18°C , Mostly cloudy | Kigali-Rwanda

Ikigo cy’Imisoro n’Amahoro mu mpinduka Leta yakoze zazahuye ubukungu bw’u Rwanda

Yanditswe na Amani Claude

Ku ya Sep 25, 2018 saa 8:36

Nyuma gato ya Jenoside yakorewe Abatutsi, u Rwanda rwari rwugarijwe n’ibibazo byinshi, byarimo n’ubukungu bwari hasi cyane.

Ikicaro Gikuru cya Rwanda Revenue Authority

 

Mu rwego rwo gukemura icyo kibazo, Leta y’Ubumwe bw’Abanyarwanda yakoze amavugurura atandukanye agamije iterambere rirambye rishingiye kuri buri muturage hagamijwe gukura u Rwanda mu kiciro cy’ubukene rukareka gutegera amaboko amahanga.

Itegeko rishyiraho Ikigo cy’Imisoro n’Amahoro mu Rwanda (RRA/Rwanda Revenue Authority) ryasohotse mu mpera z’umwaka wa 1997 hagamijwe gushyiraho uburyo burambye bwo gukusanya imisoro. Iki kigo cyatangiye muri Mutarama 1998 abasora bakiri bake ndetse n’umuco wo gusora utarumvikana neza cyane cyane mu basora bato.

Komiseri Wungirije Ushinzwe Abasora muri RRA Mukashyaka Drocelle watangiye gukora muri iki kigo nyuma y’umwaka umwe gitangiye imirimo yacyo, yatangarije Imvaho Nshya uburyo cyabaye imbarutso ya gahunda ihamye yo kuzahura ubukungu.

Komiseri Wungirije Ushinzwe Abasora muri RRA Mukashyaka Drocelle

Yagize ati “Gushyiraho Ikigo cy’Imisoro n’Amahoro ni imwe mu mpinduka zikomeye Leta y’u Rwanda yari ikoze mu kongera kubaka ubukungu bw’igihugu bwari bwarazahajwe na Jenoside yakorewe Abatutsi mu 1994.”

Mu mwaka wa mbere RRA yakusanyije imisoro ingana n’amafaranga y’u Rwanda agera kuri miliyari 68.4 yanganaga na 39.5%  by’ingengo y’imari ya Leta ya miliyari 173.2, andi yose yari agizwe n’inkunga ndetse n’inguzanyo z’amahanga.

Buri mwaka byagiye bizamuka kugeza ubwo mu mwaka wa 2017-2018 imisoro yakusanyijwe yanganaga na miliyari 1,234.6 z’amafaranga y’u Rwanda, ahwanye na 58% by’ingengo y’imari yanganaga na miliyari 2,115.4.

Mukashyaka ashimangira ko amashimwe menshi yerekeza ku basora kuko ari bo batanga imisoro.  Ati “Mu gihe twizihiza isabukuru y’imyaka 20, ibigwi tubiha abasora kuko iyi misoro ntabwo iva muri RRA ahubwo iva mu bikorera; icyo twe dukora ni ukuyikusanya tukayishyira mu isanduku ya Leta.”

Ikoranabuhanga ryoroheje serivisi, rikuraho n’ibihombo

Uko imyaka yagendaga ihita ni ko n’Abanyarwanda bagendaga bahindura imyumvire bigatuma imisoro irushaho kwiyongera. Mukashyaka ahamya ko ikoranabuhanga ryabafashije koroshya ikusanyamisoro riba n’igisubizo mu kunoza serivisi zo gusora, gutanga amahoro ya gasutamo no kumenyekanisha imisoro.

Serivisi zorohejwe n’ikoranabuhanga zirimo kumenyekanisha (e-filing), kwishyura imisoro kuri internet (e-payment), ikoreshwa ry’imashini zitanga inyemezabuguzi (EBM), kumenyekanisha imisoro kuri telefoni (M-Declaration) n’uburyo bwo kumenyekanisha ibicuruzwa byinjira mu gihugu n’ibyoherezwa mu mahanga (Electronic Single Window).

Mukashyaka ati “Uko u Rwanda rwagendaga rushyira ingufu mu ikoranabuhanga ni ko natwe nka RRA twavuze ngo reka dushingire kuri izi ngufu ziri gushyirwa mu ikoranabuhanga tuzibyaze umusaruro abasora baruhuke gukoresha impapuro no gutonda imirongo bishyura imisoro.”

Ikoranabuhanga ryagabanyije ibihombo, e-filing ituma iminsi itatu yashiriraga mu kumenyekanisha imisoro igera ku minota 20, nta mirongo ikigaragara kuri RRA mu gihe cyo kwishyura imisoro kandi n’imirimo yo kubakira yaragabanutse.

RRA yanakoranye na banki hafi ya zose mu Rwanda mu korohereza abasora kwishyura bakoresheje ikoranabuhanga. Mukashyaka ati “Banki iha usora umubare w’ibanga umufasha guhita yishyura atavuye aho ari. Twakoranye amasezerano na MTN ku buryo abasora bato babasha kwishyura imisoro bakoresheje Mobile Money.”

Gahunda yo kwifashisha ikoranabuhanga mu gukurikirana abamenyekanisha umusoro ku nyongeragaciro (VAT) yatanze umusaruro mwiza ku bawumenyekanisha  hagati y’ukwezi kwa Mutarama n’ukwa Kamena.

Mukashyaka ashimangira ko n’ikoranabuhanga rya EBM rivuguruye ryitezweho gufasha abamenyekanisha VAT kuko ritangirwa ubuntu ndetse rikaba rishyirwa muri mudasobwa y’usora rikanamufasha gukurikirana ubucuruzi bwe aho bwaba bukorera hose.

Abasora barishimira uruhare bagira mu iterambere

Abanyarwanda bari mu bice bitandukanye barashimira Leta y’u Rwanda yashyizeho ikigo nka RRA cyabafashije kugira uruhare mu iterambere ry’igihugu.

Abavuganye n’Imvaho Nshya babanza kwifuriza RRA isabukuru nziza y’imyaka 20 yaranzwe n’imikoranire myiza n’Abanyarwanda, bakongeraho ko iki kigo cyabafashije gusobanukirwa neza n’uruhare bafite mu gukunda igihugu no kugiteza imbere.

Mukabaziga Consessa Umuyobozi akaba na nyiri  Hoteli Diana Fossey NYIRAMACIBIRI akaba anahagarariye ishami rya  Rubavu ahamya ko batanga imisoro bishimye kuko bazi akamaro kayo.

Yagize ati “Twishyura imisoro tugendeye ku mafaranga tuba twinjije, umusoro tuwutanga neza kandi ku gihe kubera icyo utumariye kuko ni ho hava ubushobozi bwo gukora ibikorwa remezo tugakora ubucuruzi neza mu buryo butworoheye.”

Umuyobozi wa AMEKI Color Rusirare Jacques, yagaragaje ko imyaka 20 RRA imaze yaranzwe n’imikoranire myiza n’abikorera.

Ubuyobozi bwa RRA buhamya ko buzarushaho kwegera abasora no kuganira na bo kugira ngo hakurweho inzitizi zose zatuma batagira uruhare mu kubaka igihugu.

RRA irasaba Abanyarwanda, cyane cyane abasora, gukomeza ubufatanye mu gukusanya imisoro ibizeza gukomeza kunoza serivisi no kugira uruhare mu bikorwa biharanira imibereho myiza y’abaturage n’iterambere ry’igihugu muri rusange.