21°C , Partly sunny | Kigali-Rwanda
Minisitiri Ndagijimana Uzziel (hagati), Madame Laure Redifer, uyoboye itsinda rya IMF riri mu Rwanda na Guverineri wa Banki Nkuru y'u Rwanda Rwangombwa John (Foto James R)

IMF yemeje ko ubukungu bw’u Rwanda buzazamukaho 7.2% mu 2018

Yanditswe na MUTUNGIREHE SAMUEL

Ku ya 03-10-2018 saa 07:34:36

Itsinda ry’abasesenguzi mu by’imari ku bihugu riturutse mu Kigega Mpuzamahanga k’Imari (IMF) rimaze igihe risuzuma ishyirwa mu bikorwa rya gahunda y’ubukungu bw’u Rwanda, ryemeje ko ubukungu bw’u Rwanda buzazamuka ku muvuduko wa 7.2% uyu mwaka nk’uko u Rwanda rwari rwarabiteganyije.

Minisitiri Ndagijimana Uzziel (hagati), Madame Laure Redifer, uyoboye itsinda rya IMF riri mu Rwanda na Guverineri wa Banki Nkuru y’u Rwanda Rwangombwa John (Foto James R)

Laure Redifer, uyoboye iryo tsinda rimaze ibyumweru bibiri mu Rwanda, guhera tariki ya 20 Nzeri kugeza tariki ya 1 Ukwakira 2018, mu kazi ko gusuzuma ibice byose by’ubukungu bw’u Rwanda, yavuze ko babonye ko ubukungu bwazamutse ku gipimo cya 8.6% mu mezi atandatu ya mbere y’umwaka 2018 kandi bitanga ikizere cyo kugera ku gipimo u Rwanda rwihaye mu mwaka wose.

Ati: “Twanzuye ko igipimo cyateganyijwe cya 7.2% kizagumaho uyu mwaka wa 2018.”

Laure Redifer yakomeje avuga ko mu bindi babonye birimo ko n’igipimo cyo guta agaciro k’ifaranga ku isoko kitazarenga ku gipimo cyo hasi cya 5.5% uyu mwaka.

Iri tsinda ryanasuzumye uko intego u Rwanda rwagendaga rwiha mu myaka itanu ishize zagenze, risanga zaragezweho neza zijyanye n’imicungire y’ubukungu bw’igihugu n’ikerekezo k’imyaka itatu, rigaragaza uko ubukungu bw’u Rwanda buzakomeza kuzamuka bushingiye ku nzego eshatu ari zo izamuka ry’ubukungu mu by’ubuhinzi, mu nganda na serivisi.

Basuzumye kandi uko ifaranga ry’u Rwanda ricunzwe, ubuhahirane n’amahanga, bareba icyuho kiri hagati y’ibyo u Rwanda rutumiza hanze n’ibyo rwoherezayo basanga na byo bihagaze neza.

Raporo y’izi ntumwa z’Ikigega IMF igaragaza ko gahunda u Rwanda rwihaye yo guteza imbere ibikorerwa mu Rwanda yagize akamaro, aho kugeza mu kwezi kwa Kanama 2018 ibyoherezwa hanze byazamutseho 17.9% mu gihe ibitumizwayo na byo byazamutse ku kigero gito cya 7.4%.

Minisitiri w’Imari n’igenamigambi, Dr. Uzziel Ndagijimana, yavuze ko kuri ibyo byose u Rwanda ruri mu kerekezo kiza. Yakomeje avuga ko izo ntumwa zizongera kugaruka mu Rwanda mu ntangiriro z’umwaka utaha 2019, kugira ngo baganire kuri gahunda zizakurikiraho; baherukaga mu Rwanda mu kwezi kwa gatatu.

Umwaka ushize ubukungu bw’u Rwanda bwazamutse ku gipimo cya 6.1%. Kuzamuka k’ubukungu ku muvuduko u Rwanda rwihaye bizatuma inganda zikomeza neza ibikorwa byazo, cyane mu bijyanye n’ubwubatsi.

 

TANGA IGITEKEREZO

Leave a Reply

Your email address will not be published. Required fields are marked *