Igipimo k’imitangire ya serivise kizaba kigeze kuri 90% muri 2024

Yanditswe na Rutayisire Emile

Ku ya 12-01-2020 saa 19:08:33
Umuyobozi Mukuru w’Urwego rw’Igihugu rw’Imiyoborere (RGB), Dr. Kaitesi Usta

Ibi bigaragara muri raporo y’ibikorwa y’umwaka wa 2016/2019 na gahunda y’ibikorwa y’umwaka wa 2019-2020 aho Urwego w’Igihugu rw’Imiyoborere, RGB ruvuga ko hashingiwe kuri Gahunda ya Guverinoma y’Imyaka Irindwi (NST1), biteganyijwe ko igipimo k’imitangire ya serivise kizaba kigeze kuri 90% muri 2024.

Nk’uko byagaragajwe muri iyo raporo n’Umuyobozi Mukuru w’Urwego w’Igihugu rw’Imiyoborere, RGB, Dr. Usta Kaitesi, buri mwaka RGB igenzura imitangire ya serivise mu nzego zitandukanye hagamijwe kureba aho zigeze zigana kuri iyo ntego.

Agira ati “Mu mwaka wa 2018-2019, RGB yakoze igenzura ry’imitangire ya serivise mu nzego 99, muri zo 49 ni iza Leta, 20 n’iz’abikorera na 30 z’imiryango itari iya Leta. Hakozwe kandi ubukangurambaga bugamije kunoza imitangire ya serivise “Nk’uwikorera”; guhugura abakozi ba RGB ku mitangire ya serivise; isesengura ku mitangire ya serivise mu bigo by’ubuvuzi na serivise zo kugeza amazi ku baturage ndetse no kubaka ubufatanye n’inzego zisuzuma serivise”.

Akomeza avuga ko RGB yakoze igenzura ry’imitangire ya serivise muri Minisiteri 15, ibigo 30, Intara zose n’Umujyi wa Kigali. Naho mu rwego rw’abikorera, hagenzuwe ibigo 20 birimo 5 bikora mu byerekeye gutwara abagenzi mu buryo bwa rusange n’ibigo by’imari 15. Hagenzuwe kandi ibigo 30 by’Imiryango itari iya Leta.

Zimwe mu mpinduka zakozwe mu igenzura ni uko mu rwego rw’abikorera hasuzumwe serivise z’Imari na serivise zo gutwara abantu mu buryo bwa rusange, mu gihe umwaka ushize hagenzuwe serivise z’ubuvuzi zitangwa n’abikorera na serivise zo gutwara abantu mu buryo bwa rusange. Ikindi cyahindutse ni uko igipimo kijyanye no gutanga serivise hifashishijwe ikoranabuhanga cyakorewe igenzura ryihariye.

Kabano Gilbert atuye mu Mujyi wa Kigali avuga ko Leta y’u Rwanda ishyize imbere serivise nziza kandi yihuse lkuko ari bimwe mu biteza imbere Igihugu.

Agira ati “Iyo umuntu ahawe serivisi nziza kandi yihuse bituma ibikorwa byihuta. Iyo serivise zitanzwe biteza imbere Igihugu kubera ko n’iyo umunyamahanga ari mu Gigugu agafatwa neza, serivise akeneye akayihabwa vuba bituma n’iyo atashye akumbura kugaruka mu Rwanda.”

Ubu igipimo cyaramanutse atari uko abaturage badahabwa serivise n’imiyoborere myiza, ahubwo biterwa nuko abaturage bamaze kumenya uburenganzira bwabo mu guhabwa serivise n’imiyoborere mu gihe kera hari abapfaga kwemera gusa batanasobanukiwe.

RGB ifite inshingano zirimo guteza imbere amahame y’imiyoborere myiza, imikorere n’imitangire ya serivise no kubigiramo inama Guverinona n’izindi nzego bireba, kugenzura ku buryo buhoraho imitangire ya serivise n’iyubahirizwa ry’amahame y’imiyoborere myiza mu nzego za Leta, iz’abikorera n’imiryango itari iya Leta. Ibikorwa byakozwe muri iki kiciro, byibanze ku kugenzura imitangire ya serivise, kwimakaza amahame y’imiyoborere no guhuza ibikorwa by’abafatanyabikorwa mu iterambere (JADF ).

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.