25°C , Partly sunny | Kigali-Rwanda

Imikoreshereze y’ingengo y’imari ihabwa Umugenzuzi Mukuru w’Imari ya Leta

Yanditswe na KAYITARE JEAN PAUL

Ku ya 10-07-2020 saa 18:26:15
Umugenzuzi Mukuru w'Imari ya Leta, Obadiah Biraro

Umugenzuzi Mukuru w’Imari ya Leta, kimwe nk’izindi nzego za Leta agenerwa ingengo y’imari kandi akagira ubwigenge ku bo agenzura ko bakoresha neza imari ya Leta.

Ibi, Umugenzuzi Mukuru w’Imari ya Leta Obadiah Biraro, yabigarutseho mu mahugurwa y’umunsi umwe yari agenewe abanyamakuru kuri uyu wa Gatanu tariki 10 Nyakanga 2020.

Avuga ko ko habaho umucungamari mu gihugu ari umwe ari we Minisiteri y’Imari n’Igenamigambi, umugenzuzi w’imari icyo akora ni ukugenzura ko wakoreshejwe ibyo wagombaga gukoreshwa.

Ashimangira ko ingengo y’imari ayihabwa n’Inteko Ishinga Amategeko ariko Minisiteri y’Imari n’Igenamigambi igatanga ingengo y’imari iyihaye Inteko Ishingamategeko.

Ati: “Kubera ingengo y’imari dukoresha ibanza kunyura mu nteko kuko turi munsi yayo bituma dukorera mu bwigenge kandi ni na ko ibigo bigenzura imari ya Leta bikora ku Isi yose”.

Akomeza avuga ati “Habayeho ko bayatwima uretse ko ntabyo nari nabona, Inteko iragenda ikayasaba naho njye akazi kanjye ni ugukora ariko ntabyo narinabona”.

Ku rundi ruhande, Umugenzuzi Mukuru w’imari ya Leta, asobanura ko kwigenga bigaragarira mu mikorere ari byo aheraho avuga ko Itegeko Nshinga ryabashyizeho ngo bage bafasha abahabwa ingengo y’imari ya Leta gukora neza.

Biraro yagize ati: “Ntabwo wagira umuntu inama kandi umusaba inama ubwo bwigenge ni cyo buvuze, tugomba kwigenga kuri mwe kugira ngo tuzabafashe nkuko Itegeko Nshinga ribisaba”.

Umwaka wa 2019/2020, Umugenzuzi Mukuru w’imari ya Leta yabonye ingengo y’imari ya miriyari esheshatu.

Biraro agaragaza ko iyo idahagije bakabona ko hari igikorwa bashobora kunanirwa gukora, bajya mu Nteko, bakabwira Inteko impamvu igikorwa runaka kitazakorwa. Ati “Tugasaba ko bajya kutuvugira kandi turayabona”.

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.