17°C , Thunderstorms | Kigali-Rwanda

Ikibazo cy’amazi yo mu Birunga na Nyabarongo cyahagurukiwe

Yanditswe na Rutayisire Emile

Ku ya 02-06-2019 saa 14:28:07
Mu mwaka wa 2024 biteganyijwe ko umugezi wa Nyabarongo uzaba utagisa n'igitaka cyangwa usa n'icyondo

Ikigo cy’Igihugu cy’Amazi n’amashyamba (RWFA), kiravuga ko gishishikajwe no gukemura ikibazo cy’amazi yo mu Birunga atera abaturage n’umugezi wa Nyabarongo utwara ubutaka.

Umuyobozi Mukuru wa RWFA, Prime Ngabonziza, avuga ko mu gukemura ibyo bibazo hagomba gushyirwa mu bikorwa neza imishinga ibungabunga ayo mazi ndetse n’umugezi wa Nyabarongo.

Ngabonziza avuga ko ikibazo cy’amazi yo mu Birunga atera abaturage cyahagurukiwe ku buryo umushinga wamaze kwigwa ndetse wanarangiye ku buryo akazi kazatangira gukorwa mu ngengo y’imari y’umwaka wa 2019/2020.

Ngabonziza agira ati “Mu kwezi kwa Kanama na Nzeri 2019 imirimo y’ibanze izaba yatangiye yo guhangana n’amazi atera imyuzure mu Mujyi wa Musanze, Burera, Nyabihu na Rubavu”.

Akomeza avuga ko uwo mushinga wamaze kwigwa neza ukaba uzatwara miriyari zigera kuri 35 uzahera ku gukemura ibyo amazi yangiza, agasobanura ko amazi atabura icyo akora kuko ashobora guhabwa abaturage agakoreshwa mu mirimo ya buri munsi, nko kuhira n’ibindi akemeza ko mu mwaka wa 2024, umushinga uzaba ari amateka wararangiye kera.

Mu kiganiro Ngabonziza yagiranye n’Imvaho Nshya cyagarutse ku cyogogo cy’umugezi wa Nyabarongo ku buryo bwo kuwubungabunga ntukomeze kujyana ubutaka ndetse ugahindura ibara ntukomeze gusa n’ibyondo.

Ngabonziza agira ati “Hashize imyaka ibiri duhagurukiye ikibazo cy’umugezi wa Nyabarongo ku buryo tumaze guca amaterasi arenga 2000. Hamaze guterwa ibiti bivangwa n’imyaka kuri hegitari 3000 kandi n’ubwo tumaze gukora ibyo byose ntibyarangiye turacyakomeza”.

Akomeza avuga ko aho Nyabarongo inyura hari imisozi ihanamye, ituweho n’abaturage, bakahahinga akavuga ko guca isuri burundu bizasaba igihe kirekire ariko ko yizeye ko izagabanuka kuko n’igikorwa cyo gutera imigano ku nkombe za Nyabarongo kizakomeza akizera akomeje ko inshingano Ikigo gishinzwe kwita ku mazi n’amashyamba, RWFA cyahawe kizazigeraho.

Gahunda zo guhindura uyu mugezi wa Nyabarongo ugata ibara risa n’icyondo cyangwa igitaka zirakomeje

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.