21°C , Mostly cloudy | Kigali-Rwanda

Imanirafasha yahishuye icyamuteye guhimba indirimbo “Amariba”

Yanditswe na KAYITARE JEAN PAUL 

Ku ya 02-12-2020 saa 14:51:25
Umuhanzi Imanirafasha Samuel yashyize hanze indirimbo "Amariba"

Umuhanzi wamenyekanye cyane mu murimo w’Ivugabutumwa, Imanirafasha Samuel, yashyize hanze indirimbo yise ‘Amariba’ isubizamo abantu kwizera muri iki gihe cya Covid19, ndetse ikaba yumvikanamo ubutumwa buhumuriza imitima y’abantu.

Imanirafasha yamenyekanye mu ndirimbo zo kuramya no guhimbaza Imana zirimo by’umwihariko iyitwa ‘Humura’. Hiyongeraho indirimbo ‘Ndashaka kugendana nawe na Jya Wizera’, kuri ubu akaba amaze gushyira hanze indirimbo yise ‘Amariba’.

Uyu muhanzi asobanura ko icyamuteye guhimba indirimbo ‘Amariba’, ko byari ukugira ngo ahumurize imitima ya benshi. Yagize ati “Indirimbo ‘Amariba’ yaje ivuye mu ijambo ry’Imana dusoma mu gitabo k’ Itangiriro 26:15,22.

Mu by’ukuri nabonye iminsi ya none umurimo w’Imana urimo intonganya nyinshi bityo bigatuma intama zigwa umwuma, bityo rero nibutsaga abantu ko umurimo ufite uwawitangiye, wawumeneye amaraso ari we Kirisito.”

Imanirafasha ni umusore uvuga ko akunda Imana no kuyikorera akaba n’umunyamasengesho mu Itorero rya ADEPR Remera mu rurembo rw’Umujyi wa Kigali mu karere ka Gasabo.

Yatangiye guhimba no kwandika indirimbo ubwo yigaga mu mashuri yisumbuye muri Ethiopia. Yagize ati “Nkunda gusoma cyane Bibiliya kandi ni ni Igitabo nkunda cyane, byamviriyemo kujya nandika indirimbo zifite amagambo mvanye muri Bibiliya”.

Avuga ko gushyira hanze indirimbo nk’umuhanzi ku giti ke, yabitangiye muri uyu mwaka wa 2020.

Ku rundi ruhande, Imanirafasha avuga ko agiye gushyira imbaraga cyane mu gukomeza gukora indirimbo nyinshi kugira ngo ubutumwa Imana yamushyize ku mutima ashobore kubusangiza abandi, abinyujije mu ndirimbo.

Imvu iyi ndirimo hano

Umwanditsi:

KAYITARE JEAN PAUL 

Tanga Igitekerezo

Email yanyu ntigaragazwa ku rubuga. Amazina na Email ni ngombwa.