26°C , Partly sunny | Kigali-Rwanda

Igisupusupu hasobanuwe ibyo ahugiyemo

Yanditswe na Ndamyirokoye François

Ku ya 27-03-2020 saa 10:14:52
Nsengiyumva François nka Gisupusupu

Mukuralinda Alain uzwi nka Alain Muku,  Umujyanama w’umuhanzi Nsengiyumva Francois  uzwi nka Gisupusupu  yatangaje ko icyorezo cya Covid-19 nikirangira uyu muhanzi azasohora indirimbo.

Ibi abitangaje mu gihe abantu batandukanye bibaza aho uyu muhanzi asigaye aherereye. Muku yavuze ko uyu muhanzi arimo kwirinda Covid-19 nk’abandi ngo ariko nirangira azahita asohora indirimbo.

Ati “Yirinze Koronavirusi nkatwe twese. Abantu nibahumure ntaho yarengeye azasohora indirimbo nyuma y’iki cyorezo”.

Ibyo bamwe bavuga ko umuziki wahise umunanira nyuma y’igihe gito yari awumazemo, Alain Mukuralinda yavuze ko ari amagambo y’abantu kandi ko ibikorwa bigomba gukomeza mu gihe Koronavirusi ivuyemo.

Yagize ati “Ntabwo wabuza abantu kuvuga ibyo bashaka. Icyorezo cya korona nikiduha agahenge tuzakomeza gahunda uko bisanzwe hagati aho baba bumva indirimbo 5 amaze kugeza ku Banyarwanda.”

Ku rundi ruhande Muku yatangiye gufasha undi muhanzi witwa  Muhayimana Martin “Maritini” ufite imyaka  54 y’amavuko akaba yaratangiye amufasha ku ndirimbo yitwa “Ndi mu nzozi”.

Mu mwaka wa 2019 ni bwo abantu benshi bamenye umuhanzi waje ari mushya, Nsengiyumva François amenyekana nk’Igisupusupu kubera indirimbo ye.

Uyu mugabo wahoze acurangira umuduri mu masoko yo mu Karere ka Gatsibo, abantu bakamwishyura amafaranga y’intica ntikize, impano ye yaje gushimwa na Alain Mukuralinda maze yiyemeza gutunganya ibihangano bye.

Indirimbo ye ya mbere yitwa “Mariya Jeanne” benshi bita Igisupusupu yamuhesheje igikundiro cyo ku rwego rwo hejuru, iracurangwa mu bitangazamakuru bitandukanye, mu tubari two mu cyaro n’utubyiniro two mu mijyi.

Muri uyu mwaka wa 2020 ibikorwa byabaye nk’ibicogora, abantu ntibongera kumwumva cyane mu itangazamakuru, benshi batangira kuvuga ko umuziki wamunaniye.

Umwanditsi:

Ndamyirokoye François

Tanga Igitekerezo

Email yanyu ntigaragazwa ku rubuga. Amazina na Email ni ngombwa.