18°C , Mostly cloudy | Kigali-Rwanda
Dr Ndayambaje Irenee, Umuyobozi wa REB (hagati), Hiroyuki Takada, Umuyobozi wa JICA (ibumoso) n'umjyobozi wa Sakura- Sha, Yokoyama Kenya (Foto James)

Ikoranabuhanga rigiye kwifashishwa mu kwigisha imibare

Yanditswe na MUGISHA BENIGNE

Ku ya 12-10-2018 saa 08:49:23

Ikigo k’igihugu cy’uburezi (REB) cyatangije porogaramu yo kwigisha imibare hifashishijwe ikoranabuhanga rya mudasobwa.

Iyi gahunda izatangirana n’igeragezwa mu mashuri 6 mu buryo bw’igerageza ari yo Urwunge rw’Amashuri rwa Kimironko ya 2, Urwunge rw’Amashuri rwa Rugando, Urwunge rw’Amashuri rwa Kacyiru 2, Urwunge rw’Amashuri rwa Kinyinya n’andi, nyuma iyi porogaramu ikazagezwa mu yandi mashuri yose y’igihugu.

Nk’uko bisobanurwa n’Umuyobozi Mukuru wa REB, Dr Ndayambaje Irene, ubu buryo buje gukemura ikibazo k’isomo ry’imibare wasangaga ridakunzwe n’abana cyane cyangwa rikabarambira mu buryo bwihuse, kongeraho imfashanyigisho zitabonwaga mu buryo bworoshye n’abarezi.

Avuga iyi porogaramu yakozwe ku bufatanye bwa REB n’Ikigo cy’Abayapani gitsura iterambere mpuzamahanga (JICA).

Ati “Kwigisha imibare hifashishijwe ikoranabuhanga rya mudasobwa bizafasha kwimakaza ikoranabuhanga mu mashuri abanza no mu burezi muri rusange, bizafasha abana kurushaho gukurikira mwarimu no kutarambirwa isomo.”

Dr Ndayambaje avuga ko abarezi bagorwaga no kubona imfashanyigisho mu isomo ry’imibare bigiye kuborohera kuko icyo azaba ashaka cyose kwereka abanyeshuri azakibona hafi kubera uburyo bw’ikoranabuhanga.

Yatanze urugero rw’igihe mwarimu ashaka kwigisha umubare gatatu, ko azajya abona hafi imbuto cyangwa ibindi bindi bintu bitatu yereka abanyeshuri bakamubwira ibyo ari ibyo n’umubare wabyo.

Ati “Ushobora guhindura imfashanyigisho bigatuma umwana arushaho gusobanukirwa n’isomo ndetse no kurikunda.”

Yokoyama Kenya, umuyobozi mukuru w’Ikigo Sakura-sha ari na cyo cyakoze iyi porogaramu yasobanuye ko izajya igaragaza integanyanyigisho umwarimu akeneye kwifashisha zizaba ziri mu mabara atandukanye akurura abanyeshuri n’amajwi anyuranye azajya yumvikana mu gihe umwarimu yerekanye igishushanyo ashaka kwifashisha mu kwigisha imibare.

Hiroyuki Takada, Umuyobozi wa JICA mu Rwanda waje ayoboye itsinda ry’abayapani bakoze iyi porogaramu yavuze ko igihugu cy’u Buyapani n’u Rwanda bifatanya muri byinshi harimo n’uburezi.

Mukampunga Evangelique, Umwarimu mu Rwunge rw’amashuri rwa Kimironko II yavuze ko bamwe mu barezi bazabanza guhugurwa, na bo bakazifashishwa mu guhugura abandi.

Nk’umurezi, yavuze ko iyi gahunda ije kubafasha kubona imfashanyigisho batavunitse nk’uko byari bimeze, ndetse bikazatuma abana bakunda isomo ry’imibare bitewe n’uko bazaba baryigira kuri mudasobwa.

Yavuze kandi ko iyi porogaramu izafasha mwarimu gutanga imyitozo myinshi ku banyeshuri kurusha uburyo bwakoreshwaga kuko wasangaga mwarimu atabona umwanya uhagije wo gutanga imyitozo kuko yatindaga mu gusobanura isomo kugira ngo abanyeshuri babashe kuryumva.

Ati “Imfashanyigisho ziri mu buryo bw’ikoranabuhanga zizafasha abana kumva isomo mu buryo bwihuse, bityo tubone umwanya wo gutanga imyitozo myinshi kurusha uko byari bimeze.”

Iyi porogaramu izatangirana n’umwaka w’amashuri wa 2019, ikazatangirira mu mashuri 6, nyuma ikazagezwa mu yandi mashuri abanza yo mu gihugu.

 

TANGA IGITEKEREZO

Leave a Reply

Your email address will not be published. Required fields are marked *