18°C , Mostly cloudy | Kigali-Rwanda

Imbuto z’u Rwanda zitezweho kwigarurira amasoko y’Abarabu

Yanditswe na Imvaho Nshya

Ku ya 12-01-2021 saa 06:34:30
Imbuto z'u Rwanda zakiriwe neza ku Isoko ry'Abarabu

Birashoboka ko hari abaturarwanda bataramenya ibanga riri mu mboga n’imbuto byera mu Rwanda, ariko abanyamahanga bamaze kurivumbura ku buryo by’umwihariko imbuto zo mu Rwanda zoherejwe mu mahanga zihita zigarurira isoko ry’aho zoherejwe kuko ziba zigifite uburyohe bw’umwimerere, zifite amafu ndetse ari n’indobanure.

Uko iminsi ishira indi igataha ni ko ingano y’imbuto zoherezwa mu mahanga ikomeza kwiyongera, ndetse bikajyana n’uko iyo zigeze ku masoko atadukanye zirushaho gukundirwa uburyohe kamere zifitemo.

Ubuyobozi bw’Ikigo k’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi (NAEB) buvuga ko ubwiyongere bw’isoko ry’imbuto bukomeje kwiganza muri Leta Zunze Ubumwe z’Amerika (USA), u Bwongereza n’u Buholandi.

Kuri ubu u Rwanda rwabonye isoko ryagutse ry’imbuto mu bihugu bigize Leta Zunze Ubumwe z’Abarabu (UAE), na ho bikaba byitezwe ko nta kabuza zizakundwa nk’uko zikunzwe ahandi kubera uburyo zigera mu mahanga zigifite umwimerere wazo.

Nko mu cyumweru gishize, NAEB ivuga ko u Rwanda rwohereje imbuto zose zabonetse muri UAE no muri Repubulika Iharanira Demokarasi ya Congo (RDC), mu gihe imboga zoherejwe mu Bwongereza na RDC, indabo zikoherezwa mu Buholandi ndetse na Korea y’Epfo.

Umusaruro wose woherejwe mu mahanga ungana na toni zisaga 87 zinjije amafaranga y’u Rwanda miriyoni zikabakaba 263 (amadorari y’Amerika 263,707).

Isoko ry’imbuto zo mu Rwanda muri Leta Zunze Ubumwe z’Abarabu ryitezweho kwiyongera kimwe n’ahandi hose zoherezwa, kuko zakiranywe urugwiro mu mpera z’icyumweru gishize ubwo iza mbere zageraga mu masoko y’kigo cy’ubucuruzi kitwa Carrefour Hypermarkets LLC gifite isoko rinini ndetse n’amasoko ya Kijyambere (Supermarkets) akorera mu bice bitandukanye byo mu bihugu by’Abarabu.

U Rwanda rwatangiye koherereza iryo soko amatunda (passion fruits), imineke ya Kamaramasenge, inanasi ndetse n’avoka.

Ikigo Carrefour Hypermarkets LLC gikorera mu bice bisaga 30 mu Burasirazuba bwo Hagati, muri Afurika ndetse n’Asia, kikaba gifite ububiko burenga 320, aho cyakira abakiriya barenga 750,000 buri munsi. Muri ayo mashami harimo amasoko manini akorera i Dubai na Abu Dhabi, imijyi ikomeye muri Leta Zunze Ubumwe z’Abarabu.

Mu muhango wo gufungura ku mugaragaro ubwo bucuruzi bw’imbuto muri rimwe mu masoko manini ya UAE, Ambasaderi w’u Rwanda ufite ikicaro i Abu Dhabi Emmanuel Hategeka, yavuze ko biteguye kubona isoko ry’imbuto mu bihugu by’Abarabu rirushaho kwaguka.

Yagize ati: “Ubu ni ubufatanye bushimishije, akaba ari n’umusaruro w’ubufatanye bw’abahinzi nyarwanda batandukanye, Isosiyete ikora ubwikorezi bwo mu kirere RwandaAir, ndetse n’abaguzi bo muri UAE bazishimira kugura umusaruro w’imbuto ubageraho ukiri mushya kuko ingendo zikorwa buri gihe hagati ya Kigali na Dubai. Twiteguye kubona ubucuruzi bw’imbuto z’u Rwanda bwaguka kandi bugashinga imizi.”

Umuyobozi Mukuru wa NAEB Claude Bizimana, yongeyeho ko isoko rya Carrefour ari iryo kwishimira kuko u Rwanda rufite umusaruro uhagije w’imbuto z’umwimerere, anashimira icyo kigo cyagiriye ikizere u Rwanda ku bijyanye n’ubuhahirane bw’umusaruro utagira inenge.

Yagize ati: “Uyu munsi abohereza mu mahanga indabo, imboga n’imbuto bishimiye kugemura umusaruro unogeye abakiriya ku buryo buhoraho.”

Ubucuruzi bw’imbuto n’Isoko rikomeye ry’Abarabu rifatwa nk’intambwe ikomeye igeza u Rwanda ku ntego rwihaye yo kwinjiza nibura miriyoni 130 z’amadolari y’Amerika (miriyari zikabakaba 130 z’amafaranga) mu musaruro w’indabo, imboga n’imbuto bitarenze mu mwaka wa 2024.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.