22°C , Partly cloudy | Kigali-Rwanda
Minisitiri w'uburezi, Dr Mutimura Eugene (ku ruhande ibomoso), Ruzibiza Steven, umuyobozi wa PSF, Eng. Gatabazi Pascal umuyobozi mukuru wa WDA na Dr Tombola

Imikoranire ya kaminuza n’abakoresha izafasha kumenya ibikenewe ku isoko

Yanditswe na Mugisha Benigne

Ku ya 06-12-2018 saa 16:46:52

Inama yahuje abayobozi b’amashuri makuru n’abakoresha b’imirimo yashimangiye ko hagiye kubaho imikoranire y’izo nzego zombi kugira ngo bifashe mu bumenyi bw’imenyerezamwuga rikorwa n’abanyeshuri n’ubufatanye mu kwigisha ibikenewe ku isoko ry’umurimo.

Ibi ni ibyasobanuwe na Minisitiri w’Uburezi Dr. Mutimura Eugene, ubwo yafunguraga inama yateguwe n’Inama Nkuru y’Amashuri Makuru yahuje abayobozi ba za kaminuza n’abakoresha b’imirimo mu rwego rwo kurebera hamwe imikoranire iri hagati y’inzego zombi mu gufasha abanyeshuri mu imenyerezamwuga no gutanga ubumenyi bukenewe ku isoko ry’umurimo.

Yagize ati: “Inama yatumiwemo amashuri makuru na za kaminuza ndetse n’abikorera kugira ngo dushimangire imikoranire y’inzego zombi, cyane cyane ko abanyeshuri basoje kaminuza baracyasohoka badafite ubushobozi buhagije mu myuga n’ubumenyingiro, hakwiye kubaho uruhare rukomeye kugira ngo babone imenyerezamwuga mu bikorera kugira ngo bongere ubumenyi mu byo biga.”

Minisitiri w’Uburezi avuga ko politiki ya Leta ivuga ko abikorera n’inzego za Leta zishinzwe amashuri makuru na za kaminuza bafatanya ku buryo bunoza bityo abanyeshuri barangije kwiga ndetse banagire umwanya wo gushyira mu bikorwa ibyo bize.

Avuga ko iki gikorwa kandi cyagezweho ku bufatanye bwa Minisitieri y’abakozi ba Leta n’Umurimo mu gushimangira imikoranire y’inzego zombi kugira ngo abarangije kaminuza bagire ubushobozi buhagje.

Yagize at: “Mu minsi iri mbere tuzasaba ko hakorwa urutonde rw’uko za kaminuza zikurikirana mu bushobozi bw’imyigishirize, bityo za kaminuza zishyirirweho urwego ziriho mu bumenyi.”

Prof. Nyombayire Faustin, umuyobozi wa UTAB yavuze ko ihuriro rizafasha guhuza ibyigishwa muri kaminuza n’ibikenewe ku isoko ry’umurimo.

Avuga ko akenshi abafite imirimo badakunze kwishimira kwakira abanyeshuri bimenyereza umwuga, kuko usanga babifata nk’abaje kwangiza ibikoresho byabo cyangwa kubafata umwanya kandi bafite byinshi byo gukora.

Ati “Ariko na twe abayobozi ba za kaminuza hari imyumvire tugifite yo kumva ko abanyeshuri bagomba kujya kwimenyereza umwuga ari uko barangije, hari n’abakoresha banga kwakira abanyeshuri kuko bafite ibikoresho bihenze bagatinya ko byangizwa.”

Umukozi akaba n’umushakashatsi w’Ikigo gikwirakwiza amazi, isuku n’isukura (WASAC) Dr. Mushimiyimana Francois Xavier, avuga ko hakiri ikibazo cy’uko abanyeshuri boherezwa mu imenyerezamwuga baba badafite ubushobozi buhagije, ariko baba bafite ubumenyi buke.

Dr. Muvunyi Emmanuel, Umuyobozi w’Inama y’igihugu y’amashuri makuru (HEC) yagarutse ku nama yahuje abafite uruhare mu myigire y’abanyeshuri nka za kaminuza n’abashinzwe gutanga imenyerezamwuga, iyi nama irasozwa hafashwe umwanzuro w’imikoranire n’inzego zombi kugira ngo abanyeshuri bafashwe mu buryo buhagije ku mpande zombi.

Minisitiri w’uburezi, Dr Mutimura Eugene (ku ruhande ibomoso), Ruzibiza Steven, umuyobozi wa PSF, Eng. Gatabazi Pascal umuyobozi mukuru wa WDA na Dr Tombola

Umuyobozi mukuru wa HEC yagarutse ku isoko ry’umurimo n’ubumenyi burikeneweho, aho hari ubw’abasohoka bagera ku isoko ry’umurimo bagasanga ibyo bize ntibihuye neza n’isoko ry’umurimo.

Ati “Hari abasoza kaminuza ibyo bize bidahuye n’ibiri ku isoko ry’umurimo, akaba ari umukoro rero kuri za kaminuza n’amashuri makuru wo guhuza integanyanyigisho n’ibikenewe ku isoko ry’umurimo, ndetse n’abakoresha batanga imenyerezamwuga bagafasha mu kugaragaza ubumenyi bakeneye ku banyeshuri kugira ngo umusaruro ubashe kuba mwiza.”

Inama yasoje hemejwe ko Minisiteri y’Uburezi igiye gufasha gushyiraho ihuriro ry’abigisha abanyeshuri muri za kaminuza n’abakoresha kugira ngo ribafashe ku nama zinyuzanye zatuma uburezi burushaho gutera imbere.

TANGA IGITEKEREZO

Leave a Reply

Your email address will not be published. Required fields are marked *