17°C , Partly cloudy | Kigali-Rwanda

Ikoranabuhanga ryongereye umubare w’abayobotse Mituweli

Yanditswe na Ntawitonda Jean Claude

Ku ya 15-03-2019 saa 07:38:31
Rulisa Alexis Umuyobozi w’Ishami rya Mituweli muri RSSB

Nyuma yo gutangiza ikoranabuhanga mu kwishyura ubwisungane mu kwivuza (Mituweli), Umubare w’Abanyarwanda biyandikishije mu gihe cy’umwaka wose wabonetse mu mezi atandatu y’umwaka wa 2018/2019 uruta uwabonetse mu bihembwe 2 by’umwaka ushize wa 2017/2018.

Kugeza ubu abishyuye ubwisungane mu mezi atandatu ya 2018/2019 bariyongereye bagera ku kigero cya 85.9% mu gihe umwaka wa 2017/2018 warangiye bageze ku kigero cya 83.3%.

Ikoranabuhanga ryafashije guhuza imyirondoro yo ku ndangamuntu n’imyirondoro y’abagenerwabikorwa ba Mituweli ku kigero cya 100%, ndetse ubu kwishyura ntibigisaba kujya gutonda umurongo ahubwo bishobora no gukorerwa kuri terefoni.

Rulisa Alexis, Umuyobozi w’Ishami rya Mituweli mu Kigo cy’Ubwiteganyirize mu Rwanda (RSSB) ahamya ko ikoranabuhanga ryakuyeho kongeresha agaciro amakarita byajyaga bitera abanyamuryango ba Mituweli gutonda umurongo, bamwe bakaharara abandi bakahazindukira.

Mbere byasabaga ko umuntu ajya kwishyura muri SACCO bakamuha urupapuro rwandikishijwe intoki, akajya ku kigo nderabuzima kurwereka abakozi ba Mituweli ko yishyuye bagatera kashe mu ikarita.

Rulisa ati: “RSSB ntabwo yashoboraga kumenya ko amafaranga yishyuwe ku Murenge SACCO kubera ko hakoreshwaga uburyo busanzwe. Ubu twashyize ikoranabuhanga rya MobiCash muri SACCO, umuturage wishyuye RSSB ihita ibimenya.”

Kuri ubu abanyamuryango bashobora no kwishyurira Mituweli ku bakozi b’Irembo bakorera ku biro by’imirenge yose, ari na bo banyuraho iyo bashaka kwishyura serivisi zose zitangwa n’inzego z’ibanze, cyangwa se bakagana abahagarariye Serivisi z’Irembo na MobiCash mu gihugu hose barenga 3,000 (agents).

Abanyamuryango bakiriye neza impinduka

Abaturage barashima uburyo bashyiriweho bwo kwishyura Mituweli hifashishijwe ikorabuhanga, kuko byabaruhuye byinshi.

Uwihoreye Bonaventure wo mu Karere ka Kicukiro yagize ati: “Mbere washoboraga kumara umunsi wose utonze umurongo ku kigo nderabuzima ujyanyeyo inyemezabwishyu, utibagiwe n’umwanya uba watakarije kuri banki aho twajyaga kwishyura.”

Mugwaneza Fortunée wo mu Karere ka Rubavu yongeyeho ati “Nkatwe duhora mu kazi kadashira hari ubwo bitatworoheraga kwirirwa dutonze umurongo no guhora mu nzira tujya guteza kashi; ariko ubu ikoranabuhanga ryadufashije gukoresha umwanya wacu neza kandi inyemezabwishyu uhita uyibona kuri terefoni.”

Umuyobozi wa RSSB Richard Tusabe avuga ko bakomeje kongera ingufu mu ikoranabuhanga bagamije kurushaho kunoza serivisi zihabwa abaturage.

Yagize ati “Turimo gushyira ingufu mu ikoranabuhanga rikora neza riduhuza n’ibindi bigo bya Leta byamaze gutera imbere mu rwego rw’ikoranabuhanga nka NIDA, RDB, BNR na LODA kugira ngo turusheho gutanga serivisi nziza n’ibyo tugenera Abanyarwanda bibe bishingiye ku mibare n’amakuru bifatika.”

Abaturage barashishikarizwa guhitamo uburyo buboroheye mu kwiyandikisha no kwishyura Mituweli ari bwo gukoresha terefoni kuko bubarinda gutakaza umwanya n’ikiguzi k’ingendo.

Rulisa Alexis Umuyobozi w’Ishami rya Mituweli muri RSSB

TANGA IGITEKEREZO

Leave a Reply

Your email address will not be published. Required fields are marked *