28°C , Sunny | Kigali-Rwanda

Ikipe ya APR FC yirukanye abakinnyi 16

Yanditswe na BUGINGO FIDELE

Ku ya 28-06-2019 saa 18:22:51
Mugiraneza Jean Baptiste Migi wari kapiteni wa APR FC umwe mu bakinnyi 16 basezerewe

Ikipe ya APR FC nyuma yo gusoreza ku mwanya wa 2 muri shampiyona y’ikiciro cya mbere 2018-2019 ndetse ikanaviramo muri 1/8 mu irushanwa ry’igikombe cy’Amahoro 2019, tariki 28 Kamena 2019 ni bwo yasezereye abakinnyi 16 muri 31 yari ifite mu mwaka w’imikino wa 2018-2019.

Muri aba bakinnyi basezerewe harimo Mugiraneza Jean Baptiste Migi wari usanzwe ari kapiteni w’iyi kipe akaba yari yayigarutsemo mu mpera z’umwaka wa 2017 avuye muri Gor Mahia yo muri Kenya yari yagiyemo avuye muri Azam FC yo muri Tanzania. Uyu mukinnyi wo hagati akaba yari asigaranye amezi 6 ku masezerano ye.

Mu bandi basezerewe harimo Nsengiyumva Moustapha, Rukundo Denis, Nshimiyimana Amran, Rugwiro Herve, Ntwari Evode, Ntaribi Steven, Rusheshangoga Michael, Nizeyimana Mirafa, Ngabonziza Albert, Kimenyi Yves, Iranzi Jean Claude, Sekamana Maxime, Bigirimana Issa, Nshuti Dominique Savio na Niragira Ramadhani.

Benshi muri aba bakinnyi bakaba bari bagifite amasezerano dore ko hari n’abari bamazemo umwaka umwe nka Nsengiyumva Moustapha na Nizeyimana Mirafa bari bavuye muri Police FC, Ntwari Evode wari wavuye muri AS Kigali na Niragira Ramadhani wavuye Atlético i Burundi .

Mu basezerewe, Bigirimana Issa we yamaze kubona ikipe aho yasinye imyaka 2 mu ikipe ya Yanga yo muri Tanzania.
Intandaro nyamukuru yo gusezerera aba bakinnyi akaba ari umusaruro utari mwiza iyi kipe yagize muri uyu mwaka w’imikino wa 2018-2019.

Uretse aba bakinnyi bivugwa ko n’umutoza mukuru, Zlatko Krmpotić yamaze gusezererwa n’iyi kipe ndetse akaba yarasubiye iwabo muri Seribia ndetse n’umutoza w’abanyezamu, Mugisha nawe akaba yasezerewe. Ikipe kipe kandi biravugwa ko yanirukanye umunyamabanga mukuru wayo, Kalisa Adolphe “Camarade”.

Abakinnyi bagumye muri APR FC

Abakinnyi 15 ni bo basigaye muri APR FC, aba barimo Buregeya Prince, Ntwari Fiacre, Imanishimwe Emmanuel, Fitina Omborenga, Hakizimana Muhadjiri, Butera Andrew, Byiringiro Lague, Mugunga Yves, Sugira Ernest, Usengimana Danny, Nshuti Innocent, Itangishaka Blaise, Niyonzima Ally, Nkinzingabo Fiston na Songayingabo Shaffy.

Muri aba ariko abandi 3 nabo bashobora kutazaba bari kumwe n’iyi kipe mu mwaka w’imikino wa 2019-2020. Aba barimo Niyonzima Ally ushobora no kuba atari mu Rwanda, Fitina Omborenga na Hakizimana Muhadjiri wifuzwa n’ikipe ya AS Vita Club yo muri RDC.

Muri aba bakinnyi kandi basigaye muri APR FC 4 muri bo bagomba gutizwe muri Marines FC ari bo Nkinzingabo Fiston, Itangishaka Blaise, Songayingabo Shaffy na Nshuti Innocent.

Bamwe basohoka abandi binjira

Muri iyi kipe ya APR FC n’ubwo bataratangaza ku mugaragaro abakinnyi bamaze kugura haravugwa Manzi Thierry, Niyonzima Olivier Sefu na Mutsinzi Ange bakiniraga ikipe ya APR FC. Hari kandi Mushimiyimana Mohamed wa Police FC, Nkomezi Alexis na Rwabugiri bakinira Mukura gusa hakaba hari n’abandi bivugwa iyi kipe yifuza.

Mugiraneza Jean Baptiste Migi wari kapiteni wa APR FC umwe mu bakinnyi 16 basezerewe

TANGA IGITEKEREZO

Leave a Reply

Your email address will not be published. Required fields are marked *