26°C , Partly sunny | Kigali-Rwanda
Aba ni abakozi ba MIFOTRA n'aba ILO mu kwigira hamwe uko imirimo itanditse yatezwa imbere (Foto James)

ILO izafasha abagore n’urubyiruko guhanga no kunoza umurimo

Yanditswe na MUGISHA BENIGNE

Ku ya 29-05-2018 saa 06:52:38

Nyuma yo gusinya amasezerano y’ubufatanye mu kunoza imirimo itanditse hagati ya Minisiteri y’Abakozi ba Leta n’Umurimo n’Ishyirahamwe  mpuzamahanga ry’umurimo (ILO: International Labour Organization), hashyizweho uburyo gahunda ya Leta yo kunoza umurimo hibandwa ku mirimo itanditse  (Informal works)  izashyirwa mu bikorwa mu gufasha  abagore n’urubyiruko  bayikora  kwiteza imbere no guharanira uburenganzira bwabo.

Aba ni abakozi ba MIFOTRA n’aba ILO mu kwigira hamwe uko imirimo itanditse yatezwa imbere (Foto James)

Nk’uko bitangazwa na Muzale Jude, Umuhuzabikorwa w’umushinga wo guteza imbere imirimo itanditse muri ILO akaba anayihagarariye mu Rwanda,  ngo uyu mushinga uzibanda ku gufasha iki gice cy’Abanyarwanda kuko ari bo bagira uruhare runini mu mirimo itanditse ari nayo ifite umwanya munini mu bukungu bw’igihugu.

Ati “Imirimo itanditse ifite uruhare rungana na 90% ku isoko ry’umurimo, kandi abenshi mu bayikora biganjemo urubyiruko n’abagore, ni yo mpamvu iki gice cy’Abanyarwanda kizibandwaho mu gushyira mu bikorwa uyu mushinga”.

Uyu mushinga uzamara imyaka itatu, ku ikubitiro uzahera ku bantu 600 mu buryo bw’igerageza ari na cyo kiciro kigiye guherwaho mu Mujyi wa Kigali, nk’uko bisobanurwa na Muzale ukazakomereza no mu zindi ntara z’igihugu mu gufasha abagore n’urubyiruko bakora imirimo itanditse kubahiriza uburenganzira bwabo, uburenganzira ku mushahara, ku bwishingizi, ku bikoresho n’ubuzima bw’umukozi mu kazi.

Umuyobozi wa ILO mu Rwanda avuga ko ishyirwa mu bikorwa  ry’uyu mushinga rizashingira ku Itegeko ry’umurimo risanzwe rigashyirwa mu bikorwa n’abikorera mu kubahiriza uburenganzira no guha agaciro  abakora iyi mirimo.

Ati “Ikibazo uyu mushinga uje gukemura, ni icyagaragaye ku bakora imirimo itanditse cyane cyane mu bwubatsi no mu budozi, ko badahabwa ibyo amategeko abagenera harimo kubona umushahara ku gihe, guhabwa umushara w’intica ntikize ku mpamvu z’uko ntaho yabyize bigaragazwa n’impamyabushobozi, kutita ku mutekano w’umukozi mu kazi ngo ahabwe ibimufasha, ubwishingizi n’ibindi”.

Muzale  avuga ko byagaragaye ko abantu bakora imirimo itanditse bahera mu bukene ku mpamvu zo kudahabwa agaciro  nk’abandi bakozi, bigatuma nta terambere bageraho bo n’imiryango yabo.

Muzale Jude, umuhuzabikorwa w’umushinga ujyanye no guteza imbere imirimo itanditse akaba anahagarariye ILO mu Rwanda (Foto James)

Bamwe mu baturage baganiriye n’Imvaho Nshya kuri uyu mushinga, bishimiye ko bagiye guhabwa agaciro  bagiye bamburwa kuva kera n’abakoresha ndetse n’ababakeneraho serivisi  bitewe n’uko bakora imirimo batigiye.

Munyaneza Fulgence umuyede ukorera mu gice cya Nyabugogo aharimo kubakwa imihanda, yagize ati “Ni byo koko uyu mushinga uziye igihe kuko akenshi twe nk’abayede  nta mushara uhamye tugira, biterwa n’umukoresha  wawe kuko aguha umushahara bitewe n’uko abyumva atarebye imvune z’umurimo urimo gukora”.

Uyu muyede kandi agaruka ku bakoresha akenshi badaha abakozi ibikoresho byabugenewe muri uwo murimo nk’ingofero zibakingira impanuka mu gihe bari mu kazi, uturindantoki n’ibindi, aho yemeza ko abakoresha b’ibigo bikomeye  ari bo bakunze kwita ku mutekano w’umukozi mu kazi.

Kantengwa Alphonsine na we akora umurimo w’ubudozi, avuga ko uwo murimo hari  abakiwusuzugura kuko ukorwa n’abantu akenshi batize amashuri menshi, avuga ko uyu mushinga bawishimiye kuko uje kubarengera bikazatuma n’abakoresha babo bamenya agaciro kawo muri sosiyete nyarwanda ndetse n’abaturage babakeneraho serivisi bikazatuma babaha agaciro kabo mu kwishyura serivisi babaha.

Uyu mushinga wo guteza imbere imirimo itanditse uzafasha abayikora na bo kwiteza imbere no kubahirwa imirimo bakora ndetse ukazanabafasha guhanga no kunoza umurimo.

 

TANGA IGITEKEREZO

Leave a Reply

Be the First to Comment!

avatar