22°C , Mostly cloudy | Kigali-Rwanda

Imirire iboneye: Intungamubiri ziboneka mu bitunguru

Yanditswe na Tumukunde Georgine

Ku ya 14-01-2020 saa 09:54:09
Ibitunguru

Ibitunguru bikunze gukoreshwa nk’indyoshyandyo, ariko si wo mumaro wabyo ukomeye ahubwo bikungahaye ku ntungamubiri. Birimo amoko atandukanye hari ibitukura, ibijya gusa nk’umuhondo n’umweru.

Bibonekamo vitamini C, B, A na E, imyunyu ngugu  irimo  feri, manganese, manyeziyumu, karisiyumu, potasiyumu. Ibijya gusa n’umuhondo bibonekamo cyane vitamini C. Igitunguru kiringaniye gitanga 13% bya vitamini C iba ikenewe ku munsi.

Izo ntungamubiri bifite ni zo zituma bigira uruhare runini mu gusukura umubiri, bikarwanya kanseri y’inkondo y’umura, udusabo tw’intanga ngore, iy’igifu, iy’igicamakoma n’iy’udusabo tw’intanga ngabo.

Bigira uruhare mu kubungabunga uturemangingo, bigatuma uruhu rumera neza, bikabungabunga imitsi bikayirinda kugira ibinure byinshi bishobora kugera aho bikiremamo  utubumbe dushobora kuyifunga.  Bifasha amaraso gutembera neza ndetse bikanakumira ikibazo cyo kubura amaraso.

Ibitunguru bikungahaye no ku tudodododo dufasha mu igogorwa ry’ibiryo ndetse bikagira n’uruhare mu mikorere myiza y’amara n’ iy’impyiko.

Bifasha abarwaye indwara z’umuvuduko w’amaraso bikanakumira indwara ya gute (goutte), byorohereza abafite indwara ya asima, abarwaye inkorora n’ibicurane, bikanoroshya ahari uburibwe ku mubiri. Binagira uruhare ku mikorere myiza y’ubwonko, bikabungabunga n’amaso.

Bigirira akamaro n’abagore batwite kuko bifasha mu gukura neza k’urusoro mu byumweru bya mbere byo gutwita. Abashaka kugabanya umubyibuho n’ibiro  bishobora kunganira amafunguro bafata. Abahanga bavuga ko birinda  amagufa y’abageze mu gihe cyo gucura imbyaro ntatakaze ubushobozi vuba vuba.

Ni byiza kubirya kenshi kandi mu buryo bunyuranye atari ukubirya bitetse gusa ahubwo bikanaribwa ari bibisi kugira ngo umubiri ubashe kuvomamo intungamubiri. Hifashishijwe inyandiko zitandukanye zirimo n’urubuga amelioretasante.com

Umwanditsi:

Tumukunde Georgine

Tanga Igitekerezo

Email yanyu ntigaragazwa ku rubuga. Amazina na Email ni ngombwa.