19°C , Mostly cloudy | Kigali-Rwanda

Imirimo yo kuvugurura Sitade Amahoro   izatangira mu Kuboza 2020

Yanditswe na BUGINGO FIDELE

Ku ya 19-09-2020 saa 21:54:26
Kuvugura Sitade Amahoro biri mu mushinga mugari wo kubaka icyanya cyahariwe imikino i Remera

Minisitiri wa Siporo, Munyangaju Aurore Mimosa atangaza ko  bidahindutse imirimo yo kuvugurura no kwagura Sitade Amahoro na  Sitade y’imikino y’intoki “Petit Stade” izatangira mu Kuboza 2020.

Muri Mutarama 2020, Minisiteri y’Ibikorwa Remezo “MININFRA” yatangaje ko  bafite gahunda yo kubaka ibikorwa  remezo by’imikino itandukanye i Remera harimo  no kuvugurura Sitade Amahoro, Sitade Nto  ikinirwamo imikino y’intoki ndetse n’ibindi bikorwa by’imikino inyuranye aho hari bimwe mu bikorwa remezo bihasanzwe bizimurwa.

Minisitiri wa Siporo, Munyangaju atangaza  ko imirimo yo kuvugurura izi Sitade zombi izatangira mu Kuboza 2020 kugira ngo umwaka utaha wa 2021 izabe yarasojwe. Yavuze ko Sitade Amahoro izavugururwa ikanongererwa ubushobozi aho izajya yakira abantu ibihumbi 45  bavuye kuri 25 naho Sitade Nto yo ikazajya yakira abantu ibihumbi 5 mu gihe isanzwe yakira 2500.

Imirimo yo kuvugurura no kwagura iyi Sitade Amahoro izatangira bitarenze mu Kuboza 2020

Yagize ati “ Kuvugurura  Sitade Amahoro, Sitade Nto ndetse n’inzu y’imikino y’abafite ubumuga  bizagendera hamwe.”

Agaruka ku bikorwa remezo bya Siporo, Minisitiri Munyangaju avuga ko hasanzwe  hari  izindi Sitade 3 mpuzamahanga zirimo  Sitade ya Kigali, Huye na Rubavu. Yavuze kandi ko hari n’izindi zubatswe i Ngoma, Bugesera na Nyagatare mu Ntara y’Iburasirazuba.

Minisitiri Munyangaju ati : “ Twasubukuye igenamigambi aho na Sitade ya Nyanza igomba kuvugururwa  tukaba twarayisuye ndetse n’imirimo yo kuyivurura  izatangira mu minsi ya vuba.”

Buri Karere karasabwa kugira ahantu hazwi hakorerwa siporo

Umunyamabanga Uhoraho muri Minisiteri ya Siporo, Shema Maboko Didier  atangaza ko nyuma yo kureba ibikene bakurikije n’uko igihugu kingana ndetse n’uko abaturage bangana basanga byibura buri Karere gakeneye ahantu abantu bakorera siporo hazwi “Community Sports Center”.

Ati : “Umushingwa twarawukoze, mu minsi yashize twakoranye inama n’abayobozi  bagiye gutegura igishushanyo mbonera tuganira nabo tureba  aho ibikorwa bya siporo byashyirwa.”

Akomeza avuga ko hari abafayabikorwa baganiriye nabo kugira ngo muri Kigali bazubake ibikorwa remezo bya siporo byajya bikoreshwa ndetse biri no ku rwego rwo kuba byakwakira amarushanwa atandukanye.

Minisitiri wa Siporo, Munyangaju avuga ko baganiriye na Minisiteri  y’Ubutegetsi bw’Igihugu ndetse n’umujyi  wa Kigali aho bifuza ko muri buri mudugugu abana n’ abakuru bitazajya bibasa kujya kure ngo  bakore  siporo. Akomeza  avuga ko mu bufatanye n’abikorera hari bamwe bamaze kuganira  kugira nabo bagire uruhare mu guteza imbere ibikorwa bya siporo aho  abantu batuye hirya no hino.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.