17°C , Mostly cloudy | Kigali-Rwanda
Umunyamabanga wa Leta muri MINALOC Dr Mukabaramba Alvera ibumoso na Perezida w'Inama y'Igihugu y'abafite ubumuga Niyomugabo Romalis (Foto James)

Ikoranabuhanga abafite ubumuga barifata nk’urugingo rusimbura urwatakaye

Yanditswe na Sezibera Anselme

Ku ya 27-11-2018 saa 06:49:18

Ubuyobozi bw’Inama y’Igihugu y’abafite ubumuga (NCPD) busanga ikoranabuhanga rikoreshejwe neza ku muntu ufite ubumuga ryaba nk’urugingo rusimbura urwo yatakaje.

Ibyo byatangarijwe mu nama yahuje inzego zitandukanye zaba iza Leta, iz’abikorera n’abahagarariye abafite ubumuga nyuma yo gufungura ku mugaragaro Ikigo cy’Ikoranabuhanga cya Kicukiro.

Umuyobozi wa NCPD, Niyomugabo Romalisi, yagize ati: “Ndashimangira ko ku bafite ubumuga ikoranabuhanga iyo ryakoreshejwe neza turifata nk’urugingo rusimbura urwo tutari dufite cyangwa urwari ruhari rutakoraga neza bikazatuma tugera kure hashoboka”.

Uhereye ibumoso ni Umunyamabanga Nshingwabikorwa wa NCPD Ndayisaba Emmanuel, Umunyamabanga wa Leta muri MINALOC Dr Mukabaramba Alvera n’umuyobozi w’agateganyo muri MIFOTRA ushizwe umurimo Mwambari Faustin(Foto James)

Umunyamabanga Nshingwabikorwa wa NCPD Ndayisaba Emmanuel na we yaje ashimangira ko ikoranabuhanga rizafasha abafite ubumuga kugera ku bumenyi buhagije kugira ngo badasigara inyuma.

Ndayisaba avuga ko inzego za Leta n’iz’abikorera zikomeje gushyira imbaraga nyinshi mu ikoranabuhanga ku bafite ubumuga kuko hamaze gushyirwaho ibigo 5 birifite mu gihugu.

Ndayisaba avuga ko ikoranabuhanga baryegerejwe kuko uretse ikigo cyafunguwe Niboye muri Kicukiro hari ibindi byibuze bimaze nk’amezi 2 bishyizweho.

Agira ati: “Ufite ubumuga iyo yajyaga guhatana mu bizamini yibazaga ibikoresho ari bwifashishe ariko ubu buri ntara ifite icyo kigo kandi biteganywa gushyirwa mu turere twose izo mbogamizi ziri kugenda zivanwaho. Aho biri bari kwiga kandi bageze kure ku buryo bitakiri ikibazo nka mbere”.

Ndayisaba avuga ko aho ibyo bigo bimaze igihe gito byaratangiye byibuze buri kimwe gifite abanyeshuri babarirwa hagati ya 25-30.

Umunyamabanga wa Leta muri Minisiteri y’Ubutegetsi bw’Igihugu ushinzwe imibereho myiza Dr Mukabaramba Alvera, avuga ko ikoranabuhanga mu bantu bafite ubumuga, riba rihambaye kandi rikenewe kurusha iryo abadafite ubumuga usanga bakoresha.

Agira ati: “Kongerera ubushobozi abantu bafite ubumuga, birajyana na gahunda z’igihugu cyacu zo guteza imbere ikoranabuhanga no guhanga udushya, aho twatangije ibigo 5 mu turere twa Musanze, Bugesera, Nyamagabe, Rubavu na Kicukiro twafunguye”.

Dr Mukabaramba asaba abafatanyabikorwa kugaragaza uruhare rwabo kugira ngo iryo koranabuhanga rikomeze kugera ku bantu bafite ubumuga, aho yifuza ko abafite ubumuga atajya ava aho ari ngo agombe kurishaka ku bigo byavuzwe gusa ahubwo rikwiye kugera ku rwego rwa buri karere.

Dr Mukabaramba ashimangira ko Leta izakomeza kongera ibigo by’Ikoranabuhanga ridaheza kandi bitange akazi ku bantu bafite ubumuga.

Ni mu gihe mibare itangwa na MIFOTRA, igaragaza ko abantu badafite akazi mu kiciro cy’abafite ubumuga usanga bari ku kigero cya 47%, mu gihe abadafite ubumuga badafite akazi bari kuri 23%.

Inkuru yabanje: NCPD, MINALOC na MIFOTRA baramagana ihezwa ry’abafite ubumuga

TANGA IGITEKEREZO

Leave a Reply

Your email address will not be published. Required fields are marked *