25°C , Intermittent clouds | Kigali-Rwanda

Ihuriro ry’abacuruzi mu nama ryaganiriye ku guteza imbere ibikorerwa mu Rwanda

Yanditswe na MUGISHA BENIGNE

Ku ya 10-12-2019 saa 06:50:58
Minisitiri w'Ubucuruzi n'Inganda, Hakuziyaremye Soraya

Inama ya mbere y’ihuriro ry’abacuruzi mu Rwanda yahuje abitabiriye imurikagurisha ry’ibikorerwa mu Rwanda, ikaba yaribanze ku guteza imbere ibikorerwa mu Rwanda.

Afungura ku mugaragaro iyi nama, Minisitiri w’Ubucuruzi n’Inganda Hakuziyaremye Soraya, yavuze ko iri huriro ari  irya mbere ry’abacuruzi mu rwego rwo kuganira ku buryo bwo guteza imbere ibikorerwa mu Rwanda, imbogamizi abanyenganda bahura nazo  n’uburyo  bwo kuzikemura kugira ngo ibikorerwa mu Rwanda bikomeze bitezwe imbere.

Avuga ko iterambere ry’ ubukungu mu Rwanda rigirwamo uruhare rukomeye n’ abikorera, ari nayo mpamvu Leta yihaye intego yo gufatanya na bo no gukuraho imbogamizi zose zatuma batagera ku ntego zabo.

Ati “Igice kinini cy’ubukungu bw’igihugu gituruka mu rugaga rw’abikorera, ni yo mpamvu Leta y’u Rwanda ikora ibishoboka byose mu rwego rwo kuvanaho imbogamizi zababuza kugera ku ntego zabo.”

Hakuziyaremye avuga ko poritiki ya ‘Made in Rwanda’ kuva yatangizwa yatumye abikorera batangira guhanga udushya kandi bagafasha abaturage kwiteza imbere babaha imirimo.

Avuga ko mu myaka 3 ishize poritiki ya ‘Made in Rwanda’ itangijwe mu Rwanda inganda zinjije miriyari 323 z’amafaranga y’u Rwanda naho ubucukuzi bw’amabuye y’agaciro bwinjiza miriyari 1456 z’amafaranga y’u Rwanda.

Yagarutse ku bwiza bw’ibikorerwa mu Rwanda, asaba abanyenganda gukora  ibishoboka bagatunganya neza  ibicuruzwa byabo ku buryo  bishobora guhangana ku masoko mpuzamahanga.

Umuyobozi w’Urugaga rw’abikorera Ruzibiza Stephen, avuga abikorera bakomeje kwihangira umurimo mu rwego rwo gukomeza kwiteza imbere. Avuga ko urwego rw’abikorera rugira uruhare mu bucuruzi n’ubukungu, ndetse ngo rukagira uruhare mu guhanga imirimo no kuyitanga ku banyarwanda n’abanyamahanga.

Yagize ati “Urwego rw’abikorera rwahanze imirimo ingana na 660 000, igera ku 408 000 ihabwa Abanyarwanda naho igera ku 7000 ihabwa abanyamahanga, ni muri gahunda y’abikorera yo guhanga imirimo no kuyitanga.”

Avuga ko urwego rw’abikorera rwaguye imipaka rukaba ruhahirana n’abanyamahanga, bityo rukagira uruhare mu iterambere ry’ubukungu bw’igihugu no mu bucuruzi bw’imbere no hanze y’Igihugu.

Bamwe mu bari bitabirirye iyi nama bagaragarije Minisitiri w’Ubucuruzi n’Inganda imbogamizi bahura nazo harimo gutinda kwishyurwa n’inzego za Leta mu gihe hari serivise bazihaye, ngo fagitiri ikamara amezi arenga atatu batarishyurwa kandi bakeneye kurangura no gukomeza gukora ubucuruzi bunyuranye.

Bagaragaje kandi ikibazo bahura nacyo mu misoro aho bakurwaho amafaranga arenze ay’umusoro basabwa, ngo iki kibazo bakaba barakigaragarije Abadepite na bo bagasaba ko amafaranga bakatwa atari ku musoro yavanwaho ariko ngo na n’ubu bakaba bakiyakatwa.

Ku kibazo k’inzego za Leta baha serivise zigatinda kubishyura, Minisitiri w’Ubucuruzi yavuze ko bishobora kuba biterwa n’inzira binyuramo zijyanye n’amategeko, ariko abizeza ubuvugizi kuri iki kibazo, abizeza ko kizaganirwaho kigakemuka.

Ku bijyanye n’amafaranga bacibwa arenze ayo bagombaga gutanga ku musoro, Umuyobozi w’Ikigo k’Igihugu k’Imisoro n’Amahoro, Ruganintwali Pascal,  yavuze ko ayo mafaranga amabanki abakata atinjira mu kigega k’ikigo ayobora, ko ahubwo yinjira mu mabanki bakorana nayo mu gusora nayo akaba asobanura ko ayo mafaranga bakatwa ari aya serivisi banki ziba zabahaye.

Ruganintwali avuga ko na bo nta gihe badasaba banki kwirinda gukata amafaranga abasora, ariko ngo birasaba kuganirwaho bakareba ko iki kibazo na cyo cyakemuka.

Abikorera kandi bagaragarije Minisitiri Soraya ikibazo cy’umuriro w’amashanyarazi utagera mu bice bimwe na bimwe, bikaba bituma ubucuruzi bwabo n’ibyo bakora bisubira inyuma, aha naho yabemereye ubuvugizi mu nzego bireba amashanyarazi akabageraho.

Umwanditsi:

MUGISHA BENIGNE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.