzi (doing business) kuko niba umuntu yasiragiraga mu kumenyekanisha no kwishyura imisoro n’ibisanzu ya RSSB, bizajya byorohera umukoresha. Ibigo byahuje serivisi kubera ko n’ubundi abakiriya bacu ni bamwe.”

Komiseri Mukuru Wungirije wa RRA Ruganintwali Bizimana Pascal, na we yagize ati “Umukoresha agiye kujya amenyekanisha inshuro imwe (asangeho serivisi z’ibigo byombi) ndetse anishyure akoresheje ikoranabuhanga atarinze kuzuza inshuro nyinshi.”

Yakomeje ashimangira ko bizeye neza ubu buryo bwatangiye kugeragezwa guhera mu mwaka wa 2016, bukaba bumaze kuyobokwa n’abakoresha 804 bose bishimira ko bagabanyirijwe umutwaro wo gusiragira kuri serivisi bagakwiye kubonera rimwe.

Abataratangira gukoresha iri koranabuhanga barashishikarizwa kuriyoboka kuko rizabagabanyiriza n’amafaranga batakazaga mu ngendo.

Ruganitwali yakomeje agira ati “Iyo tureba abakeneye gukoresha ubwo buryo ni abantu 11, 811; ujanishije ni hafi 6.9%… Turasaba n’abandi kwitabira kuko bizagabanya n’ikiguzi cy’ingendo, aho ikintu umuntu yakoraga inshuro umunani agiye kujya agikora inshuro imwe.”

RSSB na RRA byatangiye guhuza imikoranire mu mwaka wa 2012 ubwo byasinyanaga amasezerano. Hakurikiyeho igikorwa cyo guhuza nomero y’usora n’iya RSSB igaragaza utanga umusanzu, bikemura ikibazo cy’abishyuraga imisanzu y’ubwiteganyirize n’iy’ubwishingizi ariko ntibishyure imisoro cyangwa bakishyura imisoro gusa.

Kuri ubu mu turere dutandukanye abakozi ba RRA bicarana n’abakozi ba RSSB, uje gushaka serivisi akabasanga hamwe. Ikindi na none bahuje imbaraga mu gukoresha ikoranabuhanga rigezweho, ari na ryo ryakomatanyijwe mu guharanira ko abakiriya bakenera serivisi zo mu bigo byombi bakomeza koroherwa no kwiteganyiriza banishyura imisoro igira uruhare mu iterambere ry’Igihugu.