Ikipe ya Equity na NISR zagiye guhagararira u Rwanda mu mikino y’Afurika

Yanditswe na BUGINGO FIDELE

Ku ya 01-12-2019 saa 14:12:27
Ikipe zaserukiye u Rwanda mu mikino y'Afurika y'abakozi ubwo bari bageze muri Tunizia

Ikipe ya  Banki ya Equity ndetse  n’ikipe y’ikigo k’Igihugu k’Ibarurishamibare  “NISR”  mu mupira w’amaguru mu kiciro cy’abagabo  zitabiriye ku nshuro ya mbere  imikino y’Afurika   mu kiciro cy’abakozi. Iyi mikino  izabera muri Tuzinia mu mujyi wa  Monastir kuva tariki  04 kugeza 08 Ukuboza 2019.

Itsinda  ry’abakinnyi b’abagiye babaherekeje bahagurutse mu Rwanda  tariki 29 Ugushyingo 2019 bererekeza muri Tunizia.

Izi kipe zabonye itike yo guserukira u Rwanda bwa mbere mu mikino y’Afurika nyuma yo kwitwara neza dore ko ikipe ya Equity Bank yegukanye igikombe mu kiciro  k’ibigo byigenga  itsinze ku mukino wa BK  naho NISR ikaba yaregukanye igikombe mu kiciro k’ibigo bya Leta itsinze ku mukino wa nyuma ikipe ya Minisiteri y’Ingabo “MOD”.

Kuba u Rwanda rubashije guserukirwa bwa mbere mu mikino y’Afurika mu bakozi ni ikigaragaza ko shampiyona  y’abakozi mu Rwanda yazamuye urwego. Iyi shampiyona ikaba  itegurwa n’ ishyirahamwe ry’imikino y’abakozi mu Rwanda “ARPST”.

Aya makipe yagiye aherekejwe  n’intumwa ya Minisiteri ya Siporo mu Rwanda, Rurangayiye Guy, Perezida  w’ishyirahamwe ry’imikino y’abakozi mu Rwanda “ARPST”, Mpamo Thierry ndetse n’umunyamabanga mukuru w’iri shyirahamwe, Rwabuhihi Innocent.

 

 

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.