22°C , Mostly cloudy | Kigali-Rwanda
Bamwe mu bagize imiryango ya sosiyete sivile ikorera mu Rwanda, mu biganiro n'Urwego rw'Igihugu rw'Imiyoborere (RGB) byo kurushaho guteza imbere gutanga serivisi nziza nk'uwikorera

Imiryango ya Sosiyete Sivile igiye kumurika ibyo ikorera abaturage

Yanditswe na MUTUNGIREHE SAMUEL

Ku ya 06-02-2018 saa 08:16:13

Imiryango itegamiye kuri Leta na sosiyete sivile bikorera ku butaka bw’u Rwanda bigiye gukora imurikagurisha ry’iminsi ibiri, rizabafasha kurushaho kumenyekanisha mu baturage ibyo ibakorera no guteza imbere ubufatanye bwayo n’inzego za Leta.

Bamwe mu bagize imiryango ya sosiyete sivile ikorera mu Rwanda, mu biganiro n’Urwego rw’Igihugu rw’Imiyoborere (RGB) byo kurushaho guteza imbere gutanga serivisi nziza nk’uwikorera

Umuyobozi mukuru w’Urugaga rw’Imiryango ya sosiyete sivile mu Rwanda, Sekanyange Jean Leonard, asonabura ko iryo murikabikorwa rizaba tariki ya Mbere n’iya Kabiri Werurwe 2018, rikazaba rikubiyemo gusura ibikorwa iyo miryango ifite hirya no hino mu Rwanda bifasha abaturage no kumurika ibyo bakora.

Ati “Ni iminsi itanu, hazaba harimo iminsi itatu yo kujya aho ibikorwa biri, tureba ibikorwa dukora noneho mu ninsi ya nyuma hakaba imurikabikorwa (Exhibition) turimo gutegura n’ikigo gishinzwe gutegura imurikagurisha no kwamamaza (APEX).

Iryo murikabikorwa tuzakora, turasaba buri wese wumva yifuza kumenyekanisha ibikorwa ko ari amahirwe tubonye kugira ngo tugaragaze ibyo dukora abandi babimenye; baze barebe niba hari imiryango yacu iboha agaseke, ifite ibindi ikora, ni amahirwe yo kugira ngo baze babigaragaze.”

Umuyobozi mukuru w’ikigo ‘APEX Media & Promotion’, Kabagambe Ignatius avuga ko muri iyo minsi hazatangwa n’amahugurwa ku bintu bitandukanye imiryango itegamiye kuri Leta ikora, hibandwa ku bikiri imbogamizi mu guteza imbere abaturage uko byakabaye bikorwa bikagaragarizwa ubuyobozi mu nzego za Leta, abaterankunga n’abandi bafatanyabikorwa batandukanye.

Umuyobozi ushinzwe imitangire ya serivisi inoza imiyoborere myiza n’ibikorwa by’imiryango ikorera mu turere, mu Rwego rw’Igihugu rw’Imiyoborere (RGB), Kazaire Judith, asaba iyo miryango kurushaho gutanga serivisi nziza ku baturage n’abandi bayigana, bakabikora nk’uko bumva undi muntu yabakorera ibyo bifuza bikihutisha iterambere.

Biteganyijwe ko imiryango itegamiye kuri Letaya  Sosiyete sivile igera ku 100 ari yo izitabira kumurika ibikorwa byabo muri iryo murikabikorwa rizitabirwa n’abagera ku bihumbi 400 muri iyo minsi ibiri.

Mu bindi bikorwa iyo miryango ivuga ikora birimo no gutegura amarushanwa yo gusoma, aho muri iki iyi minsi binyuze mu mushinga witwa “Andika Rwanda” bari kujya mu bigo by’amashuri bagashishikariza abana kwandika Ikinyarwanda no kukivuga neza, bigasozwa no guhemba abarushije abandi.

TANGA IGITEKEREZO

Leave a Reply

Be the First to Comment!

avatar