21°C , Partly cloudy | Kigali-Rwanda

Ikigega NDF kiyemeje gukomeza gushyigikira u Rwanda

Yanditswe na SEZIBERA ANSELME

Ku ya 08-02-2018 saa 07:58:26

Umuyobozi uhagarariye ikigega (NDF) cyo mu bihugu bya Danemark, Finlande, Islande, Norvège na Suède, Martina Jagerhorn, avuga ko inkunga bahisemo gutera u Rwanda izagira uruhare mu kurufasha guhangana n’imihindagurikire y’ikirere, kandi bazakomeza kurushyigikira.

Eng Ruhamya Colethe wa 2 uhereye ibumoso, Martina Jagerhorn uhagarariye ikigega NDF na Minisitiri w’ibidukikije Dr Biruta Vincent(Foto Sezibera)

Agira ati: Tumaze iminsi twiga ku mihindagurikire y’ikirere mu Rwanda, ngo turebe icyakorwa kugira ngo rugire ubudahangarwa. Dushingiye rero ku bikorwa bya LAFREC tuzakomeza gushyigikira u Rwanda mu guhangana n’ihindagurika ry’ikirere.”

Martina avuga ko ku nkunga NDF yahaye REMA ingana na miliyoni 3.382 z’amayero ahwanye n’amafaranga y’u Rwanda 3.556.903.489 aziyongera ku bikorwa by’Umushinga ugamije kugarura ishusho kamere y’Amashyamba no kuyabungabunga (LAFREC) usanzwe ushyirwa mu bikorwa n’Ikigo k’Igihugu cyo kubungabunga ibidukikije (REMA).

Umuyobozi mukuru w’Ikigo k’igihugu gishinzwe kubungabunga ibidukikije (REMA) Eng. Coletha Ruhamya, avuga ko inkunga NDF yateye u Rwanda ifite akamaro kanini karimo kongera ubuso buteweho amashyamba, kugarura ishusho kamere yayo, kongera ubuziranenge bw’imbuto y’amashyamba, no kurushaho guhangana n’imihindagurikire y’ibihe.

Agira ati: Twishimiye uko dukomeza gukorana n’abafatanyabikorwa bacu ndetse n’ikizere bakomeza kutugaragariza. Ubufatanye nk’ubu budufasha kugera ku ntego yacu yo kugira ibidukikije bibungabunzwe mu buryo burambye”.

Inkunga NDF yahaye ikigo cya REMA binyuze muri Banki y’isi itegerejweho no kugira uruhare mu guhangana n’imihindagurikire izashyirwa mu mushinga uzamara imyaka 2 urangire 2019.

TANGA IGITEKEREZO

Leave a Reply

Your email address will not be published. Required fields are marked *