18°C , Mostly cloudy | Kigali-Rwanda
Rayon Sports ubwo yashyikirizwaga igikombe k'irushanwa ry'agaciro

Ikipe ya Rayon Sports yisubije igikombe k’irushanwa ry’Agaciro

Yanditswe na BUGINGO FIDELE

Ku ya 01-10-2018 saa 07:46:11

Rayon Sports 1-0 APR FC

AS Kigali 2-1 Etincelles FC

Ikipe ya Rayon Sports  yaraye yegukanye igikombe k’irushanwa ryitiriwe Ikigega Agaciro “Agaciro Development Fund football championship 2018” itsinze ikipe ya APR FC igitego 1-0.

Rayon Sports ubwo yashyikirizwaga igikombe k’irushanwa ry’agaciro

Rayon Sports yari imaze iminsi ikina imikino y’Afurika   yegukanye iki gikombe ku nshuro ya kabiri yikurikiranya kuko ari na yo yari igifite   aho muri 2017 yagitwaye nabwo itsinze APR FC igitego 1-0 cyatsinzwe na  Rutanga Eric.

Muri uyu mukino wa nyuma wabaye ejo hashize tariki 30 Nzeri 2018, Rayon Sports ni yo yihariye umukino inarusha APR FC n’ubwo nayo yanyuzagamo igasatira izamu rya Rayon Sports ndetse igahusha bumwe mu buryo bwabaga  bwabazwemo igitego gusa  igice cya mbere cy’uyu mukino kikaba cyararangiye ari 0-0.

Mu gice cya kabiri hagiye bahaba impinduka ariko iyahinduye  umukino ni aho ku munota wa 52 , myugariro w’APR FC Rugwiro Herve yahabwaga ikarita y’umutuku  nyuma yo gukorera ikosa kuri Niyonzima Olivier Sefu.

Nyuma y’iyi karita, umutoza w’APR FC Petrovic bisa nk’aho byamugoye kongera guhagarika ikipe ye  mu kibuga bituma Rayon Sports  imusatira cyane bigaragara ari nabyo byaje kuvamo igitego  cyatsinzwe na Mugisha Francois “Master” ku mupira wari uhinduwe neza na Muhire Kevin ku munota wa  mbere w’inyongera.

Mbere gato y’umukino wa nyuma, ikipe ya AS Kigali yatsinze Etincelles FC mu guhatanira umwanya wa 3 ibitego 2-1 byatsinzwe na  Ndarusanze Jean Claude ku munota wa 52 na Niyonzima Ally ku munota wa 57  ku ruhande rw’AS Kigali naho Etincelles FC itsindirwa na  Muganza Joachim Koliba ku munota wa  62.

Ikipe ya Rayon Sports yegukanye igikombe  na miliyoni 2 mu gihe APR FC yahawe miliyoni 1 naho AS Kigali yabaye iya 3 ihabwa  ibihumbi 500.

Mu bindi bihembo byatanzwe, Muhire Kevin ukina hagati mu ikipe ya Rayon Sports ni we watowe nk’umukinnyi witwaye neza mu irushanwa ryose akaba yahembwe na RwandAir kuzatemberezwa aho ashaka iyi ndege igana.

Abandi bahembwe ni abakinnyi 3 batsinze ibitego byinshi aribo Ndarusanze Jean Claude w’AS Kigali, Byiringiro Rague w’APR FC na Bimenyimana Bonfils Caleb wa Rayon Sports bose batsinze ibitego 2. Aba na bo RwandAir izabatembereza  aho bashaka  iyi ndege ikorera ingendo.

Iri rushanwa rikinwa buri mwaka rikaba ritegurwa n’ishyirahamwe ry’umupira w’amaguru mu Rwanda “FERWAFA”  ifatanyije n’Ikigega Agaciro Development Fund  rifite intego yo gukusanya inkunga yo gushyira muri iki kigega.

 

 

TANGA IGITEKEREZO

Leave a Reply

Your email address will not be published. Required fields are marked *