18°C , Partly cloudy | Kigali-Rwanda
Gashugi Andre, Umuyobozi mukuru wa RNIT (Foto Gisubizo G)

Imigabane y’abizigamye mu kigega RNIT/Iterambere Fund yazamutseho 38% muri 2017

Yanditswe na MUTUNGIREHE SAMUEL

Ku ya 18-01-2018 saa 06:35:13

Imigabane y’Abanyarwanda batandukanye bashoye imari bagamije kuzigama mu kigega ‘RNIT Iterambere Fund’ imaze kuzamuka ku kigero cya 38%, ikaba igeze ku mafaranga y’u Rwanda miliyari 1 na miliyoni zisaga 400 mu myaka ibiri ishize icyo kigega gitangijwe.

Gashugi Andre, Umuyobozi mukuru wa RNIT (Foto Gisubizo G)

Raporo igaragaza uko imyaka ibiri ishize, kuva tariki ya 15 Ugushyingo 2016, Ikigega Iterambere Fund gifasha Abanyarwanda kuzigama bagamije ishoramari kugeza tariki ya 19 Ukuboza 2017, igaragaza ko imigabane y’abizigamye yavuye kuri miliyari imwe na miliyoni 58 igera kuri miliyari na miliyoni 459.

Umuyobozi mukuru w’Ikigo k’ibigega by’imigabane (RNIT), Gashugi André, asobanura ko izamuka nk’iryo ari umusaruro w’ubukangurambaga butandukanye bwagiye bukorwa kuva Leta yatangira gushyiraho icyo kigega mu buryo bwo gufasha mu bushobozi butandukanye bafite bakabasha kuzigamira ibihe biri imbere bagamije no kwiteza imbere.

Kuzamuka kw’imigabane y’abizigamiye ku kigega RNIT/Iterambere Fund bijyana n’izamuka ry’inyungu ku gaciro k’imigabane buri munsi, aho kugeza tariki ya 29 Ukuboza 2017 agaciro k’umugabane umwe kari kageze ku mafaranga y’u Rwanda 112,02 kavuye ku 100,9 mu Gushyingo 2016, bingana n’izamuka rya 12,02%.

Gashugi agira ati “Ugereranyije n’inyungu ziva mu bindi bitanga ubwizigame, nk’impapuro mvunjwafaranga, ku mafaranga abikijwe mu mabanki no ku isoko ry’imari n’imigabane, Ikigega RNIT/Iterambere ni cyo gitanga inyungu iri hejuru mu Rwanda.”

Mu buryo butandukanye, Ikigega RNIT/Iterambere Fund giha amahirwe buri munyarwanda aho ari hose mu gihugu no ku isi kwizigamira uko ashoboye kuva ku mafaranga y’u Rwanda 2 000 kugeza ku yo umuntu ashoboye.

Abizigamira kandi bahabwa amahirwe atandukanye yo kunyuzamo imigabane yabo haba ku bakorera umushahara bagatanga imigabane y’ubwizigame buri kwezi avuye kuri konti yabo, ku bishyize hamwe nk’ibimina, koperative n’ibigo by’imari bito n’ibiciriritse bakagura imigabane mu kigega.

Bamwe mu banyeshuri bateye intambwe yo gutangira kwizigamira bakiri ku ntebe y’ishuri batangaza ko impamvu zishobora gutuma abakiri bato batangira gutekereza ku muco wo kwizigamira zirimo no kureba ku hazaza habo mu gihe bazaba bakeneye igishoro cyo gutangiza ishoramari no kwihangira imirimo basoje amashuri.

TANGA IGITEKEREZO

Leave a Reply

Be the First to Comment!

avatar