22°C , Partly cloudy | Kigali-Rwanda

Ijabo Ryawe Rwanda n’ishuri ry’umupira w’amaguru muri Oman biyemeje ubufatanye

Yanditswe na BUGINGO FIDELE

Ku ya 30-04-2018 saa 06:27:17

Umuyobozi w’ihuriro ry’amashuri yigisha umupira w’amaguru mu Rwanda “Ijabo Ryawe Rwanda”, Sheikh Habimana Hamdan yatangarije Imvaho Nshya  ko biyemeje  ubufatanye n’ishuri ry’umupira w’amaguru muri Oman «Excellence Sports Academy”.

Abagize itsinda ryari ryaturutse muri Oman ubwo bari kumwe na Perezida w’Ijabo Ryawe Rwanda, Sheikh Habimana Hamdan

Ibi Sheikh Habimana  nyuma  y’uruzinduko rw’iminsi 5, itsinda ryaturutse muri iri shuri ryagiriye mu Rwanda kuva tariki 23 kugeza 28 Mata 2018 aho basuye amashuri yigisha umupira w’amaguru  mu bice bitandukanye by’igihugu.

Sheikh Habimana atangaza ko bakoze imbanzirizamushinga y’amasezerano y’ubufatanye irimo ingingo 5 z’ingenzi harimo  ubufatanye bwaranga ESA n’Ijabo Ryawe Rwanda, uburyo bafungura ishami ry’ishuri ryabo mu Rwanda rikaba umunyamuryango w’Ijabo  Ryawe Rwanda.

Hari kandi Gukina imikino ihoraho  ku buryo byaba nka shampiyona y’abana  bakayitera inkuga,  Kohereza abantu bo guhura ku batoza  mu gutoza abana bato ndetse n’uburyo habaho gusurana aho ikipe y’Ijabo Ryawe Rwanda  yajya muri Oman cyangwa ikipe yabo ikaza mu Rwanda ndetse no gufasha abakinnyi bagaragaje impano kubona amakipe hanze y’u Rwanda.

Aya masezerano  ashobora gusinywa vuba

Sheikh Habimana Hamdan  atangaza ko   kubera ko hari haje bamwe mu bayobozi atari bose bakoze imbanzirizamushinga bakaba bagomba kwicara  bakareba ibyo baganiriyeho. Ati “Ikoranabuhanga ryarabyoroheje tuzajya dukomeza tuvugane na bo nibamara kubirebamo neza hazabaho n’umwanya wo gusinya amasezerano y’ubufatanye”.

Yakomeje agira atiBashobora kuzohereza umuntu akaza cyangwa nkajyayo bivuze ngo n’ejo n’ejobundi babyemeje twasinya”.

Ku bijyanye no gushinga ishami ry’ishuri ryigisha umupira w’amaguru rya ESA, Sheikh Habimana  avuga ko  bazabyigaho kuko bavugaga ko  bashobora gufata  ishuri rimwe  ridafite ubushobozi bakagira ibyo bumvikana  bakariha ubushobozi rikababera nk’ishami ryabo hano  cyangwa bagafungura ishuri ryabo hano  ibikenewe byose bakabitanga.

Hari ibyo bashimye mu Rwanda

Sheikh Habimana   avuga ko iri tsinda ryaturutse muri Oman nyuma yo gusura amashuri yigisha umupira w’amaguru mu bice bitandukanye by’igihugu  hari ibyo bashimye birimo impano z’abana b’Abanyarwanda ariko banagira bimwe basaba byashyirwamo ingufu.

Yagize ati Bashimye ko abana bafite impano, bashimwe ubwitange bw’abana n’abatoza.  Gusa batugiriye inama ko twakongera ubushobozi abatoza  b’abana kuko ari bo bafasha   abana kuzavamo abakinnyi beza”. Yanavuze ko bagarutse ku bikoresho    aho bavuga ko biba bikenewe kuko hari nk’imyitozo isaba ko buri mwana aba afite umupira we n’ibindi.

Iri tsinda ryari riyobowe na Said Nasser Abdullah Al Kindi akaba ari Umuyobozi Mukuru (CEO) wa Excellence Sports Academy (ESA)  akaba ari kumwe na  Abdul Rahim Sleyim Salmeen Al Hajri, Sulaiman Khamis Salim Al Obaidani ndetse na Majid Sulaiman Salim Al Wahaibi.

TANGA IGITEKEREZO

Leave a Reply

1 Comment on "Ijabo Ryawe Rwanda n’ishuri ry’umupira w’amaguru muri Oman biyemeje ubufatanye"

avatar
Sort by:   newest | oldest | most voted
Ruhina
Guest

Bravo Hamdan,turabashyigikiye gusa ntibizarangiriraho