25°C , Partly sunny | Kigali-Rwanda

Ikoranabuhanga rya “Sobanuzainkiko” rije gufasha kugaragaza akarengane na ruswa

Yanditswe na Rutayisire Emile

Ku ya 11-07-2019 saa 15:39:40
Umuvugizi w'inkiko Mutabazi Harrison i bumoso na Karungi Niceson Umuyobozi w'ikoranabuhanga mu nkiko, mu kiganiro n'abanyamakuru basobanura uburyo bbw'ikoranabuhanga rishya rya Sobanuzainkiko mu bihe byashize( Photo. James)

Uburyo bushya bwiswe “Sobanuzainkiko”bwamuritswe kuri uyu wa 11 Nyakanga 2019, buje gufasha ababuranyi n’abafashije mu rubanza kwerekana ikibazo icyo ari cyo cyose kibangamiye imigendekere myiza y’urubanza nka ruswa no gusaba gusubirishamo urubanza ku mpamvu z’akarengane.

Ubu buryo buzatangira gukora tariki ya 16 Nyakanga 2019 buje butandukanye n’uburyo bw’ikoranabuhanga bwari busanzwe bukoreshwa mu nkiko mu gutanga ibirego no gukurikirana imanza, IECMS (Integrated Electronic Case Management) bwakoreshwaga mu nkiko zose z’u Rwanda.

‘Sobanuzainkiko’ ifite porogaramu izajya ikoresha uburyo bubiri, ari bwo ubutumwa bugufi kuri terefoni igendanwa buzwi nka SMS na internet.

Karungi Niceson, umuyobozi ushinzwe ikoranabuhanga mu nkiko avuga ko butandukanye n’ubwari busanzwe bwa IECMS, agira ati: “Ubu buryo (system) bwa Sobanuzainkiko bwashyizweho kugira ngo bufashe abaturage gusaba gusubirishamo imanza zabo ku mpamvu z’akarengane, gufasha abaturage gutanga amakuru kuri ruswa mu manza, gufasha umuturage gutanga amakuru mu gihe atishimiye uburyo urubanza rwe rurimo kuburanishwa cyangwa se uburyo rwaburanishijwe, na none bugafasha abaturage kohereza imitekerereze ku mikorere y’inkiko: Urugero nka serivisi bahabwa n’inkiko, uburyo bazibona, n’uburyo zibafasha n’uko bifuza zarushaho kunozwa”.

Akomeza avuga ko usibye gusaba gusubirishamo urubanza ku mpamvu z’akarengane, gutanga amakuru kuri ruswa mu manza no kugaragaza ibyo utishimiye mu micire y’urubanza, ushobora kubikora ukoresheje ubutumwa bwanditse (SMS ) ukoresheje terefoni igendanwa iyo ari yo yose kandi bidasabye ko ugira internet.

Kubikora ujya ahagenewe ubutumwa bugufi ukandika ijambo Ruswa niba ushaka gutanga amakuru kuri ruswa ku rubanza, ugasiga akanya ugatanga ubusobanuro, maze ukohereza kuri 2640.

Iyo ushaka gutanga amakuru ku byo utishimiye ku migendekere y’urubanza rwawe, nabwo ujya ahagenewe ubutumwa bugufi ukandika ijambo Urubanza ugasiga akanya, ugatanga ubusobanuro, bw’uburyo utishimiye imigendekere y’urubanza rwawe maze ukohereza kuri 2640.

Ku bijyanye no gusaba gusubirishamo urubanza ku mpamvu z’akarengane kubera ko byo bisaba andi makuru yimbitse, kandi bizagira aho bihurira na system y’imanza, byabaye ngombwa ko byo bikorerwa gusa kuri internet, ugasaba urukiko gusubirishamo urubanza ku mpamvu z’akarengane.

Umuvugizi w’inkiko Mutabazi Harrison yatangaje ko ubu buryo bugiye kugabanya igihe bataga n’ingendo zakorwaga n’abaturage bajyana impapuro z’imanza barenganyijwe ku Muvunyi n’ahandi mu nkiko bitewe n’ibibazo bafite ariko kuri ubu urenganyijwe ikirego ke akigeza kuri Perezida w’urukiko rwisumbuye urwo yaburaniyemo, dosiye akayigaho yasanga ari ukuri akoherereza raporo Perezida w’urukiko rw’ikirenga ari nawe iyo asanze ibisabwa aribyo agena urukiko ruzongera kuburanisha urwo rubanza.

Mutabazi akomeza agira ati: “Igihe umuturage ajya ku Muvunyi ni igihe Perezida w’urukiko rusumbye urwo yaburaniyemo yanze ubusabe bwe kandi nabwo iyo bigeze ku muvunyi, Umuvunyi nawe akora dosiye akayoherereza Perezida w’urukiko rw’ikirenga. Ibi bikaba byaragiyeho bigamije gukuraho akarengane”.

Ikibazo cy’uko abaturage bazajya bahora mu manza zidashira, Mutabazi avuga ko ibyo bigomba gusobanuka, ko gusubirishamo urubanza kubera akarengane bikorwa ku karengane kagaragarira buri wese kandi ko atari uburyo bwo kujurira. Ibyo biba ari uko imanza zarangiye n’uburana yararangije inshuro yemerewe kujurira.

Umwanditsi:

Rutayisire Emile

One Comment on “Ikoranabuhanga rya “Sobanuzainkiko” rije gufasha kugaragaza akarengane na ruswa”

  1. NYIRANDAGANJE Francine Kuwa 31/12/2019.
    Tél: 0786075032 / 0788918707
    Umudugudu wa CYERWA
    Akagari ka AKANZU
    Umurenge wa NZIGE
    Akarere ka RWAMAGANA
    Intara y’IBURASIRAZUBA

    Nyakubahwa Perezida w’urukiko rwisumbuye rwa NGOMA
    Impamvu: Gutakamba

    Nyakubahwa Perezida w’urukiko ,

    Mbandikiye iyi baruwa mbatakambira mbereka akarengane nakorewe ngira ngo mundenganure.
    Inteko y’Abunzi b’akagari ka KABUYE mu murenge wa RUBONA ,akarere ka RWAMAGANA yagiye yicara igafata imyanzuro ku mitungo yanjye ntabizi, ikanzura ko ntsinzwe kandi ntaraburanye ntaranahamagajwe byibura ngo mbure. ntinamenyeshe imyanzuro yafashe ku mitungo yanjye , urugero kuwa 16/11/2015 bafashe umwanzuro uvuga ko ntsindiwe ubutaka bwanjye nari naraguze n’uwitwa MUKAMURERA SIKORASITIKA ariwe nyina w’uwitwaga KANGAGAYE Theophile ubu wihinduye SIKUBWABO Theophile no kuwa 02/10/2017 nabwo bafashe umwanzuro uvuga ko amazu yanjye nayo yari kuri ubwo butaka bwanjye nyatsindiwe nayo ngomba kuyasenya nabwo sinari nahamagajwe sinanamenyeshejwe imyanzuro yafashwe; iyi myanzuro yombi bayiteje kashe mpuruza ku rukiko rw’Ibanze rwa NZIGE ntarayibona nza kubona uyu mwanzuro w’ubutaka bawucishije munsi y’urugi warateweho kashe mpuruza bivuze ko wari wabaye itegeko ntashobora kuwujuririra ,ngiye gusobanuza MAJE ku karere mpasanga uyu mwanzuro wundi uvuga ko ngomba gusenya n’amazu yari kuri ubu butaka nawo waramaze guterwaho kashe mpuruzabivuze ngo nawo sinagombaga kuwujuririra ,nawusabye MAJE arawumpa nandikira Perezida w’Inteko y’Abunzi musaba ko iyi myanzuro yombi yasubirwamo kuko aribwo nari nyibonye. Icyo gihe inteko yanze gusubiramo iyi myanzuro yari yarafashe bambwira ko batayisubiramo kandi yarabaye itegeko birengagiza ko nanjya nayibonye yarabaye itegeko njuririra Abunzi b’umurenge wa RUBONA nabo banga kwakira ubujurire , iyi myanzuro yombi yashyizwe mu bikorwa n’umuheshaw’inkiko utari uw’umwuga w’akagari ka KABUYE kuko ntari nigeze menyeshwa imyanzuro yafatiwe imitungo yanjye; nanze kwigomeka ku muhesha w’inkiko nemera ko arangiza izi manza . Nyuma nongeye kubona indi rangizarubanza y’umuhesha w’inko utari uw’umwuga w’akagari ka KABUYE ivuga ko yarangije urubanza hagati yanjye n’uwandegaga witwa KANDAGAYE Theophile ari nawe ubu wihinduye SIKUBWABO Theophile nk’uko biboneka ku myanzuro yombi y’Abunzi; ivuga ko urwo rubanza rwarangijwe rwari rwaraciwe n’urukiko rw’Ibanze rwa NZIGE nabwo sinari narigeze ndegwa mu rukiko sinanaburanye muri urwo rukiko yewe n’umuhesha w’inkiko ntagaragaza imyanzuro yashingiyeho arangiza urubanza.Kubera ako karengane kose nagendaga nkorerwa ntabizi naregeye urukiko rw’ibanze rwa NZIGE ndusaba kundenganura kuko ari rwo rwari rwaragiye rutera kashe mpuruza ku myanzuro y’Abunzi n’iyo rangizarubanza ikagaragaza ko urwo rukiko rwaciye urubanza rw’imitungo yanjye hagati yanjye n’uyu mugabo undega witwaga KANDAGAYE Theophile ubu witwa SIKUBWABO Theophile sinahabwe kopi zaciriweho urwo rubanza ubwo naruregeye nsaba ko rwatesha agaciro imyanzuro y’Abunzi na kashe mpuruza rwateye n’amarangizarubanza abiri yakozwe n’Abahesha b’Inkiko batandukanye ku mitungo yanjye narusaba ko rwampa kopi zaciriweho uru rubanza . ngaragariza urukiko ibimenyetso bigaragaza ko imyanzuro yose nagiye nyibona yarabaye itegeko ntagishobora kuyijuririra , urukiko narwo rwirengagije ibimenyetso narugaragarije rwanga kujya mu mizi y’ikirego ahubwo rufata icyemezo ruvuga ko rutagomba kujya mu mizi kuko abo naregaga bari bagaragaje imbogamizi nizo zizweho ubwo njye sinigeze mpabwa ijambo ngo ngire icyo mvuga. kuwa 05/12/2019 nibwo urukiko rwasomye urubanza . Urukiko rwemeza ko ngomba guha uwari uhagarariye inteko y’Abunzi n’Abahesha b’inkiko babiri ibihumbi Magana atatu (300000frw) buri umwe ibihumbi ijana (100000frw) kugeza ubu sindahabwa kopi z’urukiko rwaciriyeho urwo rubanza , nkaba mbatakambira ngira ngo mundenganure munsabire urukiko rw’Ibanze rwa NZIGE kujya mu mizi y’uru rubanza kugira ngo mbone uko ngira ijambo mbe nanahabwa kuba nashobora kujurira igihe naba ntishimiye icyemezo cyafashwe;kuko uru rukiko rwafashe ikirego cyanjye nkaho najuririye imyanzuro y’Abunzi kandi Atari byo kuko nari natangiriye ikirego muri uru rukiko . Ndabasaba ko mwakwita kuri buri kimwe cyose kivugwa muri iyi baruwa kuko ibi byose navuze nari nabigaragarije urukiko nubu biri muri sisisteme y’uru rukiko.

    Ibimenyetso nari natanze : -Imyanzuro ibiri y’Abunzi , amarangizarubanza abiri, amabaruwa abiri nandikiye Abunzi , Iyandikwa ry’ubu butaka mburana ibi byose biri muri sisiteme kuri nomero y’urubanza RC00157/2019/TB/NZG

    NYIRANDAGANJE Fransine

Tanga Igitekerezo

Email yanyu ntigaragazwa ku rubuga. Amazina na Email ni ngombwa.