19°C , Partly cloudy | Kigali-Rwanda

Imikino Olempike y’urubyiruko yagombaga kubera muri Senegal yimuriwe muri 2026

Yanditswe na BUGINGO FIDELE

Ku ya 15-07-2020 saa 18:38:18

Kuva muri 2010, Komite mpuzamahanga y’imikino Olempike “CIO” yatangiye gutegura imikino Olempike y’urubyiruko “Youth Olympic Games”. Iyi mikino iba buri myaka 4  ikaba imyaka 2 mbere y’imikino Olempike y’abakuru “Olympic Games”.

Nyuma y’imikino ya mbere yabereye muri Singapore (2010), mu Bushinwa (2014) ndetse no muri Argentine (2018), imikino itaha byari byemejwe ko izabera i Dakar muri 2022.

Kubera icyororezo cya Koronavirusi cyugarije Isi, amarushanwa amwe n’amwe yari ateganyijwe muri uyu mwaka wa 2020 yimuriwe umwaka utaha wa 2021 bituma  haba impinduka zitandukanye mu marushanwa ategurwa na  CIO.

Kuri uyu wa Gatatu tariki 15 Nyakanga 2020 CIO yemeje ko nyuma yo kumvikana n’igihugu cya Senegal, imikino Olempike y’urubyiruko  yagomba kuba muri 2022 yimuriwe muri 2026 ikazabera i Dakar muri Senegal nk’ibisanzwe.

Igihugu cy’u Bwongereza na Thailand  byari byarasabye kwakira iyi mikino muri 2026, ibi bihugu bishobora kuzatoranywamo ikizakira  iri  rushanwa muri 2030.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.