Imihanda izakoreshwa muri CHOGM izaba yuzuye muri Mata

Yanditswe na Rutayisire Emile

Ku ya 14-01-2020 saa 09:38:15
Uyu ni umuhanda uva ku Murindi werekaza Rusororo, kimwe n'indi urimo gukorwa mu rwego rwo kwakira Inama izahuza Ibihugu bivuga Icyongereza igiye kubera mu Rwanda (Foto Mucyo R)

Imihanda yose izakoreshwa mu mujyi wa Kigali mu rwego rwo kwakira Inama y’Ibihugu bikoresha Icyongereza bihuriye muri Commonwealth, izwi nka CHOGM, izaba yuzuye muri Mata nk’uko bitangazwa n’Umujyi wa Kigali. Ni mu gihe u Rwanda ruzakira iyi nama muri Kamena 2020.

Iyi mihanda ikaba ikorwa ku buryo yazifashishwa n’abakoresha imihanda muri Kigali, mu rwego rwo kugabanya umubyigano w’imodoka mu gihe izaba iba.

Umuyobozi wungirije w’Umujyi wa Kigali ushinzwe imiturire n’ibikorwa remezo, Nsabimana Ernest, avuga ko hari imihanda isanzwe hakaba hari n’indi mishya.

Mu kiganiro kihariye n’Imvaho Nshya, Nsabimana yagaragaje aho iyo mihanda igeze ikorwa. Ati «Mu mihanda mishya harimo: Rwandex ugaca ahitwa mu Myembe cyangwa Rwandex ugaca Kigali Convention Center. Uyu muhanda waruzuye. Hari umuhanda Gasabo District Office uca Airtel ugakomeza Sport View Hotel ugana Control Technique. Uyu ugeze kuri 35% ukorwa”.

Akomeza avuga ko umuhanda Nyabisindu uca Nyarutarama ugakomeza Green Hills ujya Kibagabaga ugeze kuri 30% ukorwa kandi ko umuhanda Kabeza ugana Alpha Palace uzatangira kubakwa muri kino cyumweru.  Hari kandi umuhanda Murindi unyura Rusororo ukaba ugeze kuri 20%.

Byamaze kwemezwa ko inama ya CHOGM izabera muri Kigali Convention Center

Umuyobozi wungirije w’Umujyi wa Kigali ushinzwe imiturire n’ibikorwa remezo akomeza avuga ko imirimo irimo kugenda neza, ariko ko bakomeje guhura n’imbogamizi zirimo imvura ndetse no kuriha ibyangizwa n’umuhanda (Expropriation).

Si ibikorwa byo kubaka imihanda gusa bishishikaje ubuyobozi bw’Umujyi wa Kigali kuko hari n’imirimo yo kwagura aho indege ziparikwa, kunoza isuku, amatara yo ku muhanda n’ibindi bizaba biyobora abaturage mu gukoresha umuhanda.

Ibindi bikorwa nk’amahoteri, resitora nabyo bikomeje gukorwa kubera ko mu Rwanda hazaba hari abayobozi baturutse hirya no hino ku Isi, bazaba bari mu murwa mukuru wa Kigali, guhera tariki 22 Kamena 2020, inama ikazamara iminsi ibiri.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.