24°C , Intermittent clouds | Kigali-Rwanda
Abana bitwaye neza mu batarengeje imyaka 13 bari kumwe n'abayobozi b'Ijabo Ryawe Rwanda

Ijabo Ryawe Rwanda bazakoresha ingengo y’imari ya miliyoni 122 mu myaka ibiri

Yanditswe na BUGINGO FIDELE

Ku ya 21-01-2019 saa 21:01:18

Mu nama y’intego rusange  y’ihuriro ry’amashuri yigisha umupira w’amaguru mu Rwanda  “Ijabo Ryawe Rwanda”  hemejwe  umushinga  w’ingengo y’imari y’igihe k’imyaka ibiri, ugaragaza ko hazibandwa ku bikorwa birimo amarushanwa, kubaka ubushobozi bw’abanyamuryango no kubaka umuryango uhamye aho bizatwara  miliyoni 122 z’amafaranga y’u Rwanda.

Iyi nama y’inteko rusange yabereye muri Kigali Convention Center tariki 20 Mutarama 2019  yanize ku zindi ngingo zitandukanye zirimo  raporo y’ibyakozwe na Komite Nyobozi kuva yatorwa tariki  31 Werurwe 2017, gutora amategeko ngengamikorere agomba kugenga umuryango aho yegurira  ububasha n’ubushobozi abanyamuryango  hashingiwe ku nzego z’ubuyobozi zavuguruwe.

Abari bitabiriye inama y’intego rusange y’Ijabo Ryawe Rwanda

Muri iyi nama kandi hemejwe ko umunyamuryango w’Ijabo Ryawe Rwanda ari irerero ryujuje ibiteganywa n’amabwiriza ya Minisiteri y’Umuco na  Siporo  No 001/MINISPOC/2017 yo ku wa 16 Gashyantare 2017, ibyo bikemezwa  n’Inteko rusange.

Buri  munyamuryango kandi asabwa kwishyura umusanzu w’umuryango uhwanye n’amafaranga y’u Rwanda ibihumbi 24 buri  mwaka mu gihe irerero rishaka kuba umunyamuryango mushya ryo risabwa kwishyura umusanzu fatizo uhwanye n’ibihumbi 100 by’amafaranga y’u Rwanda. Kuri ubu abanyamuryango bemewe akaba ari 130.

Perezida   w’Ijabo Ryawe Rwanda, Sheikh Habimana Hamdan yatangaje ko inama y’intego rusange yagenze neza kuko ibyo bifuzaga byose byakozwe kandi neza.

Perezida w’Ijabo Ryawe Rwanda, Sheikh Habimana Hamdan

Agaruka ku ngengo y’imari y’imyaka 2 (2019 na 2020) yagaragaje ko izaturuka mu banyamuryango ndetse n’izindi nzego zirimo n’ishyirahamwe ry’umupira w’amaguru mu Rwanda “FERWAFA”.

Yagize ati : “ Abanyamuryango nibo bambere mu misanzu bazatanga. Ubuyobozi bwa FERWAFA nabo batwemereye ko bazadufasha ndetse na Minisiteri y’Umuco na Siporo  bamaze kubona ibikorwa byacu biyemeje ko bazadufasha”.

Sheikh Habimana yashimangiye ko bagomba no gushaka abandi baterankunga kuko banashyizeho  komisiyo ishinzwe gushaka abaterankunga no kumenyekanisha ibikorwa.

Ku birebana n’abana basohoka mu marerero bajya mu makipe bigateza ikibazo, Sheikh Habimana yavuze ko abakuriye amarerero  batari basobanukiwe kandi  nta mategeko yari ahari. Akomeza avuga ko ubu  bari kubishyira ku  murongo kuko babanje gushyiraho inzego z’ubuyobozi  none bakaba bemeje  n’amategeko azarengera  izo nzego.

Abakoze neza barashimiwe

Perezida w’ijabo Ryawe Rwanda, Sheikh Habimana Hamdan yashimiwe ubwitange yagize kuva yatorerwa kuyobora umuryango.

Perezida w’ijabo Ryawe Rwanda, Sheikh Habimana Hamdan ashyirizwa ishimwe

Hashimiwe umuyobozi witanze kuruta abandi mu bikorwa by’ Ijabo Ryawe Rwanda ari we Mpanzi Suzuki.

Hashimiwe kandi ababyeyi bahize abandi mu kwitabira gahunda z’Ijabo Ryawe Rwanda ndetse n’abafatanyabikorwa. Umubyeyi witangiye ibikorwa kuruta abandi yabaye Nisingizwe Andre (Ligue 4), umubyeyi wahize abandi mu kwitangira umupira w’abana ni Harerimana Emmanuel naho umufatanyabikorwa wahize abandi Polisi y’igihugu.

Hashimiwe ababaye indashyikirwa mu kwitangira umupira w’amaguru w’abana by’umwihariko biciye mu bikorwa by’Ijabo Ryawe Rwanda. Ligue ya 5 yagaragaje ubwitabire bwinshi kuruta izindi (Ntibitura Jean Claude). Ligue 1 yahanze udushya (Rukema Philemon. Umuyobozi wa Ligue 3, Kamanzi Hardi ni we  wahize abandi kugera ku bo ayobora naho Ligue 2 ni yo  yatanze raporo neza kandi ku gihe kuruta abandi (Mbungira Ismael).

Abayoboye  Ijabo Ryawe Rwanda bose  nabo barashimiwe aba barimo Nsengimana Donatien, Padiri Nsengimana Jean Bosco, Dr Sumanyi Jean Claude, Kanamugire Fidele na Mironko Elvin.

Abana bitwaye neza mu irushanwa ry’abatarengeje imyaka 13 batemberejwe  muri Kigali  Convention Center nk’igihembo.

Abayobozi b’Ijabo Ryawe Rwanda bari kumwe n’abakuriye za Ligue

Abana bitwaye neza mu batarengeje imyaka 13 bari kumwe n’abayobozi b’Ijabo Ryawe Rwanda

TANGA IGITEKEREZO

Leave a Reply

Your email address will not be published. Required fields are marked *