20°C , Mostly clear | Kigali-Rwanda
Miss Rwanda 2019 Nimwiza Meghan n'ababyeyi be, nyuma yo gutangazwa ko ari we Miss Rwanda 2019

Imbamutima z’ababyeyi ba Miss Rwanda 2019 Nimwiza Meghan

Yanditswe na Ndamyirokoye François

Ku ya 28-01-2019 saa 15:14:16

Mu ijoro rishyira ku ya 27 Mutarama 2019 mu birori byabereye mu Intare Conference Arena i Rusororo mu bakobwa 15 bahataniraga ikamba rya Miss Rwanda 2019 uwitwa Nimwiza Meghan ni we waje kwegukana ikamba.

Gutsinda kwe kwabaye nyuma y’uko abakobwa bahatanaga bakoze imyiyereko inyuranye no mu buryo butandukanye hakurikiraho kubabaza ibibazo nyuma y’aho akanama nkemurampaka gafata umwanya wo kujya kureba uko baza gutanga amanota kagaruka basoma abakobwa 5 bari bahize abandi.

Abo bakobwa batanu yari Nimwiza Meghan, Uwase Sangwa Odile, Uwihirwe Yasip Casimir, Gaju Anita na Kabahenda Ricca Michaella.

Na bo nk’uko byagombaga kugenda babajijwe ibibazo gusa ubwo abantu batabonaga Mwiseneza Josiane muri batanu ba mbere nk’uko yari akunzwe cyane batangiye kwibaza byinshi gusa byari byamaze kugaragara ko yegukana ikamba rya Nyampinga wakunzwe cyane.

Ubwo abakobwa batanu basoje kubazwa, akanama nkemurampaka kongeye kujya gufata umwanya wo kwiherera bareba uko abakobwa basubije bagaruka batangaza Nyampinga wakunzwe cyane “Miss Popularity” ndetse n’ibisonga bya Nyampinga mbere y’uko we atangazwa.

Uwaje gutsindira kuba igisonga cya mbere ni Uwihirwe Yasipi Casimir naho igisonga cya kabiri ni Uwase Sangwa Odile mu gihe Mwiseneza Josiane ari we wabaye nyampinga wakunzwe cyane.

Nyuma y’uko Nimwiza Meghan yegukanye ikamba nyina Basime Betty yatangarije Imvaho Nshya ko ashima Imana kuko yahaye ikamba umwana we.

Yagize ati “Ndanezerewe nshimye Imana, numvaga ko ashobora kuba Miss cyangwa ntabe we kubera ko abari bahatanye na we na bo bari bashoboye”.

Ajya kwitabira iri rushanwa, nyina yatangaje ko Nimwiza yabimubwiye ko yumvise ko abakobwa barimo kwiyandikisha mu guhatanira ikamba rya Miss Rwanda arabikora.

Uyu mubyeyi avuga ko kandi umwana we nubwo yabaye icyamamare azakomeza kwitwara neza ngo kuko asanzwe ari umukirisito.

Ashimangira kandi ko muri ubwo buzima bw’ubwamamare azamuba hafi.

Yavuze kandi ko Nimwiza Meghan ari umwana w’imfura akaba akurikirwa n’abandi bana babiri.

Ruvebana Gaspard se wa Nyampinga w’u Rwanda 2019 Nimwiza Meghan yavuze ko yishimiye ko umukobwa we yegukanye ikamba.

Uyu mubyeyi yavuze ko kandi igikorwa cyo gutora nyampinga azi akamaro kacyo kuko n’ibindi bihugu bibikora akaba ari yo mpamvu n’u Rwanda rutigeze rusigara inyuma muri icyo gikorwa.

Yahaye inama abandi babyeyi ko badakwiye kujya babuza abana babo kwitabira iri rushanwa ngo kandi iyo Nimwiza adatwara ikamba nabwo bari kubyakira ngo kuko hari ibyo nabwo yari kuba yungukiyemo.

Nimwiza Meghan we yavuze ko yishimiye gutsindira iryo kamba n’ubwo atabyiyumvishaga kandi yashimiye bagenzi be babanye mu mwiherero ngo kuko babanaga neza.

Mu rwego rwo kugira ngo azakore ibyo yiyemeje yavuze ko kandi atazibagirwa gukorana na banyampinga bamubanjirije.

Iradukunda Liliane yasabye abantu gushyigikira Nyampinga Nimwiza Meghan nk’uko na we bamushyigikiye.

Ibihembo nyampinga azajya ahabwa harimo amafaranga ibihumbi 800 by’amafaranga y’u Rwanda buri kwezi mu gihe cy’umwaka kwitabwaho aho bakora amasuku y’abari n’ategarugore “Saloon” mu gihe cy’umwaka ndetse n’ibindi birimo imodoka ya Suzuki Swift.

Gusa n’ubwo abategura iri rushanwa bari batangaje ko ibirori bizarangira kare ariko byarangiye bitinze cyane.

Miss Rwanda 2019 Nimwiza Meghan n’ababyeyi be

Inkuru yabanje: Nimwiza Meghan ni we Miss Rwanda 2019

TANGA IGITEKEREZO

2 Comments on “Imbamutima z’ababyeyi ba Miss Rwanda 2019 Nimwiza Meghan”

  1. Congratulations Meghan. Uyu mwana yujuje byose ariko jye mbona abyibushye gato kandi aroroshye amaboko. None inama namuha azakore sport abe tonic, kandi ate ibiro, nahubundi Miss universe bazajya babona ari obèse.

Leave a Reply

Your email address will not be published. Required fields are marked *