20°C , Mostly cloudy | Kigali-Rwanda

Imirenge 6 yo mu Ntara y’Amajyepfo yashyizwe muri Guma Mu Rugo

Yanditswe na Imvaho Nshya

Ku ya 06-04-2021 saa 16:25:00
Imirimo yo kubaka uruganda rwa Hakan yabaye ihagaze, hemerewe abazakora bacumbikirwa mu kigo nyuma yo gusuzumwa COVID-19

Minisiteri y’Ubutegetsi bw’igihugu (MINALOC) yatangaje ko Imirenge itandatu yo mu Turere twa Huye, Nyaruguru na Gisagara yashyizwe muri Guma Mu Rugo itangirana na Taliki 7 Mata 2021, nyuma y’ubwiyongere bukabije bw’abandura icyorezo cya COVID-19.

Imirenge yasubijwe muri Gahunda ya Guma mu Rugo ni uwa Ruhashya na Rwaniro yo mu Karere ka Huye, uwa Gikonko, Kansi na Mamba yo mu Karere ka Gisagara ndetse n’Umurenge wa Ruramba wo mu Karere ka Nyaruguru.

Ni nyuma y’aho mu minsi mike ishize hakomeje kugaragara ubwiyongere budasanzwe bw’abatahurwaho COVID-19 biganje mu Turere tw’Intara y’Amajyepfo. Ku  Cyumweru tariki 04 Mata 2021, mu Rwanda habonetse abrwayi bashya  239 bagizwe na 92% by’abaturuka muri iyo Ntara.

Kuri uwo munsi mu Karere ka Huye habonetse abarwayi 90, muri Gisagara haboneka  75, Ruhango 23 naho Nyaruguru haboneka 18. Ku mumunsi wakurikiyeho tariki 5 Mata, mu Karere ka Huye habonetse abarwayi 75, Gisagara 35, Ruhango 28, Nyamagabe 15 naho Nyaruguru haboneka 9.

Minisiteri y’Ubuzima yatangaje ko icyemezo cyo gushyira iyo Mirenge itandatu muri Gahunda ya Guma Mu Rugo byakozwe hashingiwe ku isesengura ryakozwe n’Inzego z’Ubuzima ku cyorezo cya COVID-19 mu Turere twa Huye, Gisagara na Nyaruguru.

Abatuye mu Mirenge yasubijwe muri Gahunda ya Guma Mu Rugo barasabwa kubahiriza amabwiriza ayigenga, umubare w’abacururiza mu masoko atandukanye ngo bagomba kugabanywa hagasigara abacuruza ibyo kurya gusa.

Muri iyo Mirenge, insengero zose zirafunzwe, icyakora mu Mirenge itashyizwe muri Gahunda ya Guma Mu Rugo yo mu Turere twa Gisagara, Huye na Nyaruguru, umunsi wo gusenga wagizwe umwe mu cyumweru aho kuba iminsi ibiri.

Imirimo yo kubaka Hakan Plant mu Karere ka Gisagara ibaye ihagaze, hazasigara hakora abakozi b’ingenzi babanje gupimwa icyorezo cya COVID-19 ndetse bakanacumbikirwa mu Kigo.

Inzego z’ibanze n’iz’umutekano zirasabwa gukurikirana ishyirwa mu bikorwa ry’aya mabwiriza, mu gihe n’Abanyarwanda bose basabwa gukomeza kubahiriza amabwiriza yo kwirinda Koronavirusi yatanzwe n’inzego z’ubuzima, no gutanga amakuru mu gihe hagize ugaragaza ibimenyetso.

Umuyobozi w’Ikigo cy’Igihugu cy’Ubuzima (RBC) Dr Nsanzimana Sabin, avuga ko bizasaba ko hashira iminsi kugira ngo iki cyorezo kigabanyuke muri utu duce, nk’uko byagenze i Rusizi, i Musanze n’i Kigali.

Agira ati “Ubu itsinda dufite mu Majyepfo barapima muri buri Kagari nibura abantu 50, tukamenya aho bikomeye, n’aho tugomba gushyira imbaraga, kuvuga ngo byaturutse he? Bikomeye kubisubiza, gusa ikigaragara ni uko muri turiya turere ibipimo bigaragaza ko hejuru ya 5% bafite uburwayi, mu gihe muri Kigali byari kuri 0.5%. Icyo twashoboye kubona ni ibikorwa bihuriramo abantu benshi nk’ubwubatsi kuko hari aho twasanze abantu 1,200 barimo kubaka, kandi banataha mu miryango, ku mugoroba bakagira utubari bahuriramo, ikindi ni amatsinda y’amasengesho turagenda tubibona.”

Dr Sabin avuga ko abantu bakwiye kugira ubutwari bwo guhangana n’icyorezo, agashimangira ko abantu bari mu bitaro bavurwa COVID-19 mu Mujyi wa Kigali, imibare yari itangiye kugabanyuka.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.