21°C , Partly sunny | Kigali-Rwanda

#COVID19: Iminsi 15 izatuma hatahurwa ubwandu bushya mu Rwanda

Yanditswe na NTAWITONDA JEAN CLAUDE

Ku ya 02-04-2020 saa 13:18:17

Minisiteri y’Ubuzima yatangaje ko iminsi 15 yongerewe ku gihe cyo  kuguma mu rugo no guhagarika ubuzima busanzwe hakorwa ibyangombwa cyane gusa, igamije gutahura abakekwaho ko banduye bataragaragaza ibimenyetso.

Mu kiganiro kuri Radiyo na Tereviziyo by’Igihugu, Minisitiri w’Ubuzima Dr.  Ngamije Daniel yashimangiye ko “mu minsi 15 bihaye abanduye bazaba bagaragaje ibimenyetso noneho bitabweho.”

Minisitiri Dr Ngamije yanashimangiye ko ingamba zo guhagarika urujya n’uruza rw’abaturage ziri gutanga umusaruro, ndetse imyumvire yabo ku bijyanye n’ububi bw’icyorezo ngo ikomeje kuzamuka.

Yagize ati: “ Gahunda ya #GumaMuRugo igitangira uko bayitabiriye mu minsi ya mbere si ko bikimeze, murabona ko abantu bagenda bagabanuka mu muhanda.”

Minisitiri w’Ubutegetsi bw’Igihugu Prof. Shyaka Anastase yongeyeho ko  mu byumweru bibiri bishize, abantu bubahirije ingamba zashyizweho gusa hakaba hari aho bitagenda neza.

Minisitiri w’Ubuzima Dr. Ngamije Daniel

Ati: “Isuzuma rirgaragaza ko tugifite guhangana n’iki cyorezo kuko ntabwo turagitsinda. Ubundi Abanyarwanda basanzwe bagira ibakwe mu kubahiriza ingamba na gahunda za Leta, turabona biri ku gipimo kiza muri rusange ariko hari aho tukibona ibyuho.”

Aha mbere yatangaje ni ni ahahurira abantu benshi, kuko izi ngamba zemera ko ahacururizwa ibiribwa no kumasoko hakora kugira ngo abantu babone ibitabunga, ariko ugashanga kubahiriza amabwiriza yo gusiga intera nini n’ayandi  haracyarimo icyuho.

Ikindi yagarutseho ni abakora ubucuruzi bwahagaritswe nk’utubari n’ubundi, bagakingirana abakiriya mu nzu; ashimangira ko ibyo bihanwa n’amategeko.

Yagarutse kuri rumwe ku rubyiruko usanga rutarabyumva neza rukaa rugifata ibi bihe nk’ibisanzwe.

Kugeza ubu mu Rwanda hagaragaye abantu 82 banduye COVID 19 bakomeje kwitabwaho n’abaganga, ndetse n’abandi barenga 1200 bakomeje gukurikiranwa nyuma yo kugaragara ko bafite aho bahuriye n’abanduye.

Muri Afurika yose abanduye bageze ku 6,473 na ho ku Isi yose hamaze kuboneka abarwayi 955,301, muri bo 203,011 bamaze gukira na ho abahitanywe n’iki cyorezo bakaba bageze ku 48,578.

Kurikira Ikiganiro cyose hano

Minisitiri w’Ubutegetsi bw’Igihugu, Prof. Shyaka Anastase

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.