21°C , Partly sunny | Kigali-Rwanda

Ikoranabuhanga mu burezi rizanoza imikoreshereze y’integanyanyigisho nshya

Yanditswe na MUGISHA BENIGNE

Ku ya 18-04-2018 saa 07:42:39

Abarezi 113 basanzwe bigisha isomo ry’ikoranabuhanga mu mashuri yabo bakomoka mu turere 11 tw’igihugu  bari mu mahugurwa y’iminsi itatu agamije kubafasha  guhugura no gukangurira bagenzi babo gukoresha za ‘Smart classroom’ ziri mu bigo byabo. Bizagira uruhare mu gutuma hanozwa imyigishirize y’integanyanyigisho nshya.

Dr Ndayambaje Irenee, Umuyobozi mukuru wa REB (hagati), Dr Niyizamwiyitirizina Christine, umuyobozi w’ishami ry’ikoranabuhanga (ibumoso) na Sengati Diane uyobora agashami k’imyigishirize y’ikoranabuhanga

Umuyobozi Mukuru w’Ikigo k’igihugu cy’uburezi (REB), Dr Ndayambaje Irenee yagize ati “Ikifuzo dufite ni uko ikoranabuhanga rihindura isura y’Uburezi mu gihugu cyacu, abarimu n’abanyeshuri bagomba kwifashisha ikoranabuhanga mu masomo yose, ibyo bizadufasha kunoza imikoreshereze y’integanyanyigisho nshya ishingiye ku bushobozi (CBC) yatangiye gukoreshwa mu gihugu cyacu”.

Kugeza ubu REB imaze kugeza ku bigo bisaga 537 ibikoresho by’ingenzi kugira ngo isomo iryo ari ryo ryose ritangwe hakoreshejwe ikoranabuhanga. Ibikoresho bimaze gutangwa ni mudasobwa 100 kuri buri kigo k’ishuri, internet, projector hamwe n’amasomo agomba kwigishwa.

Dr Ndayambaje anenga abayobozi b’ibigo bagaragaye ko bigengesera mu gukoresha mudasobwa z’ishuri ngo zitagira ikibazo bakazibazwa cyangwa se ngo zitabura, ibyo bigatuma  batazikoresha namba, ahubwo  zikabikwa nk’amata y’abashyitsi.

Ati “Iyi myumvire igomba guhinduka, bityo mudasobwa zigakoreshwa mu kwimakaza ikoranabuhanga mu Burezi, isura y’ikoranabuhanga mu Burezi iguhinduka.”

Umwe mu bitabiriye amahugurwa, Kuzirikana Joyeuse wigisha mu rwunge rw’amashuri rwa  Rusanze mu karere ka Musanze yagize ati “Nta bwo twajyaga twemerera bagenzi bacu kwifashisha izi mashini kubera ko cyaziraga, ariko ubu turatangira kuzibaha ngo bazikoreshe kuko bigaragara ko urugendo rw’ikoranabuhanga rugeze kure”.

Ikibazo k’ingenzi kigaragazwa n’abarezi ni uko abarimu batagira mudasobwa zabo bwite kandi bagomba kuzifashisha mu gihe cyo gutegura amasomo.

Aha ngo barasaba ko bibaye ibishoboka umwarimu yatizwa mudasobwa nk’uko ashobora gutizwa n’ibindi bikoresho by’ishuri, nk’ibitabo n’ibindi, ariko akamenya ko agomba kubifata neza. Ikifuzo ni uko buri mwarimu atunga mudasobwa ye bwite.

Nyuma y’iki kiciro cya mbere cy’aya mahugurwa, abarimu bigisha mu mashuri yose afite ibikoresho bya ‘Smart classroom’  bazatangira  umurimo wo guhugura bagenzi babo babifashijwemo n’abakozi ba REB bafite mu nshingano zabo ikoranabuhanga mu burezi.

TANGA IGITEKEREZO

Leave a Reply

Your email address will not be published. Required fields are marked *